ശബരിമലയിലേക്ക് ഭക്തരുടെ ഒഴുക്ക്... വെര്ച്വല് ക്യു വഴി ബുക്ക് ചെയ്ത് അറുപതിനായിരം പേര്, ഒരു ദിവസം എണ്പതിനായിരം പേര്ക്ക് ദർശനം

ശബരിമലയിലേക്ക് ഭക്തരുടെ ഒഴുക്ക്... മണ്ഡല ഉത്സവത്തിനായി നട തുറന്നതോടെ ഇനി ശബരിമലയിലേക്ക് ഭക്തര് ഒഴുകും. രാവിലെ ഭക്തര്ക്കായി കാനനപാത തുറന്നു. വൃശ്ചികപ്പുലരിയില് പുതിയ മേല്ശാന്തി സുബ്രഹ്മണ്യന് ശങ്കരന് നമ്പൂതിരിയാണ് ശബരിമല നട തുറന്നത്.
മാളികപ്പുറം നട പുതിയ മേല്ശാന്തി ദാമോദരന് നമ്പൂതിരി തുറന്നു. അറുപതിനായിരത്തില് അധികം ഭക്തരാണ് ഇന്ന് ദര്ശനത്തിനായി ബുക്ക് ചെയ്തിരിക്കുന്നത്. പുല്ലുമേട്, കരിമല പാതകളിലൂടെയും ഇന്ന് മുതല് തീര്ഥാടകരെ കടത്തിവിടും. പന്തളം വലിയകോയിക്കല് ക്ഷേത്രത്തില് ഇന്നുമുതല് തിരുവാഭരണ ദര്ശനത്തിനും തുടക്കമായി.
മണ്ഡലകാലം ആരംഭിച്ചതോടെ ഇന്ന് കൂടുതല് തീര്ഥാടകര് ശബരിമല ദര്ശനത്തിന് എത്തും. ഒരു ദിവസം എണ്പതിനായിരം പേര്ക്കാണ് ദര്ശന സൗകര്യം. 66,000 പേര്ക്ക് വെര്ച്വല് ക്യൂ വഴിയും പതിനാലായിരം പേര്ക്ക് തത്സമയ ബുക്കിങിലൂടെയും ദര്ശനം നടത്താവുന്നതാണ്.
അതേസമയം നിലയ്ക്കലിലെത്തുന്ന സ്വാമിമാരുടെ തിരക്ക് കണക്കിലെടുത്ത് കൂടുതല് പൊലീസ് സുരക്ഷാ വിന്യാസമൊരുക്കിയിട്ടുണ്ട്. കെഎസ്ആര്ടിസി ബസുകളില് കയറാനായി സ്വാമിമാര് തിരക്ക് കൂട്ടുന്നത് ഉള്പ്പെടെയുള്ള അപകടസാധ്യത വിവിധ വകുപ്പുകളുടെ മേല്നോട്ടത്തില് പ്രത്യേകം നിയന്ത്രിക്കും.
വെര്ച്വല് ക്യൂ ബുക്കിങ് വഴിയുള്ള സ്വാമിമാരുടെ എണ്ണം വർദ്ധിച്ചതിനാൽ തിരക്ക് ഓരോ മണിക്കൂറിലും ഉയരുമെന്നാണ് വിലയിരുത്തല്.
"
https://www.facebook.com/Malayalivartha

























