ബാലാവകാശ കമ്മിഷനിലെ നിയമനത്തില്‍ ആരോഗ്യമന്ത്രി കെ.കെ. ശൈലജയെ പിന്തുണച്ചു മുഖ്യമന്ത്രി പിണറായി വിജയന്‍. വിഷയത്തില്‍ മന്ത്രി കെ.കെ. ശൈലജയുടെ ഭാഗം ഹൈക്കോടതി കേട്ടിരുന്നില്ല. ആരോഗ്യമന്ത്രി സത്യപ്രതിജ്ഞാ ലംഘനം നടത്തിയിട്ടില്ല. അപേക്ഷാ തീയതി നീട്ടിയതില്‍ അപാകതയില്ല. യാഥാര്‍ഥ്യം ഹൈക്കോടതിയെ ബോധ്യപ്പെടുത്തും. ചില ജില്ലകളില്‍ അപേക്ഷകരാരും ഉണ്ടായിരുന്നില്ലെന്നും മുഖ്യമന്ത്രി നിയമസഭയില്‍ പറഞ്ഞു.

അതേസമയം, മന്ത്രിയുടെ രാജി ആവശ്യപ്പെട്ട് നടുത്തളത്തിലിറങ്ങി പ്രതിപക്ഷം പ്രതിഷേധിച്ചതിനെത്തുടര്‍ന്ന് സഭ നിര്‍ത്തിവച്ചു. ബാലാവകാശ കമ്മിഷന്റെ നിയമനത്തിനുള്ള അപേക്ഷാ കാലാവധി മന്ത്രി നീട്ടിനല്‍കിയിരുന്നു. സിപിഎം പ്രവര്‍ത്തകനായ ടി.ബി. സുരേഷിനെ നിയമിക്കുന്നതിനാണ് ഇതെന്നായിരുന്നു കോടതിയുടെ വിലയിരുത്തല്‍.

മന്ത്രിയുടെ നിര്‍ദേശം സദുദ്ദേശ്യത്തിലല്ലെന്നും കോടതി നിരീക്ഷിച്ചിരുന്നു. രണ്ടാം വിജ്ഞാപനത്തില്‍ തുടര്‍നടപടി റദ്ദാക്കിയ കോടതി, ആദ്യവിജ്ഞാപനത്തിലെ നടപടികളില്‍നിന്ന് ഒഴിവുകള്‍ നികത്താനും നിര്‍ദേശിച്ചിരുന്നു. ആദ്യ വിജ്ഞാപനമനുസരിച്ച് 2016 നവംബര്‍ 30 ആയിരുന്നു അവസാന തീയതി. പിന്നീട് 2017 ജനുവരി 30 വരെ സമയം നീട്ടി. 103 അപേക്ഷകരില്‍നിന്നു മത്സരക്ഷമമായ തിരഞ്ഞെടുപ്പു സാധ്യമാകാത്തതിനാല്‍ രണ്ടാം വിജ്ഞാപനം വേണ്ടി വന്നുവെന്നാണു സര്‍ക്കാര്‍ ആദ്യം സത്യവാങ്മൂലത്തില്‍ പറഞ്ഞത്.

എന്നാല്‍ 103 പേരില്‍ യോഗ്യതയുള്ളവര്‍ 40 പേര്‍ മാത്രമായിരുന്നു എന്നും എല്ലാ ജില്ലകളില്‍നിന്നും അപേക്ഷകരുണ്ടായിരുന്നില്ലെന്നും തുടര്‍ന്നു സത്യവാങ്മൂലം നല്‍കി. ആറു പേരെ കണ്ടെത്താന്‍ 103 അപേക്ഷകര്‍ പോരെന്നും യോഗ്യതയുള്ള 40 പേര്‍ പോരെന്നും പറയുന്നതിന്റെ കാരണം സാധൂകരിക്കാന്‍ സര്‍ക്കാരിനായില്ല.