പാങ്ങപ്പാറയിൽ കൊല ചെയ്യപ്പെട്ട അഭിരാമും സുഹൃത്തുക്കളും മുൻപും പാങ്ങപ്പാറ കമുകി‍ൻകോട് ക്ഷേത്രത്തിനു സമീപത്ത് എത്തിയിട്ടുണ്ടെന്ന് നാട്ടുകാർ. ഞായറാഴ്ച വൈകിട്ട് നാലിനും അഭിരാമും സുഹൃത്തുക്കളും ഇവിടെ എത്തിയെന്ന് നാട്ടുകാർ സംശയം പ്രകടിപ്പിച്ചു. പ്രധാന റോഡിൽ നിന്ന് മീറ്ററുകൾ മാറിയാൽ ആരുടെയും ശ്രദ്ധ പതിയാത്ത സ്ഥലത്താണ് അഭിരാമിന്റെ മൃതദേഹം കണ്ടെത്തിയത്. കസ്റ്റഡിയിലുള്ള പതിനേഴുകാരനുമായി പൊലീസ് ഇവിടെ എത്തിയപ്പോഴാണ് നാട്ടുകാർ വിവരം അറിയുന്നത്.

അറസ്റ്റിലായ പ്രതികളെ ശ്രീകാര്യം പൊലീസ് സ്റ്റേഷനിൽ എത്തിച്ചപ്പോൾ പൊലീസിനോട് കയർക്കുന്ന ആൾക്കൂട്ടം.
അഭിരാമിന്റെ ബന്ധുക്കളും സുഹൃത്തുക്കളും ചേർന്ന് പൊലീസ് ജീപ്പ് തടഞ്ഞു; സഹായി മോഷണക്കേസുകളിൽ പ്രതി
തിരുവനന്തപുരം ∙ അഭിരാം കൊല്ലപ്പെട്ട കേസിൽ പിടിയിലായ പതിനേഴുകാരനെ മൃതദേഹം കണ്ടെത്തിയ സ്ഥലത്തേക്കു കൊണ്ടുവരുന്നതിനിടെ ശ്രീകാര്യം പൊലീസ് സ്റ്റേഷനു മുന്നിൽ നാടകീയ സംഭവങ്ങൾ. അഭിരാമിനെ കാണാനില്ലെന്നു പരാതി നൽകിയപ്പോൾ കാര്യമായ തിരച്ചിൽ നടത്തിയില്ലെന്ന് ആരോപിച്ച് ബന്ധുക്കളും സുഹൃത്തുക്കളും ചേർന്ന് പൊലീസ് ജീപ്പ് തടഞ്ഞു. പൊലീസ് ലാത്തിവീശി ആൾക്കാരെ വിരട്ടിയോടിച്ച ശേഷമാണു കസ്റ്റഡിയിലുള്ളയാളെ കൊണ്ടുപോയത്.

അഭിരാമിന്റെ മൃതദേഹം ചാക്കിൽ കെട്ടിയ നിലയിൽ പാങ്ങപ്പാറ കമുകി‍ൻകോട് ക്ഷേത്രത്തിനു സമീപത്തെ ഒഴിഞ്ഞ പറമ്പിൽനിന്നു കണ്ടെടുത്തതു മുതൽ ശ്രീകാര്യം പൊലീസ് സ്റ്റേഷൻ പരിസരം സംഘർഷാവസ്ഥയിലായിരുന്നു. അഭിരാമിനെ കാണാനില്ലെന്നു ചൂണ്ടിക്കാട്ടി പിതാവ് മധുകുമാർ പരാതി നൽകിയെങ്കിലും പൊലീസ് കാര്യമായി തിരച്ചിൽ നടത്തിയില്ലെന്നായിരുന്നു ആരോപണം. ഇതു ചോദ്യംചെയ്തപ്പോൾ ‘എന്നാൽ നിങ്ങൾ പോയി അന്വേഷിക്കൂ...’ എന്ന് ഒരു പൊലീസ് ഉദ്യോഗസ്ഥൻ പറഞ്ഞതായും ബന്ധുക്കൾ ആരോപിച്ചു. ഇതാണു പ്രതിഷേധത്തിനു കാരണം. ഇപ്പോൾ അറസ്റ്റിലായ പ്രതിയെ ചോദ്യംചെയ്യലിനു വേണ്ടി ആദ്യം സ്റ്റേഷനിൽ വിളിച്ചുവരുത്തിയ ശേഷം പൊലീസ് വിട്ടയച്ചെന്നും ബന്ധുക്കൾ ആരോപിച്ചു. സഹായിയായി എത്തിയ ഉമർ മോഷണമടക്കം ഒട്ടേറെ കേസുകളിൽ പ്രതിയാണെന്നും പൊലീസ് അറിയിച്ചു.

