ബംഗാൾ ഉൾക്കടലിൽ രൂപംകൊണ്ട തീവ്രചുഴലിക്കാറ്റ് മുറസു ആന്ധ്രാപ്രദേശ് തീരത്ത് കരതൊട്ടു. ഇന്ന് പുലർച്ചെ 3.30നും 5.30നും ഇടയിൽ പ്രകാശം ജില്ലയിലെ ഓങ്കോളിന് സമീപമാണ് ചുഴലിക്കാറ്റ് തീരം കടന്നത്. നെല്ലൂരിനും നർസാപൂരിനും ഇടയിലായിരുന്നു കരയിലേക്കുള്ള പ്രവേശനം. മണിക്കൂറിൽ 100 മുതൽ 110 കിലോമീറ്റർ വരെ വേഗതയിൽ വീശിയ കാറ്റിന്റെ ശക്തി ചില സമയങ്ങളിൽ 120 കിലോമീറ്റർ വരെയെത്തി. ശക്തമായ മഴയും കാറ്റും ആന്ധ്രയുടെ തീരമേഖലകളിൽ വലിയ ആശങ്ക സൃഷ്ടിച്ചിട്ടുണ്ട്.

ചുഴലിക്കാറ്റിന്റെ പശ്ചാത്തലത്തിൽ ആന്ധ്രാപ്രദേശിൽ അതീവ ജാഗ്രതാ നിർദേശം പുറപ്പെടുവിച്ചു. 19 വിമാന സർവീസുകളും 15 ട്രെയിൻ സർവീസുകളും റദ്ദാക്കിയിട്ടുണ്ട്. തമിഴ്‌നാട്ടിലും പുതുച്ചേരിയിലും മുറസുവിന്റെ സ്വാധീനത്തിൽ ശക്തമായ മഴ തുടരുകയാണ്. താഴ്ന്ന പ്രദേശങ്ങളിൽ വെള്ളം കയറാനുള്ള സാധ്യതയും കാലാവസ്ഥാ വകുപ്പ് മുന്നറിയിപ്പ് നൽകിയിരുന്നു. രക്ഷാപ്രവർത്തനങ്ങൾക്കും അടിയന്തര സാഹചര്യങ്ങൾ നേരിടുന്നതിനുമുള്ള മുന്നൊരുക്കങ്ങളും അധികൃതർ ശക്തമാക്കിയിട്ടുണ്ട്.

അതേസമയം കേരളത്തിലും മഴ മുന്നറിയിപ്പുണ്ട്. തെക്കൻ കേരളത്തിന് മുകളിലായി ചക്രവാതച്ചുഴി നിലനിൽക്കുന്നതും മധ്യകിഴക്കൻ അറബിക്കടലിലെ മറ്റൊരു ചക്രവാതച്ചുഴിയും സംസ്ഥാനത്തെ കാലാവസ്ഥയെ സ്വാധീനിക്കുന്നുണ്ട്. നവംബർ ആറുവരെ ഒറ്റപ്പെട്ട സ്ഥലങ്ങളിൽ ഇടിമിന്നലോടുകൂടിയ ശക്തമായ മഴയ്ക്കും മണിക്കൂറിൽ 30 മുതൽ 40 കിലോമീറ്റർ വരെ വേഗതയിൽ കാറ്റിനും സാധ്യതയുണ്ടെന്നാണ് മുന്നറിയിപ്പ്. ഇന്ന് മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ യെല്ലോ അലർട്ടും പ്രഖ്യാപിച്ചിട്ടുണ്ട്. അതിനാൽ മഴയും ശക്തമായ കാറ്റും ഉണ്ടാകുന്ന സാഹചര്യങ്ങളിൽ പൊതുജനങ്ങൾ ജാഗ്രത പാലിക്കണം.