പശ്ചിമേഷ്യയിൽ വീണ്ടും യുദ്ധഭീതി ശക്തമാകുന്നു. ഇറാന്റെ തന്ത്രപ്രധാനമായ ഖേഷം ദ്വീപിൽ അമേരിക്ക സൈനികാക്രമണം നടത്തിയതായി റിപ്പോർട്ടുകൾ. ഹോർമുസ് കടലിടുക്കിനോട് ചേർന്നുള്ള ഖേഷം ദ്വീപിൽ നിരവധി സ്ഫോടനങ്ങൾ ഉണ്ടായതായി ഇറാൻ ഔദ്യോഗിക മാധ്യമങ്ങളും റിപ്പോർട്ട് ചെയ്തു. അമേരിക്കൻ ഉദ്യോഗസ്ഥരെ ഉദ്ധരിച്ച് വാൾസ്ട്രീറ്റ് ജേണലാണ് ആക്രമണവാർത്ത പുറത്തുവിട്ടത്. സമീപകാലത്ത് അമേരിക്ക ഇറാനെതിരെ നടത്തിയ പരിമിതമായ സൈനിക നീക്കങ്ങളുടെ തുടർച്ചയാണ് ഇതെന്നും റിപ്പോർട്ടുകളുണ്ട്.

അമേരിക്കൻ സൈനിക കേന്ദ്രങ്ങൾക്കും ആസ്തികൾക്കും നേരെ ഇറാൻ ഉപരിതലത്തിൽനിന്ന് ആകാശത്തേക്ക് തൊടുക്കുന്ന മിസൈലുകൾ ഉപയോഗിച്ച് ഭീഷണി ഉയർത്തിയ സാഹചര്യത്തിലാണ് പ്രതിരോധ നടപടിയായി ആക്രമണം നടത്തിയതെന്നാണ് അമേരിക്കൻ ഉദ്യോഗസ്ഥരുടെ വിശദീകരണം. വാണിജ്യ കപ്പലുകൾക്ക് നേരെയുള്ള ഇറാന്റെ ഭീഷണി തടയുകയെന്ന ലക്ഷ്യവും ഈ നീക്കത്തിനുണ്ടായിരുന്നുവെന്നാണ് റിപ്പോർട്ടുകൾ. എന്നാൽ ആക്രമണത്തിൽ എത്രത്തോളം നാശനഷ്ടമുണ്ടായി, ആളപായമുണ്ടായോ തുടങ്ങിയ കാര്യങ്ങളിൽ വ്യക്തമായ ഔദ്യോഗിക വിവരങ്ങൾ പുറത്തുവന്നിട്ടില്ല.

ഇതിനിടെ, ഇറാനുമായി നയതന്ത്ര ചർച്ചകൾ തുടരുകയാണെന്നും ഒരു ധാരണയിലെത്താൻ സാധ്യതയുണ്ടെന്നും അമേരിക്കൻ പ്രസിഡന്റ് ഡൊണാൾഡ് ട്രംപ് സൂചിപ്പിച്ചിരുന്നു. അത്തരമൊരു സാഹചര്യത്തിൽ ഖേഷം ദ്വീപിലെ സൈനിക നീക്കം മേഖലയിൽ പുതിയ ആശങ്കകൾക്ക് വഴിവെച്ചിരിക്കുകയാണ്. ലോകത്തെ എണ്ണവിതരണത്തിന്റെ പ്രധാന പാതയായ ഹോർമുസ് കടലിടുക്കിലെ സംഘർഷം ആഗോള എണ്ണവിലയെയും വ്യാപാരത്തെയും ബാധിക്കുമെന്ന ആശങ്കയും ഉയരുന്നു. ആക്രമണം വലിയ യുദ്ധത്തിലേക്കുള്ള തിരിച്ചുപോക്കാണോ അതോ പരിമിതമായ പ്രതിരോധ നടപടിയാണോ എന്നതാണ് ഇനി ലോകം ഉറ്റുനോക്കുന്നത്.