കോഴിക്കോട് ബീച്ചിൽ കടലിൽ നീന്തുന്നത് വിലക്കിയതിനെച്ചൊല്ലിയുള്ള തർക്കം കൈയാങ്കളിയിൽ കലാശിച്ചു. ടൂറിസം വകുപ്പിന്റെ ലൈഫ് ഗാർഡുമാരായ രണ്ടുപേർക്കാണ് മർദ്ദനമേറ്റത്. കർണാടക സ്വദേശികളായ പതിനഞ്ചോളം പേരടങ്ങുന്ന സംഘമാണ് ലൈഫ് ഗാർഡുമാരായ ഹാഷിലിനെയും റോഷിത്തിനെയും ആക്രമിച്ചത്.

ഇന്ന് വൈകിട്ട് അഞ്ചുമണിയോടെയായിരുന്നു സംഭവം. കടലിൽ നീന്തുന്നത് സുരക്ഷാ കാരണങ്ങളാൽ ലൈഫ് ഗാർഡുമാർ വിലക്കിയതാണ് സംഘത്തെ പ്രകോപിപ്പിച്ചത്. ഇതേത്തുടർന്ന് ഇരുവരുമായി വാക്കുതർക്കമുണ്ടാകുകയും പിന്നീട് മർദ്ദനത്തിൽ കലാശിക്കുകയുമായിരുന്നു.

ആക്രമണത്തിൽ പരിക്കേറ്റ ഹാഷിലും റോഷിത്തും ചികിത്സ തേടി. സംഭവവുമായി ബന്ധപ്പെട്ട് സംഘത്തിലുണ്ടായിരുന്ന സ്ത്രീകളെയും മൂന്ന് പുരുഷന്മാരെയും വെള്ളയിൽ പൊലീസ് കസ്റ്റഡിയിലെടുത്തു. മറ്റുള്ളവർ സ്ഥലത്തുനിന്ന് ഓടി രക്ഷപ്പെട്ടു. സംഭവത്തിൽ പൊലീസ് തുടർനടപടികൾ സ്വീകരിച്ചുവരികയാണ്.