അമേരിക്കയിലെ ഫ്ലോറിഡയില്‍ ഉപേക്ഷിക്കപ്പെട്ട ഒരു കോണ്‍ക്രീറ്റ് പൈപ്പിനുള്ളില്‍ താവളമടിച്ച് 96 മുട്ടകള്‍ ഇട്ട് സംരക്ഷിച്ച കൂറ്റന്‍ ബര്‍മീസ് പെരുമ്പാമ്പിന്റെ ശാസ്ത്രീയ നിരീക്ഷണം ലോകശ്രദ്ധ നേടുന്നു. 73.6 കിലോഗ്രാം ഭാരമുള്ള ഈ ഭീമന്‍ പാമ്പ്, സ്വന്തം ശരീരത്തിലെ പേശികള്‍ ചലിപ്പിച്ച് ഉണ്ടാക്കുന്ന ചൂടിലൂടെയാണ് മുട്ടകള്‍ വിരിയിക്കാന്‍ ആവശ്യമായ താപനില നിലനിര്‍ത്തിയത്. 'ഇക്കോസ്ഫിയര്‍' എന്ന ശാസ്ത്ര മാസികയിലാണ് ഇത് സംബന്ധിച്ച അപൂര്‍വ പഠന റിപ്പോര്‍ട്ട് പ്രസിദ്ധീകരിച്ചത്.മനുഷ്യർ മാറ്റം വരുത്തിയ പരിതസ്ഥിതികളിൽ ആക്രമണകാരികളായ പാമ്പുകൾ എങ്ങനെ പുനരുൽപ്പാദിപ്പിക്കുകയും അതിജീവിക്കുകയും ചെയ്യുന്നു

എന്നതിനെക്കുറിച്ചുള്ള പുതിയ വിശദാംശങ്ങൾ വെളിപ്പെടുത്തുന്നു.ഫ്ലോറിഡയിലെ 'ഗ്രേറ്റര്‍ എവര്‍ഗ്ലേഡ്സ്' പരിസ്ഥിതി മേഖലയിലാണ് ഈ സംഭവം ഗവേഷകര്‍ രേഖപ്പെടുത്തിയത്. അധിനിവേശ ജീവിവര്‍ഗത്തില്‍പ്പെട്ട ബര്‍മീസ് പെരുമ്പാമ്പുകള്‍ മനുഷ്യനിര്‍മ്മിത നിര്‍മ്മിതികള്‍ താവളമാക്കുന്നത് ഇത് രണ്ടാം തവണ മാത്രമാണ് ശാസ്ത്രലോകം കാണുന്നത്. മുന്‍പ് രേഖപ്പെടുത്തിയ സംഭവത്തിലും കോണ്‍ക്രീറ്റ് പൈപ്പുകള്‍ തന്നെയാണ് പാമ്പ് മുട്ടയിടാനായി തിരഞ്ഞെടുത്തത്.

പാമ്പിന്റെ ഇന്‍കുബേഷന്‍ സ്വഭാവം സൂക്ഷ്മമായി മനസ്സിലാക്കാന്‍ ഗവേഷകസംഘം 2022 ജൂണ്‍ ഒന്നിന് പൈപ്പിന് ചുറ്റും വൈല്‍ഡ് ലൈഫ് ക്യാമറകളും താപനില രേഖപ്പെടുത്തുന്ന ഡാറ്റാ ലോഗറുകളും സ്ഥാപിച്ചിരുന്നു.പാമ്പ് നിരന്തരം ചുരുളുകള്‍ ക്രമീകരിക്കുകയും പേശികള്‍ കുലുക്കി ചൂട് ഉത്പാദിപ്പിക്കുകയും ചെയ്യുന്നത് ഈ ക്യാമറകളില്‍ വ്യക്തമായി പതിഞ്ഞു.മുട്ടകള്‍ക്ക് ചുറ്റും പാമ്പ് നിരന്തരം ചുരുണ്ടിരുന്ന് നല്‍കിയ സംരക്ഷണം മൂലം, ചുറ്റുപാടിലെ താപനിലയേക്കാള്‍ 5 ഡിഗ്രി സെല്‍ഷ്യസിലധികം ഉയര്‍ന്ന ചൂട് കൂടിനുള്ളില്‍ നിലനിര്‍ത്താന്‍ സാധിച്ചു.

അന്തരീക്ഷ താപനില 27.7 ഡിഗ്രി സെല്‍ഷ്യസ് ആയിരുന്ന സമയത്ത്, കോണ്‍ക്രീറ്റ് പൈപ്പിനുള്ളിലെ മുട്ടക്കൂട്ടില്‍ 33 ഡിഗ്രി സെല്‍ഷ്യസ് താപനില രേഖപ്പെടുത്താന്‍ ഗവേഷകര്‍ക്കായി. പാമ്പിന്റെ സാന്നിധ്യം അറിയാതെ ഉപേക്ഷിക്കപ്പെട്ട പൈപ്പിനുള്ളിലേക്ക് കയറിയ 'വെര്‍ജീനിയ ഒപ്പോസം' ഇനത്തില്‍പ്പെട്ട ചെറിയ ജീവികള്‍, ഭീമന്‍ പെരുമ്പാമ്പിനെ കണ്ട് ഭയന്ന് ജീവനും കൊണ്ട് ഓടി രക്ഷപ്പെടുന്ന ദൃശ്യങ്ങളും വൈല്‍ഡ് ലൈഫ് ക്യാമറകളില്‍ പതിഞ്ഞിട്ടുണ്ട്.