2025-26 സാമ്പത്തിക വര്‍ഷത്തില്‍ തമിഴ്‌നാട് മുഖ്യമന്ത്രി വിജയ്‌യുടെ ടിവികെ പാര്‍ട്ടിയ്ക്ക് ലഭിച്ച സംഭാവനയുടെ കണക്കുകള്‍ പുറത്ത്. നാല് പേരില്‍ നിന്ന് ആകെ 13.3 കോടി രൂപയാണ് ടിവികെയ്ക്ക് ലഭിച്ചത്. മന്ത്രിമാരായ അധവ് അര്‍ജുന, ആര്‍വി രഞ്ജിത്ത് കുമാര്‍ എന്നിവരാണ് സംഭാവനയുടെ 99 ശതമാനവും വഹിച്ചത്. തിരഞ്ഞെടുപ്പ് കമ്മിഷന് ടിവികെ നല്‍കിയ കണക്കുകളിലാണ് ഇക്കാര്യം വ്യക്തമാക്കുന്നത്.

സംസ്ഥാന കായികപൊതുമരാമത്ത് വകുപ്പ് മന്ത്രി അര്‍ജുന 8.2 കോടി രൂപയും വനംവകുപ്പ് മന്ത്രി ആര്‍.വി രഞ്ജിത്ത് കുമാര്‍ അഞ്ച് കോടി രൂപയുമാണ് സംഭാവനയായി നല്‍കിയത്. ആ സാമ്പത്തിക വര്‍ഷത്തില്‍ പാര്‍ട്ടിക്ക് ഏറ്റവും കൂടുതല്‍ സംഭാവന നല്‍കിയത് മന്ത്രി അര്‍ജുനയാണ്. ആകെ സംഭാവനകളുടെ 60 ശതമാനത്തിലധികവും അദ്ദേഹത്തിന്റേതാണ്. മന്ത്രിമാരെ കൂടാതെ രണ്ട് സംഭാവനകലാണ് പാര്‍ട്ടിക്ക് ലഭിച്ചത്. അഞ്ച് ലക്ഷം വീതമുള്ള രണ്ട് സംഭാവനകളായിരുന്നു അത്.

തൂത്തുക്കുടിയിലെ ലയണ്‍സ് ടൗണില്‍ സ്ഥിതി ചെയ്യുന്ന 'സ്‌നോ ഷോ' ഡിമാന്‍ഡ് ഡ്രാഫ്റ്റ് മുഖേനയാണ് സംഭാവന നല്‍കിയത്. അതേ വിലാസത്തില്‍ രജിസ്റ്റര്‍ ചെയ്തിട്ടുള്ള 'സ്‌നോ എക്‌സ്‌പോര്‍ട്‌സ് ആന്‍ഡ് ഇംപോര്‍ട്‌സ്' എന്ന സ്ഥാപനവും ഡിമാന്‍ഡ് ഡ്രാഫ്റ്റ് വഴി അഞ്ച് ലക്ഷം രൂപ സംഭാവനയായി നല്‍കി.

അതേസമയം, 2025-26 സാമ്പത്തിക വര്‍ഷത്തില്‍ ഏകദേശം 161.35 കോടി രൂപയുടെ സംഭാവനകള്‍ ലഭിച്ചതായി എഐഎഡിഎംകെ അറിയിച്ചുവെന്ന് തിരഞ്ഞെടുപ്പ് കമ്മിഷന് നല്‍കിയ കണക്കുകള്‍ വ്യക്തമാക്കുന്നു. 135 കോടി രൂപ സംഭാവന നല്‍കിയ ടൈഗര്‍ അസോസിയേറ്റ്‌സ് ആണ് ഏറ്റവും വലിയ തുക നല്‍കിയത്.