വനത്തിൽ പ്ലാസ്റ്റിക് ഉപേക്ഷിക്കുന്നവരിൽ നിന്ന് 2000 രൂപ പിഴയീടാക്കും. ഡിസംബർ ഒന്നുമുതൽ ഇത് നടപ്പാക്കും. ബീറ്റ് ഫോറസ്റ്റ് ഓഫീസർ റാങ്കിലോ അതിനുമുകളിലോ ഉള്ള ഉദ്യോഗസ്ഥർക്ക് പിഴ ചുമത്താവുന്നതാണ്. പിഴയടയ്ക്കാത്തവരുടെ പേരിൽ വന്യജീവി സംരക്ഷണ നിയമപ്രകാരം കേസെടുക്കുന്നതാണ്.

ദേശീയോദ്യാനം, വന്യജീവിസങ്കേതം, കമ്യൂണിറ്റി റിസർവ് ഉൾപ്പെടെയുള്ള സംരക്ഷിതപ്രദേശങ്ങളിൽ പ്ലാസ്റ്റിക്കും മണ്ണിൽ ലയിക്കാത്ത മാലിന്യവും വലിച്ചെറിയുന്നവർക്കെതിരെയാണ് നടപടിയെടുക്കുന്നത്.

സന്ദർശകർ ഉപേക്ഷിക്കുന്ന ആഹാരാവശിഷ്ടത്തോടുകൂടിയ പ്ലാസ്റ്റിക് കവറുകളും പാത്രങ്ങളും കഴിക്കുന്നത് വന്യമൃഗങ്ങളുടെയും പക്ഷികളുടെയും ജീവന് ഭീഷണിയാകുന്നുണ്ട്. പ്ലാസ്റ്റിക് മാലിന്യം ആവാസവ്യവസ്ഥയെയും അപകടത്തിലാക്കുന്നുണ്ട്. ഈ പശ്ചാത്തലത്തിലാണ് നടപടി കടുപ്പിച്ചിരിക്കുന്നത്.

സന്ദർശകർക്കു പുറമേ വനത്തിനുള്ളിലെ ജനവാസമേഖലയിലേക്കും മറ്റാവശ്യങ്ങൾക്കും സംരക്ഷിതപ്രദേശങ്ങളിലൂടെ യാത്രചെയ്യുന്നവർക്കും നിയമം ബാധകമായിരിക്കും. പിഴത്തുക സംരക്ഷിത പ്രദേശം ശുചിയാക്കാനായി മാത്രമേ ഉപയോഗിക്കുകയുള്ളൂ. സംരക്ഷിതപ്രദേശങ്ങളിൽ ഹരിതചട്ടം നടപ്പാക്കുന്നതിനായി വനംവകുപ്പ് ഉദ്യോഗസ്ഥർ, വിഎസ്എസ്-ഇഡിസി പ്രതിനിധികൾ, തദ്ദേശസ്ഥാപന പ്രതിനിധികൾ എന്നിവരുൾപ്പെടുന്ന സമിതി രൂപവത്കരിക്കുന്നതാണ്.