ഉയര്‍ന്ന ബോണസ് ലക്ഷ്യമിട്ട് ബിവറേജസ് കോര്‍പറേഷനില്‍ ഡപ്യൂട്ടേഷന്‍ നിയമനം തേടി 150 പേര്‍. ബെവ്‌കോയില്‍ ഈ വര്‍ഷത്തെ ബോണസ് 85,000 രൂപയാണ്. ഓണത്തിന് ആഴ്ചകള്‍ മാത്രം ശേഷിക്കെ പരമാവധി സ്വന്തക്കാരെ തിരുകിക്കയറ്റുകയാണു ഡപ്യൂട്ടേഷന്റെ ലക്ഷ്യമെന്നാണു കേള്‍ക്കുന്നത്.

കെഎസ്ആര്‍ടിസി, കെല്‍ട്രോണ്‍, സിആപ്റ്റ്, യുണൈറ്റഡ് ഇലക്ട്രിക്കല്‍സ് തുടങ്ങിയ സ്ഥാപനങ്ങളില്‍ നിന്നുള്ളവരാണു ഡപ്യൂട്ടേഷനു ശ്രമിക്കുന്നത്. വില്‍പന ശാലകളിലും ഓഡിറ്റ് വിഭാഗത്തിലുമാണു ഡപ്യൂട്ടേഷന്‍കാരുടെ കണ്ണ്. വില്‍പനശാലകളില്‍ നിയമനം ലഭിച്ചാല്‍ ശമ്പളത്തിനു പുറമെ ദിവസം 335 രൂപ അലവന്‍സ് ലഭിക്കും. മദ്യക്കമ്പനികളില്‍നിന്നുള്ള സഹായം വേറെ. ഓഡിറ്റിലാണെങ്കില്‍ അധികം ജോലിയില്ല. യാത്രാബത്ത എഴുതിയെടുക്കാമെന്ന സൗകര്യവുമുണ്ട്.

പീഡിത വ്യവസായങ്ങളിലെ ജീവനക്കാരെ സഹായിക്കാനാണു ഡപ്യൂട്ടേഷനെന്നാണ് കോര്‍പറേഷന്‍ അധികൃതരുടെ ന്യായം. നിലവില്‍ ആവശ്യത്തിനു ജീവനക്കാരില്ലെന്നും ഓണക്കാലത്തു ജീവനക്കാരുടെ ആവശ്യം കൂടുമെന്നും അവര്‍ പറയുന്നു. ഡപ്യൂട്ടേഷനു പകരം, വിവിധ കാരണങ്ങളാല്‍ തുറക്കാന്‍ കഴിയാതെപോയ അന്‍പതോളം വില്‍പനശാലകളിലെ ജീവനക്കാരെ ബെവ്‌കോയില്‍ മാറ്റി നിയമിച്ചുകൂടേയെന്നാണ് എതിര്‍ക്കുന്നവരുടെ വാദം. അല്ലെങ്കില്‍ എംപ്ലോയ്‌മെന്റ് എക്‌സ്‌ചേഞ്ചില്‍നിന്നു താല്‍ക്കാലിക നിയമനം നല്‍കാം. ബെവ്‌കോയില്‍ നിയമനത്തിനായി 2000 പേരുടെ റാങ്ക് പട്ടിക പിഎസ്‌സി കഴിഞ്ഞദിവസം പുറത്തിറക്കിയിരുന്നു.