അഞ്ചല്‍ ഏരൂര്‍ തൊണ്ടിയറയില്‍ ഭാരതിയെ(65) കൊന്നത് വീടിനു പുറത്ത് രാത്രിയില്‍ എന്നും ഒളിഞ്ഞിരുന്ന് കണ്ടുകൊണ്ടിരുന്ന അയല്‍ വാസി തന്നെ. പന്ത്രണ്ട് വര്‍ഷത്തിന് ശേഷമാണ് കൊലപാതക കേസിലെ പ്രതിയായ ആവണീശ്വരം, മഞ്ഞകാല, കൊല്ലന്റെഴികത്ത് ഉണ്ണികൃഷ്ണപിള്ള(47) യെ ക്രൈംബ്രാഞ്ച് അറസ്റ്റ് ചെയ്തത്. സ്ഥിരം മദ്യപാനിയായിരുന്ന ഇയാള്‍ ഭാരതിയില്‍ ആകൃഷ്ടനായിരുന്നു. മിക്ക ദിവസവും ഭാരതിയുടെ വീടിനു പുറത്ത് രാത്രി ഒളിച്ചിരിക്കുകയും എത്തി നോട്ടവും പതിവാക്കിയ ആളായിരുന്നു ഉണ്ണികൃഷ്ണപിള്ള.

മദ്യത്തിന് അടിമയായ ഇയാള്‍ ഭാരതി പ്രാഥമിക കാര്യങ്ങള്‍ നിര്‍വഹിക്കാന്‍ രാത്രിയില്‍ പുറത്തിറങ്ങിയപ്പോഴാണ് ഭാരതിയെ കയറി പിടിച്ച് ലൈംഗിക അതിക്രമത്തിന് ശ്രമിച്ചത്. എന്നാല്‍ ശ്രമം ചെറുത്ത ഭാരതി ബഹളം വെച്ചതിനെ തുടര്‍ന്ന് പ്രതി ഉണ്ണികൃഷ്ണപിള്ള ഭാരതിയുടെ വായും കഴുത്തും കൈ കൊണ്ട് അമര്‍ത്തി പിടിച്ച് താഴെ മറിച്ചിട്ട് ശ്വാസം മുട്ടിച്ച് കൊലപ്പെടുത്തുകയായിരുന്നു. പിറ്റേന്ന് നാട്ടുകാരാണ് മൃതദേഹം റബര്‍ തോട്ടത്തില്‍ കണ്ടതും ഏരൂര്‍ പോലീസില്‍ വിവരം അറിയിച്ചതും.

ഭാരതിയുടെ സംസ്‌ക്കാര ചടങ്ങില്‍ പ്രതി ഉണ്ണികൃഷ്ണപിള്ള പങ്കെടുക്കുകയും ചെയ്തിരുന്നു. നാട്ടുകാരില്‍ ചിലര്‍ ഇയാളില്‍ സംശയം ഉണ്ടായതിനെ തുടര്‍ന്ന് പോലീസില്‍ വിവരം അറിയിച്ചിരുന്നു. ഏരൂര്‍ പോലീസ് രണ്ട് തവണ ഇയാളെ സ്റ്റേഷനില്‍ വിളിച്ച് വരുത്തി ചോദ്യം ചെയ്ത് വിട്ടയച്ചു. ഇതേ സംശയം ഇപ്പോള്‍ കേസന്വേഷിച്ച ക്രൈംബ്രാഞ്ച് സംഘത്തോട് നാട്ടുകാരില്‍ ചിലര്‍ വെളിപ്പെടുത്തിയിരുന്നു. കൊലപാതകം ചെയ്ത ശേഷം ഭാര്യയുമായി പിണങ്ങിയ ഇയാള്‍ വിവിധ സ്ഥലങ്ങളില്‍ താമസിച്ച് വരികയായിരുന്നു.

2005 ഏപ്രില്‍ 20 നാണ് ഭാരതിയെ കൊല്ലപ്പെട്ട നിലയില്‍ കാണപ്പെട്ടത്. ഒറ്റയ്ക്ക് താമസിക്കുക്കുകയായിരുന്നു ഭാരതി. വീടീന് സമീപത്തെ റബര്‍ തോട്ടത്തിലാണ് മൃതദേഹം കിടന്നത്. അര്‍ധനഗ്നയായിട്ടാണ് മൃതദേഹം കാണപ്പെട്ടത്. മൃതദേഹ പരിശോധനയില്‍ മരണം കൊലപാതകമാണെന്ന് മനസിലാക്കിയ ഏരൂര്‍ പോലീസ് അഞ്ചല്‍ എസ്‌ഐയുടെ നേതൃത്വത്തില്‍ അന്വേഷണം നടത്തിയെങ്കിലും കേസ് തെളിയിക്കാന്‍ കഴിഞ്ഞിരുന്നില്ല. തുടര്‍ന്നാണ് 2015ല്‍ കേസ് ക്രൈംബ്രാഞ്ച് ഏറ്റെടുത്തത്. ക്രൈംബ്രാഞ്ച് ഹര്‍ട്ട് ആന്റ് ഹോമിസൈഡ് വിംഗ് അന്വേഷിച്ച് വരവേ ക്രൈംബ്രാഞ്ച് എഡിജിപി നിധിന്‍ അഗര്‍വാളിന്റെ നിര്‍ദേശപ്രകാരം ഡിറ്റക്ടീവ് ഇന്‍സ്‌പെപെക്ടര്‍ ഏ. ജോണ്‍സന്റെ നേതൃത്വത്തിലുള്ള സംഘം അന്വേഷിക്കുകയും പ്രതിയെ പിടികൂടുകയുമായിരുന്നു.

ഒരു സ്ഥലത്തും സ്ഥിരമായി താമസിക്കാത്ത ഇയാളെ ക്രൈംബ്രാഞ്ച് തെന്‍മലയില്‍ നിന്നും കസ്റ്റഡിയിലെടുക്കുകയായിരുന്നു. തുടര്‍ന്ന് ചോദ്യം ചെയ്യലില്‍ കുറ്റം സമ്മതിച്ചു. അന്വേഷണ സംഘത്തില്‍. എസ്‌ഐ മാരായ രാജേഷ്, മധുസൂദനന്‍ പിള്ള പോലീസ് ഉദ്യോഗസ്ഥരായ ബൈജു, ഷാജു, പത്മരാജന്‍ തുടങ്ങിയവരും ഉണ്ടായിരുന്നു.