ജയില്‍ ഡി.ജി.പി സ്ഥാനത്തുനിന്ന് ഡോ. അലക്‌സാണ്ടര്‍ ജേക്കബിനെ നീക്കി; സെന്കുമാറിന് ചുമതല
ജയില്‍ ഡി.ജി.പി സ്ഥാനത്തുനിന്ന് ഡോ. അലക്‌സാണ്ടര്‍ ജേക്കബിനെ നീക്കി. ജയില്‍ ഡി.ജി.പിയുടെ വിവാദ പരാമര്‍ശം സര്‍ക്കാരിനെ അക്ഷരാര്‍ത്ഥത്തില്‍ വെട്ടിലാക്കിയിരുന്നു. ഈ അവസ്ഥയില്‍ ജയില്‍ ഡി.ജി.പി സ്ഥാനത്തുനിന്ന് അലക്‌സാണ്ടര്‍ ജേക്കബിനെ മാറ്റുമെന്ന്‌ മലയാളി വാര്‍ത്ത നേരത്തെ റിപ്പോര്‍ട്ട്‌ ചെയ്‌തിരുന്നു. വിവാദപരാമര്‍ശങ്ങളില്‍ ഖേദം പ്രകടിപ്പിച്ചെങ്കിലും അത് തൃപ്തികരമല്ലെന്ന് കണ്ടാണ് നടപടി. അലക്‌സാണ്ടര്‍ ജേക്കബിന് പുതിയ ചുമതല നല്‍കിയിട്ടില്ല. ഇന്റലിജന്‍സ് മേധാവി ടി.പി. സെന്കുമാറിന് ജയില്‍ വകുപ്പിന്റെ പൂര്‍ണ അധിക ചുമതല നല്‍കി.
ടി.പി വധക്കേസിലെ പ്രതികള്‍ കോഴിക്കോട് ജില്ലാ ജയിലില്‍ ഫോണും ഫെയ്‌സ് ബുക്കും ഉപയോഗിച്ചതുമായി ബന്ധപ്പെട്ട് നടത്തിയ പരാമര്‍ശങ്ങളാണ് അലക്‌സാണ്ടര്‍ ജേക്കബിന്റെ സ്ഥാനചലനത്തില്‍ കലാശിച്ചത്.
സംസ്ഥാനത്തെ ജയിലുകളില്‍ ഭക്ഷണസാധനങ്ങള്‍ ഉണ്ടാക്കാനുള്ള തീരുമാനമാണ്‌ തടവുകാരെ വഴിതെറ്റിച്ചതെന്നാണ്‌ പോലീസിലെ ഉന്നതരുടെ കണക്കുകൂട്ടല്‍. ആഭ്യന്തരമന്ത്രിക്കും ഇക്കാര്യത്തില്‍ നീരസമുണ്ട്‌. ജയിലില്‍ നിന്നും കുറഞ്ഞ ചെലവില്‍ ഭക്ഷണ സാധനങ്ങള്‍ ഉണ്ടാക്കി വിപണനം നടത്താനുള്ള ജയില്‍ മേധാവിയുടെ തീരുമാനത്തിന്‌ സര്‍ക്കാര്‍ അംഗീകാരം ഉണ്ടായിരുന്നെങ്കിലും ജയിലുകളില്‍ നിലനിന്നിരുന്ന അച്ചടക്കത്തിന്‌ ഇത്‌ ഭംഗം വരുത്തിയതായാണ്‌ പൊതുവെയുള്ള വിലയിരുത്തല്‍. ജയിലുകളില്‍ നിന്നുള്ള ഭക്ഷണത്തിന്‌ സംസ്ഥാനത്ത്‌ വലിയ വില്‍പ്പനയുണ്ട്‌.
സര്‍ക്കാരിന്‌ പണമുണ്ടാക്കി കൊടുക്കാനുള്ള ഫാക്‌ടറിയല്ല ജയില്‍ എന്നാണ്‌ ഒരു ഉന്നത പോലീസുദ്യോഗസ്ഥന്‍ മലയാളി വാര്‍ത്തയോട്‌ പറഞ്ഞത്‌. എന്നാല്‍ തടവുകാര്‍ക്ക്‌ മാനസാന്തരമുണ്ടാക്കാനുള്ള ശ്രമത്തിന്റെ ഭാഗമായിട്ടാണ്‌ ഇത്തരം ചില പരിഷ്‌ക്കാരങ്ങള്‍ പരീക്ഷിച്ചതെന്ന്‌ ഡോ. അലക്‌സാണ്ടര്‍ ജേക്കബ്‌ പറയുന്നു.
ഭക്ഷണസാധനങ്ങളുടെ നിര്‍മ്മാണം തുടങ്ങിയതോടെ തടവുകാര്‍ സ്വതന്ത്രരായി അടുക്കളയിലും മറ്റും വിഹരിക്കുന്നു. ഇതിനിടയില്‍ ജയില്‍ ഉദ്യോഗസ്ഥര്‍ വഴി ലഭിക്കുന്ന മൊബൈല്‍ ഫോണും കമ്പ്യൂട്ടറും ഉപയോഗിക്കുന്നു. മലബാറിലെ ചില ജയിലുകളില്‍ കഴിയുന്നവര്‍ എല്ലാ ദിവസവും വീട്ടിലും സുഹൃത്തുക്കളുടെ വീട്ടിലും വിളിക്കാറുണ്ട്‌.
ജയിലില്‍ ഉയര്‍ന്ന നിലവാരമുള്ള ഭക്ഷണമാണ്‌ നല്‍കി വരുന്നത്‌. ചെയ്‌ത തെറ്റില്‍ പശ്ചാത്തപിക്കുന്നതിനു പകരം സുഖജീവിതമാണ്‌ തടവുകാര്‍ അനുഭവിക്കുന്നത്‌. ഏകാന്തമായിരുന്ന്‌ പശ്ചാത്തപിക്കാന്‍ അവര്‍ക്ക്‌ നേരമില്ല. അലക്കൊഴിഞ്ഞിട്ട്‌ കാശിക്ക്‌ പോകാന്‍ നേരമില്ലെന്ന മട്ടിലാണ്‌ തടവുകാര്‍.
മലബാറിലെ ജയിലുകളിലുള്ള ഉദ്യോഗസ്ഥര്‍ സി.പി.എം അനുഭാവികളാണ്‌. അവര്‍ സി.പി.എം തടവുകാര്‍ക്ക്‌ ഇഷ്‌ടാനുസരണം പെരുമാറാനുള്ള സാഹചര്യം ഒരുക്കി കൊടുക്കുന്നു. ഉദ്യോഗസ്ഥരെ നിയന്ത്രിക്കാന്‍ മേലുദ്യോഗസ്ഥര്‍ ശ്രമിക്കാറില്ല. സി.പി.എമ്മിന്റെ ജില്ലാകമ്മിറ്റികളാണ്‌ മലബാറിലെ ജയിലുകള്‍ ഭരിക്കുന്നത്‌.
അലക്‌സാണ്ടര്‍ ജേക്കബിന് ഇത്തരം ഭരണ കാര്യങ്ങളില്‍ താല്‍പര്യം ഉണ്ടായിരുന്നില്ല എന്നും റിപ്പോര്‍ട്ടുകള്‍ ഉണ്ടായിരുന്നു.
https://www.facebook.com/Malayalivartha