പ്രതിയെ രാത്രി എട്ടരയോടെ സ്റ്റേഷനു പുറത്തിറക്കാൻ ശ്രമിച്ചെങ്കിലും പ്രതിഷേധം കാരണം നടന്നില്ല. ഒൻപതരയോടെ കൂടുതൽ പൊലീസ് എത്തി. സിറ്റി പൊലീസ് കമ്മിഷണർ അരുൾ ആർ.ബി.കൃഷ്ണയും സ്ഥലത്തെത്തി. ശക്തമായ പൊലീസ് കാവൽ ഉണ്ടായിരുന്നെങ്കിലും പ്രതിയുമായി ജീപ്പ് മുന്നോട്ടെടുക്കാനായില്ല. ഒടുവിൽ, ലാത്തിവീശി പ്രതിഷേധക്കാരെ വിരട്ടിയോടിച്ച ശേഷമാണു പ്രതിയുമായി പൊലീസ് കൃത്യം നടത്തിയ സ്ഥലത്തേക്കു തിരിച്ചത്. വി.മുരളീധരൻ എംഎൽഎ, കടകംപള്ളി സുരേന്ദ്രൻ എന്നിവർ പൊലീസ് സ്റ്റേഷനിലെത്തി പൊലീസ് ഉദ്യോഗസ്ഥരുമായി സ്ഥിതിഗതി വിലയിരുത്തി. എന്നാൽ, പരാതി ലഭിച്ചയുടൻ സിസിടിവി ദൃശ്യങ്ങൾ പരിശോധിച്ചെന്നും അഭിരാമിന്റെ മൊബൈൽ ഫോൺ ടവർ ലൊക്കേഷൻ മനസ്സിലാക്കാൻ ശ്രമം തുടങ്ങിയെന്നും ശ്രീകാര്യം പൊലീസ് അറിയിച്ചു.

അക്രമത്തിലേക്കു നയിച്ചത് പെൺസുഹൃത്തിനെച്ചൊല്ലിയുള്ള തർക്കമെന്നു സൂചന
തിരുവനന്തപുരം ∙ അച്ഛനും മുത്തശ്ശിക്കും ഒപ്പമാണ് അഭിരാമിന്റെ താമസം. അമ്മയും സഹോദരിയും വിദേശത്താണു ജോലി ചെയ്യുന്നത്. അഭിരാമും പെൺസുഹൃത്തും തമ്മിൽ സമൂഹമാധ്യമത്തിലൂടെ നടത്തുന്ന ചാറ്റുകൾ പെൺകുട്ടിയുടെ സുഹൃത്തായ പതിനേഴുകാരനും കാണാറുണ്ടെന്നും ഇയാളുടെ ഫോണിലും ഈ അക്കൗണ്ട് ഉപയോഗിക്കുന്നുണ്ടെന്നുമാണു വിവരം. പെൺസുഹൃത്തിന്റേതെന്ന രീതിയിൽ അഭിരാമിനു ലഭിച്ച സന്ദേശങ്ങൾ പ്രതിയാണ് അയച്ചതെന്നുമാണ് സൂചന.