തമിഴ് ചിത്രം മണ്ടാടിയിലൂടെ കയ്യടി നേടുകയാണ് നടി മഹിമ നമ്പ്യാര്‍. സൂരി നായകനായെത്തിയ ചിത്രത്തില്‍ മഹിമയുടെ പ്രകടനവും ശ്രദ്ധിക്കപ്പെടുന്നുണ്ട്. ഇതിനിടെ മഹിമയെക്കുറിച്ച് ചിത്രത്തിന്റെ സംവിധായകന്‍ മതിമാരന്‍ പുകഴേന്തി പറഞ്ഞ വാക്കുകള്‍ ചര്‍ച്ചയായി മാറിയിരിക്കുകയാണ്. അപകടത്തില്‍ മുഖത്ത് പരുക്കേറ്റിട്ടും സെറ്റില്‍ തിരികെയെത്തിയ മഹിമയ്ക്ക് നന്ദി പറയുകയായിരുന്നു സംവിധായകന്‍.
''ഉസിരേ നീ താന്‍ പാട്ടിനെക്കുറിച്ച് പറയുമ്പോള്‍, നിങ്ങള്‍ക്ക് നടന്ന അപകടത്തെക്കുറിച്ച് ആര്‍ക്കും അറിയില്ലെന്ന് തോന്നുന്നു. ഞാന്‍ അതേക്കുറിച്ച് പറയണമെന്ന് വിചാരിക്കുന്നു.

20 ന് മുകളില്‍ സ്റ്റിച്ചുണ്ടായിരുന്നു. മുഖം മൊത്തം കൊളാപ്‌സ് ആയിപ്പോയിരുന്നു. പാട്ട് എടുക്കുന്നതിന്റെ അഞ്ച് ദിവസം മുമ്പ് അവര്‍ക്കൊരു അപകടമുണ്ടായി. മുഖമാകെ തകര്‍ന്നുപോയി. 20 ന് മുകളില്‍ സ്റ്റിച്ചിട്ടിരുന്നു. അവര്‍ എനിക്കൊരു സെല്‍ഫി അയച്ചു തന്നിരുന്നു. നാണമില്ലാതെ ഞാന്‍ ചോദിച്ചത് ഷൂട്ടിങിന് വരുമോ എന്നായിരുന്നു. എനിക്ക് വേറെ വഴിയില്ലായിരുന്നു. പ്ലാസ്റ്റിക് സര്‍ജറി ചെയ്ത് ആറാം ദിവസം ഷൂട്ടിങിന് വന്നു. ആ പാട്ടിന് പിന്നില്‍ ഈ ഡെഡിക്കേഷനുണ്ട്. ഞാനത് ഒരിക്കലും മറക്കില്ല'' എന്നാണ് മതിമാരന്‍ പറയുന്നത്.കാര്യസ്ഥനിലൂടെയാണ് മഹിമ സിനിമയിലെത്തുന്നത്.

പിന്നീട് തമിഴിലും മലയാളത്തിലുമെല്ലാം നിരവധി സിനിമകളില്‍ നായികയായെത്തി കയ്യടി നേടി.ആര്‍ഡിഎക്‌സിലെ നായിക വേഷം ഏറെ പ്രശംസ നേടിക്കൊടുത്തതാണ്. ജയ് ഗണേഷ് അടക്കമുള്ള മലയാള സിനിമകളില്‍ അഭിനയിച്ചു. സൂരി നായകനായ മണ്ടാടിയാണ് ഒടുവില്‍ പുറത്തിറങ്ങിയ സിനിമ.മഹിമയുടെ അപകടത്തെ കുറിച്ച് നടി ഒരിടത്ത് പോലും സംസാരിച്ചിട്ടില്ല. സംവിധായകന്‍ ഇക്കാര്യം വേദിയില്‍ പറയുന്നത് വരെ മഹിമ ഒരു സോഷ്യല്‍ മീഡിയ പോസ്റ്റ് പോലും ഇട്ടിരുന്നില്ല. അത്രയും ഭീകരമായ അപകടം സംഭവിച്ചിട്ടും, കരിയറിലേക്ക് ശക്തമായി തിരിച്ചു വന്ന മഹിമയെ പ്രശംസിക്കുകയാണ് സിനിമ ഇന്റസ്ട്രിയും ആരാധകരും.

മണ്ടാടിയിലെ അഭിനയത്തിന് മഹിമയ്ക്ക് ലഭിക്കുന്ന പ്രശംസ തീർത്തും നടി അർഹിക്കുന്നതാണ്.മഹിമയെ കുറിച്ച് സൂരി പറഞ്ഞ കാര്യങ്ങൾ ശ്രദ്ധനേടുകയാണ്. മണ്ടാടിയിൽ അഭിനയിക്കാനായി നിരവധി നടിമാരെ സമീപിച്ചിരുന്നുവെന്നും എന്നാൽ ആരും തയ്യാറായില്ലെന്നും സൂരി പറയുന്നു."ഈ കഥാപാത്രത്തിന് നിറയെ പേരെ സമീപിച്ചിരുന്നു. പക്ഷേ പലരും പല കാരണങ്ങാൽ ഒഴിഞ്ഞുമാറി. ഓരോരുത്തര്‍ക്കും അവരുടെ ഇഷ്ടങ്ങളുണ്ട്. പലരും വേണ്ടെന്ന് പറഞ്ഞ ആ റോള്‍ കഥ മുഴുവനും കേട്ട ശേഷം, ആ റോളിന്‍റെ വ്യാപ്തി മനസിലാക്കി മഹി ഓക്കെ പറയുകയായിരുന്നു. കഥ എന്താണെന്ന് മാത്രമാണ് അവര്‍ നോക്കിയത്. വാഴ്ത്തുക്കള്‍ മഹി", എന്നായിരുന്നു സൂരിയുടെ വാക്കുകൾ. മണ്ടാടിയുടെ പ്രൊമോഷൻ പരിപാടിയ്ക്കിടെ ആയിരുന്നു സൂരിയുടെ പ്രതികരണം.