തിരുവനന്തപുരം കോര്‍പ്പറേഷന്‍ മുന്‍ മേയറും സിപിഎം ജില്ലാ കമ്മിറ്റി അംഗവുമായ ആര്യ രാജേന്ദ്രന്‍ തന്റെ പ്രവര്‍ത്തന മണ്ഡലം തലസ്ഥാനത്തു നിന്നും കോഴിക്കോട്ടേക്ക് മാറ്റുന്നു. കോഴിക്കോട് ജില്ല കേന്ദ്രീകരിച്ച് പ്രവര്‍ത്തിക്കാന്‍ അനുമതി തേടി ആര്യ നല്‍കിയ അപേക്ഷ സിപിഎം തിരുവനന്തപുരം ജില്ലാ കമ്മിറ്റി അംഗീകരിച്ച് സംസ്ഥാന സെന്ററിന് കൈമാറി. വ്യക്തിപരമായ കാരണങ്ങള്‍ ചൂണ്ടിക്കാട്ടിയാണ് പ്രവര്‍ത്തന മണ്ഡലം മാറ്റാന്‍ ആര്യ പാര്‍ട്ടിക്ക് കത്ത് നല്‍കിയത്. വിഷയം പരിഗണിച്ച തിരുവനന്തപുരം ജില്ലാ കമ്മിറ്റി അപേക്ഷ അംഗീകരിക്കുകയും തുടര്‍ന്നുള്ള തീരുമാനത്തിനായി സംസ്ഥാന കമ്മിറ്റിയുടെ പരിഗണനയ്ക്ക് അയക്കുകയുമായിരുന്നു. പാര്‍ട്ടി സംസ്ഥാന നേതൃത്വത്തിന്റെ പച്ചക്കൊടി ലഭിക്കുന്നതോടെ ആര്യയുടെ ഭാവി രാഷ്ട്രീയ പ്രവര്‍ത്തനം പൂര്‍ണ്ണമായും കോഴിക്കോട് കേന്ദ്രീകരിച്ചായിരിക്കും.

ഡിവൈഎഫ്‌ഐ സംസ്ഥാന സെക്രട്ടേറിയറ്റ് അംഗം കൂടിയായ ആര്യ രാജേന്ദ്രന്റെ പങ്കാളിയും മുന്‍ ബാലുശ്ശേരി എംഎല്‍എയുമായ സച്ചിന്‍ ദേവ് കോഴിക്കോട് സ്വദേശിയാണ്. വിവാഹശേഷം കുടുംബമായി പൂര്‍ണ്ണമായും കോഴിക്കോട്ടേക്ക് താമസം മാറ്റുമെന്ന കാര്യം ആര്യ നേരത്തെ തന്നെ പാര്‍ട്ടി നേതാക്കളെയും സുഹൃത്തുക്കളെയും അറിയിച്ചിരുന്നു. ഇതിന്റെ ഭാഗമായി കോഴിക്കോട് ടൗണില്‍ ഇരുവരും വീടെടുത്ത് താമസമാക്കിയതായും വിവരമുണ്ട്. ഡിവൈഎഫ്‌ഐ സംസ്ഥാന ഭാരവാഹി എന്ന നിലയില്‍ കോഴിക്കോട് ഉള്‍പ്പെടെയുള്ള മലബാര്‍ മേഖലകളിലെ സംഘടനാ പരിപാടികളില്‍ ആര്യ മുന്‍പും സജീവമായിരുന്നു.

രാജ്യത്തെ ഏറ്റവും പ്രായം കുറഞ്ഞ മേയര്‍ എന്ന അപൂര്‍വ്വ ഖ്യാതിയോടെ 21-ാം വയസ്സിലാണ് ആര്യ രാജേന്ദ്രന്‍ തിരുവനന്തപുരം കോര്‍പ്പറേഷന്റെ ഭരണം ഏറ്റെടുത്തത്. അതിനുശേഷം 2022 സെപ്റ്റംബറിലായിരുന്നു സച്ചിന്‍ ദേവുമായുള്ള വിവാഹം. 2025-ല്‍ നടന്ന തദ്ദേശ സ്വയംഭരണ തിരഞ്ഞെടുപ്പില്‍ ആര്യ മത്സരിച്ചിരുന്നില്ല. ഈ തിരഞ്ഞെടുപ്പില്‍ തിരുവനന്തപുരം കോര്‍പ്പറേഷന്‍ ഭരണം എല്‍ഡിഎഫിന് കനത്ത തിരിച്ചടിയോടെ നഷ്ടപ്പെടുകയും ചെയ്തിരുന്നു. തോല്‍വിക്ക് പിന്നാലെ വിമര്‍ശനങ്ങള്‍ ഉയര്‍ന്നതോടെ ആര്യ കുറച്ചുകാലം സജീവ രാഷ്ട്രീയ പ്രവര്‍ത്തനത്തില്‍ നിന്ന് മാറിനില്‍ക്കുകയും ചെയ്തിരുന്നു. തുടര്‍ന്ന് ഡിവൈഎഫ്‌ഐ തിരുവനന്തപുരം ജില്ലാ പ്രസിഡന്റ് സ്ഥാനത്തേക്ക് ആര്യയുടെ പേര് പരിഗണിക്കപ്പെട്ടിരുന്നെങ്കിലും വി.എസ്. ശ്യാമയെയാണ് ആ പദവിയിലേക്ക് തിരഞ്ഞെടുത്തത്. അഞ്ച് വര്‍ഷത്തെ മേയര്‍ കാലാവധി പൂര്‍ത്തിയാക്കിയ ശേഷമാണ് ഇപ്പോള്‍ ആര്യ തലസ്ഥാന നഗരിയോട് വിടപറഞ്ഞ് മലബാറിന്റെ രാഷ്ട്രീയ തട്ടകത്തിലേക്ക് ചേക്കേറുന്നത്.