ആലപ്പുഴ എസി റോഡില്‍ വാഹനാപകടത്തില്‍ യുവാവ് മരിച്ചു. മണ്ണഞ്ചേരിയില്‍ വലിയ കലവൂര്‍ ഗോകുലം വീട്ടില്‍ പരേതരായ കൃഷ്ണന്‍കുട്ടിയുടെയും ശാരദയുടെയും മകന്‍ ഗോകുല്‍ കൃഷ്ണനാണ് (44) മരിച്ചത്. തിങ്കളാഴ്ച വൈകിട്ട് ആറരയോടെ എസി റോഡില്‍ മങ്കൊമ്പ് മേല്‍പാലത്തിലാണ് അപകടം. ആലപ്പുഴ ഭാഗത്തേക്കു പോകുകയായിരുന്ന ബൈക്ക്, സ്‌കൂട്ടറില്‍ തട്ടി നിയന്ത്രണം തെറ്റി കെഎസ്ആര്‍ടിസി ബസിനടിയിലേക്കു പോകുകയായിരുന്നുവെന്ന് പൊലീസ് പറഞ്ഞു. തലയ്ക്കു ഗുരുതര പരുക്കേറ്റ ഗോകുലിനെ പുളിങ്കുന്ന് പൊലീസിന്റെ നേത്യത്വത്തില്‍ ആലപ്പുഴ മെഡിക്കല്‍ കോളജ് ആശുപത്രിയിലെത്തിച്ചെങ്കിലും മരിച്ചു. മൃതദേഹം ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്നു. ഭാര്യ: സുനിത. മക്കള്‍: ഹരികൃഷ്ണന്‍, ഹൃദയ്.