നാല് വയസുകാരന്‍ അച്ഛനമ്മമാര്‍ ജോലിക്കു പോയ തക്കത്തിന് നാടുകാണാനിറങ്ങി. നാലു വയസുകാരന്‍ മണിക്കൂറുകളോളം നഗരത്തില്‍ അലഞ്ഞ് നടന്നു. പെരുമ്പാവൂരിലാണ് സംഭവം. ഒടുവില്‍ പോലീസ് കുട്ടിയുടെ സഹായത്തിനെത്തുകയായിരുന്നു. ഇതര സംസ്ഥാനക്കാരായ തൊഴിലാളികളുടെ മകനായ നാലുവയസുകാരന്‍ ഷെമീലാണ് ഒറ്റയ്ക്ക് നാടുകാണാനിറങ്ങി ഒറ്റപ്പെട്ട് പോയത്.

കുട്ടിയുടെ ബന്ധുക്കളെ അന്വേഷിച്ച് പോലീസ് ഏറെ അലഞ്ഞു. ഒടുവില്‍ കുട്ടി ഒരു ബന്ധുവിനെ തിരിച്ചറിഞ്ഞതാണ് നിര്‍ണായകമായത്. അലഞ്ഞു തിരിഞ്ഞ് നടന്ന കുട്ടിയെ കണ്ട് സംശയം തോന്നിയ നാട്ടുകാരാണ് പോലീസിനെ അറിയിച്ചത്. ബിഹാര്‍ സ്വദേശികളായ സെയ്ഫുള്‍, റെജീന ദമ്പതികളുടെ മകനാണ് നാല് വയസുകാരനായ ഷെമീല്‍. കെട്ടിട നിര്‍മ്മാണ തൊഴിലാളികളാണ് സെയ്ഫുള്ളും റെജീനയും. മൂന്നു ദിവസം മുമ്പാണ് ഇവര്‍ ബിഹാറില്‍ നിന്ന് ജോലിക്കായി പെരുമ്പാവൂരില്‍ എത്തിയത്. ഷെമീലിന് ഒരു അനുജനും കൂടിയുണ്ട്.

നാട്ടുകാര്‍ വിവരമറിയിച്ചതിനെ തുടര്‍ന്ന് പോലീസെത്തി വീട്ടുകാരെ കുറിച്ചും താമസിക്കുന്ന സ്ഥലത്തെ കുറിച്ചും ചോദിച്ചപ്പോള്‍ ഒന്നുമറിയാതെ പകച്ച് നില്‍ക്കുകയായിരുന്നു കുഞ്ഞ്. തുടര്‍ന്ന് പോലീസ് കുഞ്ഞുമായി പെരുമ്പാവൂര്‍ നഗരത്തിലുടനീളം നടന്നു. നഗരത്തില്‍ തിരഞ്ഞിട്ടും കിട്ടാതിരുന്നതിനെ തുടര്‍ന്ന് പോലീസ് കുഞ്ഞുമായി ഇതര സംസ്ഥാനക്കാര്‍ താമസിക്കുന്ന സ്ഥലത്ത് എത്തി. കുട്ടിയുമായി തിരിച്ച് പോകാന്‍ ഒരുങ്ങുമ്പോള്‍ ഒരു ബന്ധുവിനെ കുട്ടി തിരിച്ചറിഞ്ഞതാണ് നിര്‍ണയകമായത്. ഇതോടെ പോലീസ് കുട്ടിയെ ബന്ധുവിനെ ഏല്‍പ്പിക്കുകയായിരുന്നു.