അച്ഛനമ്മമാരെ ഉപേക്ഷിക്കുകയോ ഇറക്കിവിടുകയോ ചെയ്യുന്നവർക്കെതിരെ നിയമനടപടികൾ സ്വീകരിക്കും...മുതിർന്ന പൗരന്മാരുടെ സംരക്ഷണം ഒരു സാമൂഹിക സംസ്‌കാരമായി വളർത്തിയെടുക്കണമെന്ന് മുഖ്യമന്ത്രി വി ഡി സതീശൻ. എൻജിഒകളും മറ്റ് ഏജൻസികളും ഇതിനായി കൈകോർക്കണമെന്നും മുഖ്യമന്ത്രി.

മുഖ്യമന്ത്രിയുടെ കോൺഫറൻസ് ഹാളിൽ മുതിർന്ന പൗരന്മാരുടെ ക്ഷേമവുമായി ബന്ധപ്പെട്ട സ്ഥാപനങ്ങളുമായുള്ള ധാരണാപത്രം ഒപ്പിടൽ ചടങ്ങിൽ സംസാരിക്കുകയായിരുന്നു അദ്ദേഹം.
ഡിപ്പാർട്ട്‌മെന്റ് ഓഫ് സീനിയർ സിറ്റിസണുമായി 12 സ്ഥാപനങ്ങളാണ് ധാരണാപത്രം ഒപ്പുവച്ചത്. മുതിർന്ന പൗരന്മാരുടെ സംരക്ഷണം ഉറപ്പാക്കാൻ തദ്ദേശ സ്വയംഭരണ സ്ഥാപനങ്ങളെയും എൻജിഒകളെയും ഏകോപിപ്പിച്ച് സമഗ്രമായ പദ്ധതികൾ നടപ്പിലാക്കുമെന്ന് മുഖ്യമന്ത്രി . ഓരോ പഞ്ചായത്തിലും പരിചരണം ആവശ്യമുള്ള മുതിർന്ന പൗരന്മാർ, അവരുടെ മാനസികാരോഗ്യം, രോഗബാധിതരുടെ വിവരങ്ങൾ എന്നിവ അടങ്ങിയ കൃത്യമായ ഡാറ്റ ശേഖരിക്കും. ഈ വിവരങ്ങൾ കാലാനുസൃതമായി പുതുക്കിക്കൊണ്ടിരിക്കുകയും ചെയ്യും. കൃത്യമായ ഡാറ്റ ലഭ്യമാകുന്നതോടെ പുതിയ ക്ഷേമപദ്ധതികൾ എളുപ്പത്തിൽ ആസൂത്രണം ചെയ്യാൻ കഴിയും.

മുതിർന്ന പൗരന്മാർക്ക് പരിചരണം ഫലപ്രദമായി നടപ്പിലാക്കാനുള്ള 'കെയർ ഗീവേഴ്‌സ്' കോഴ്‌സിനായി സിലബസ് ചിട്ടപ്പെടുത്തുകയാണ്. ജർമ്മനി, യുകെ, ഓസ്ട്രേലിയ തുടങ്ങിയ രാജ്യങ്ങളിലെ സിലബസുകൾ പഠിച്ച് കേരളത്തിന്റെ സാഹചര്യത്തിന് അനുയോജ്യമായാണ് തയ്യാറാക്കുന്നത്. നഴ്സിങ്ങിന് തൊട്ടുതാഴെ വരുന്ന ഒരുവർഷത്തെ പ്രായോഗിക കോഴ്സായായിരിക്കും ഇത്. സർക്കാർ, തദ്ദേശസ്വയംഭരണ സ്ഥാപനങ്ങൾ, എൻ.ജി.ഒകൾ, സി.എസ്.ആർ ഫണ്ടുകൾ എന്നിവ ഏകോപിപ്പിച്ച് കെയർ ഗീവേഴ്സിനെ നിയമിക്കും.

പ്ലസ് ടു വിദ്യാർത്ഥികളെ ഉൾപ്പെടുത്തി ഒരു 'വോളണ്ടിയർ കോർ' രൂപീകരിക്കും. വിദ്യാർത്ഥികൾ പ്രായമായവരെ സന്ദർശിച്ച് ക്ഷേമാന്വേഷണം നടത്തുന്നത് അവരുടെ ഏകാന്തത മാറ്റാനും സഹായിക്കും. മുതിർന്ന പൗരന്മാരുടെ ക്ഷേമരംഗത്ത് അക്കാദമിക, ഗവേഷണ, സാങ്കേതിക, സ്ഥാപനതല സഹകരണത്തിനായി സംസ്ഥാനത്തിനകത്തും പുറത്തുമുള്ള 12 സ്ഥാപനങ്ങളുമായാണ് ഡിപ്പാർട്ട്‌മെന്റ് ഓഫ് സീനിയർ സിറ്റിസൺ ധാരണാപത്രം ഒപ്പുവച്ചത്. ഈ സ്ഥാപനങ്ങൾ അവയുടെ വൈദഗ്ധ്യത്തിനനുസരിച്ച് തെരഞ്ഞെടുത്ത വിഷയമേഖലകളിൽ വകുപ്പുമായി ചേർന്ന് പ്രവർത്തിക്കുകയും ചെയ്യും.