യുവ നടി ആക്രമണത്തിനിരയായതുമായി ബന്ധപ്പെട്ട വിവാദം കൊടുമ്പിരി കൊണ്ട് നില്‍ക്കേ മലയാള സിനിമാ പ്രവര്‍ത്തകരുടെ സംഘടനയായ അമ്മയുടെ എക്‌സിക്യൂട്ടീവ് യോഗം ഇന്ന് എറണാകുളത്ത് നടക്കും. മാക്ട ഫെഡറേഷന്‍ എക്‌സിക്യൂട്ടീവ് യോഗവും ഇന്ന് നടക്കുന്നുണ്ട്. ഹോട്ടല്‍ ക്രൗണ്‍ പ്ലാസയില്‍ രാത്രി 7.30നാണ് അമ്മയുടെ യോഗം. വ്യാഴാഴ്ച ജനറല്‍ ബോഡിയും നടക്കും.

യോഗത്തില്‍ നടിയെ ആക്രമിച്ചതുമായി ബന്ധപ്പെട്ട വിവാദങ്ങള്‍ ചര്‍ച്ചയാകുമെന്നാണ് സൂചന. അമ്മ എക്‌സിക്യൂട്ടിവ് കമ്മിറ്റിയിലെ വനിതാ അംഗങ്ങളായ രമ്യ നമ്പീശനും, കുക്കു പരമേശ്വരനും ഈ വിഷയം ഉന്നയിക്കുമെന്നും സൂചനയുണ്ട്. എന്നാല്‍ വിഷയം ചര്‍ച്ചയാകുമോയെന്നു സ്ഥിരീകരിക്കാന്‍ സംഘടനയുടെ സെക്രട്ടറിയായ ഇടവേള ബാബു തയാറായ്യില്ല.

സംഘടനയിലെ ഒരംഗം ആക്രമിക്കപ്പെടുകയും ഇതുമായി ബന്ധപ്പെട്ട വിവാദങ്ങളില്‍ സംഘടനയുടെ എക്‌സിക്യൂട്ടീവ് അംഗമായ ഒരു നടന്റെ പേര് ഉയര്‍ന്ന് കേള്‍ക്കുകയും ചെയ്യുന്ന സാഹചര്യത്തില്‍ ഇന്നത്തെ യോഗം നിര്‍ണായകമാണ്. മാത്രമല്ല സിനിമ രംഗത്ത് ഉള്ളവര്‍ തന്നെ വിമര്‍ശനങ്ങളും അനുകൂല സാഹചര്യവും സൃഷ്ടിക്കുന്ന സാഹചര്യത്തില്‍ ഇന്നത്തെ യോഗം ചൂടേറിയ ചര്‍ച്ചയ്ക്കും സാധ്യത ഉയര്‍ത്തികാണിക്കുന്നു. കൂടാതെ മലയാള സിനിമയിലെ വനിതകള്‍ ചേര്‍ന്ന് വുമണ്‍ ഇന്‍ സിനിമ കളക്ടീവ് എന്ന സംഘടനയ്ക്ക് രൂപം നല്‍കിയ ശേഷമുള്ള അമ്മയുടെ ആദ്യ പ്രധാന യോഗമാണ് ഇന്ന് നടക്കാന്‍ പോകുന്നതെന്നും നിര്‍ണായകമാണ്.

എന്തൊക്കെ ആയാലും നടി അക്രമിക്കപ്പെട്ട സംഭവം ഒതുക്കി തീര്‍ക്കാനുള്ള നീക്കം അണിയറയില്‍ സജ്ജീവമാണ്. ഇതിനേറ്റവും വലിയ ഉദാഹരണമാണ് ഇതിന്റെ ഭാഗമായി ഇന്നലെ ഒരു വിഭാഗം നിര്‍മ്മാതാക്കള്‍ തലസ്ഥാനത്ത് യോഗം ചേര്‍ന്നത്. ഇന്നലെ ഉച്ചയോടെ നഗരത്തിലെ പഞ്ച നക്ഷത്ര ഹോട്ടലിലായിരുന്നു അനൗദ്യോഗിക യോഗം. പ്രമുഖരായ എട്ടോളം നിര്‍മ്മാതാക്കള്‍ യോഗത്തില്‍ പങ്കെടുത്തതായാണ് വിവരം. നിലവില്‍ മലയാള സിനിമ നേരിടുന്ന പ്രതിസന്ധികളാണ് യോഗം ചര്‍ച്ച ചെയ്തതെന്നാണ് പങ്കെടുത്ത നിര്‍മ്മാതാക്കളില്‍ ഒരാള്‍ പ്രമുഖ ഓണ്‍ലൈന്‍ ന്യൂസിനോട് പറഞ്ഞത്. എന്നാല്‍ പുതിയ സാഹചര്യത്തില്‍ നടന്‍ ദിലീപിന് പിന്തുണ പ്രഖ്യാപിക്കണമെന്നാണ് ഭൂരിഭാഗം നിര്‍മ്മാതാക്കളുടേയും നിലപാട്. ദിലീപിനൊപ്പം തങ്ങള്‍ ഒറ്റക്കെട്ടായി നില്‍ക്കുന്നുവെന്ന പ്രതീതി സൃഷ്ടിച്ച് നടിയെ സമ്മര്‍ദ്ധത്തിലാക്കാനാണ് പുതിയ നീക്കമെന്നും സൂചനയുണ്ട്. താരസംഘടനയായ അമ്മയുടെ യോഗത്തിന് ശേഷം യോഗം ചേര്‍ന്ന് ദിലീപിന് പൂര്‍ണ്ണ പിന്തുണ പ്രഖ്യാപിക്കാനാണ് നിര്‍മ്മാതാക്കളുടെ നീക്കം.

അതേ സമയം നടിയോടടുപ്പമുള്ളവരുമായി പ്രശ്‌നം സംസാരിച്ച് തീര്‍ക്കാനും ശ്രമം നടക്കുന്നതായാണ് വിവരം. മറ്റൊരു പ്രമുഖ നടനും, നിര്‍മ്മാതാവുമാണ് അനുരഞ്ജന നീക്കവുമായി രംഗത്തെത്തിയിരിക്കുന്നത്. എന്നാല്‍ കഴിഞ്ഞ ദിവസം റിപ്പോര്‍ട്ടര്‍ ടിവി ചര്‍ച്ചയില്‍ ദിലീപ് നടിയെ അപമാനിച്ചത് അവരുടെ വീട്ടുകാരെയും നടിയേയും വീണ്ടും ചൊടിപ്പിച്ചിരിക്കുകയാണ്. സിനിമ മേഖലയിലെ പുതിയ വനിത സംഘടനയും നടിക്കൊപ്പം ശക്തമായി തന്നെ നിലയുറപ്പിച്ചിട്ടുണ്ട്. പുതിയ സാഹചര്യത്തില്‍ അനുരഞ്ജന നീക്കം ഫലം കാണില്ലെന്നും സൂചനയുണ്ട്.