മ്യൂസിയം പൊലീസ് സ്‌റ്റേഷന് മുന്നില്‍ ഓണാഘോഷം നടത്തിയതിലും റീല്‍സ് ചിത്രീകരിച്ചതിലും അന്വേഷണത്തിന് ഉത്തരവിട്ട് എ.ഡി.ജി.പി. ക്രമസമാധാന ചുമതലയുള്ള എ.ഡി.ജി.പിയാണ് സംഭവത്തില്‍ അന്വേഷണത്തിന് ഉത്തരവിട്ടത്. സംഭവത്തില്‍ പൊലീസുകാര്‍ക്ക് വീഴ്ച പറ്റിയുണ്ടോയെന്ന് അന്വേഷിക്കാന്‍ സ്‌പെഷ്യല്‍ ബ്രാഞ്ച് അസിസ്റ്റന്റ് കമ്മിഷണറോട് ആവശ്യപ്പെട്ടിട്ടുണ്ട്.

സി.പി.എം മുന്‍ കൗണ്‍സിലറും ഇ.ഡി ഉദ്യോഗസ്ഥരെ മര്‍ദ്ദിച്ച കേസിലെ പ്രതിയുമായ ഐ.പി.ബിനുവിന്റെ നേതൃത്വത്തിലാണ് മ്യൂസിയം സ്‌റ്റേഷന് മുന്നില്‍ ഓണാഘോഷവും റീല്‍സ് ചിത്രീകരണവും സംഘടിപ്പിച്ചത്. സ്‌റ്റേഷന് മുന്നില്‍ പൊലീസുകാര്‍ ഒരുക്കിയ ഊഞ്ഞാലില്‍ ആടിയും ഒരേ വേഷം ധരിച്ചുമാണ് പ്രതികളുടെ റീല്‍സ് ചിത്രീകരണം.

അതേസമയം ഐ.പി. ബിനുവിനെ ഓണാഘോഷത്തിന് ക്ഷണിച്ചിട്ടില്ലെന്നും കേസുമായി ബന്ധപ്പെട്ട് സ്‌റ്റേഷനില്‍ ഒപ്പിടാന്‍ എത്തിയതാണെന്നും പൊലീസ് വിശദീകരിച്ചു. വീഡിയോ വിവാദമായതിന് പിന്നാലെ സ്‌റ്റേഷന് മുന്നിലുണ്ടായിരുന്ന ഊഞ്ഞാല്‍ പൊലീസ് അഴിച്ചുമാറ്റി. സംഭവത്തിന്റെ പശ്ചാത്തലത്തില്‍ ബിനുവിന്റെ ജാമ്യം റദ്ദാക്കാന്‍ കോടതിയില്‍ അപേക്ഷ നല്‍കാന്‍ പൊലീസ് നീക്കം ആരംഭിച്ചിട്ടുണ്ട്.