വിഖ്യാത അമേരിക്കൻ ഡോക്യുമെന്ററി സംവിധായകൻ ഫ്രെഡറിക് വൈസ്‌മാനോടുള്ള ആദരസൂചകമായി അദ്ദേഹത്തിന്റെ രണ്ട് ചിത്രങ്ങൾ 18ാമത് രാജ്യാന്തര ഡോക്യുമെന്ററി ഹ്രസ്വചിത്രമേളയില്‍ പ്രദർശിപ്പിക്കും. ‎1969-ൽ പുറത്തിറങ്ങിയ, അമേരിക്കയിലെ പോലീസ് ഉദ്യോഗസ്ഥരുടെ ദൈനംദിന പ്രവർത്തനങ്ങളെയും അവർ നേരിടുന്ന സാമൂഹിക യാഥാർത്ഥ്യങ്ങളെയും ദൃശ്യവൽക്കരിക്കുന്ന 'ലോ ആൻഡ് ഓർഡർ', ‎ഫാഷൻ ലോകത്തിന്റെയും പരസ്യരംഗത്തിന്റെയും പിന്നാമ്പുറക്കാഴ്ചകൾ ദൃശ്യവൽക്കരിച്ച, 1981ൽ പുറത്തിറങ്ങിയ ക്ലാസിക് ചിത്രം 'മോഡൽ', എന്നിവയാണ് മേളയിൽ പ്രദർശിപ്പിക്കുക.

ഡോക്യുമെന്ററി ചലച്ചിത്രകാരനും തിയേറ്റർ സംവിധായകനുമായിരുന്ന ഫ്രെഡറിക് വൈസ്‌മാൻ, സിനിമകളിൽ വോയ്‌സ് ഓവർ, അഭിമുഖങ്ങൾ, പശ്ചാത്തല സംഗീതം എന്നിവ പൂർണ്ണമായും ഒഴിവാക്കിക്കൊണ്ട് യഥാർത്ഥ ജീവിതം ക്യാമറയിൽ പകർത്തുന്ന ശൈലിയുടെ വക്താവായിരുന്നു. ചലച്ചിത്ര ലോകത്തിന് നൽകിയ സമഗ്ര സംഭാവനകൾ പരിഗണിച്ച് 2016-ൽ അദ്ദേഹത്തിന് അക്കാദമി ഹോണററി അവാർഡ് (ഓസ്കാർ)ലഭിച്ചു.
‎‎
സെപ്റ്റംബർ 25 മുതൽ 30 വരെ നടക്കുന്ന ‎രാജ്യാന്തര ഡോക്യുമെന്ററി ഹ്രസ്വചിത്ര മേളയില്‍ പങ്കെടുക്കുന്നതിന് https://registration.iffk.in എന്ന വെബ്‌സൈറ്റ് മുഖേന ഡെലിഗേറ്റായി രജിസ്റ്റര്‍ ചെയ്യാം. പൊതുവിഭാഗത്തിന് ജി.എസ്.ടി. ഉള്‍പ്പെടെ 590 രൂപയും വിദ്യാര്‍ഥികള്‍ക്ക് 354 രൂപയുമാണ് ഡെലിഗേറ്റ് ഫീസ്. കൈരളി തിയേറ്ററില്‍ സജ്ജീകരിച്ചിരിക്കുന്ന ഡെലിഗേറ്റ് സെല്‍ മുഖേന ഓഫ്‌ലൈനായും രജിസ്‌ട്രേഷന്‍ നടത്താം.