ജയിംസ് കമ്മീഷന്റെ ശുപാര്‍ശ പ്രകാരമാണ് ശമ്പള വര്‍ധനവ് നടത്താന്‍ തീരുമാനമായത്. 30 ശതമാനം വരെ വര്‍ധനയ്ക്കാണ് ജസ്റ്റിസ് ജയിംസ് കമ്മിഷന്റെ ശുപാര്‍ശ. ഇതുവഴി അലവന്‍സുകള്‍ ഉള്‍പ്പെടെ ശമ്പളം 80,000 രൂപയാകും. നിലവില്‍ 39,500 രൂപയാണ് ശമ്പളയിനത്തില്‍ എംഎല്‍എമാര്‍ക്കു ലഭിക്കുന്നത്. ചില ബത്തകള്‍ കുറയ്ക്കാനും നിര്‍ദേശമുണ്ട്.

എംഎല്‍എമാര്‍ക്കു വീടു നിര്‍മ്മിക്കുന്നതിനും വാഹനം വാങ്ങുന്നതിനുമുള്ള അഡ്വാന്‍സ് തുക ഇരട്ടിയാക്കാന്‍ തീരുമാനമെടുത്തതിന് പിന്നാലെയാണ് ശമ്പള വര്‍ധനവ്. രണ്ടു മാസം മുന്‍പ് രൂപം നല്‍കിയ ജയിംസ് കമ്മിഷന്‍ സാമാജികരും മുന്‍ നിയമസഭാ സാമാജികരും ഉള്‍പ്പെടെ പൊതുസമൂഹത്തില്‍നിന്ന് അഭിപ്രായങ്ങളും നിര്‍ദേശങ്ങളും ശേഖരിച്ചാണ് മുഖ്യമന്ത്രിക്കും സ്പീക്കര്‍ക്കും ശുപാര്‍ശ കൈമാറിയത്.

മന്ത്രിമാര്‍, സ്പീക്കര്‍, ഡപ്യുട്ടി സ്പീക്കര്‍, പ്രതിപക്ഷ നേതാവ്, ഗവണ്‍മെന്റ് ചീഫ് വിപ്പ്, നിയമസഭാംഗങ്ങള്‍, മുന്‍ നിയമസഭാംഗങ്ങള്‍ എന്നിവരുടെ അലവന്‍സുകളും മറ്റ് ആനുകൂല്യങ്ങളും പരിഷ്‌കരിക്കുന്നതിനായാണ് റിട്ട. ഹൈക്കോടതി ജഡ്ജിയും മുന്‍ നിയമസഭാ സെക്രട്ടറിയുമായ ജസ്റ്റിസ് ജെ.എം. ജയിംസ് കമ്മിഷനെ നിയമിച്ചത്

.

മറ്റു സംസ്ഥാനങ്ങളെ അപേക്ഷിച്ച് ശമ്പളം കുറവാണെന്ന് കേരളത്തിലെ എംഎല്‍എമാര്‍ ചൂണ്ടിക്കാട്ടിയതിനെത്തുടര്‍ന്നാണ് കമ്മിഷനെ നിയോഗിച്ചത്. കഴിഞ്ഞ ദിവസം നിയമസഭാ സബ്ജക്ട് കമ്മിറ്റിയാണ് എംഎല്‍എമാര്‍ക്കു വീടു വയ്ക്കുന്നതിന് 20 ലക്ഷം രൂപയും വാഹനം വാങ്ങുന്നതിനു പത്തുലക്ഷം രൂപയും അഡ്വാന്‍സായി അനുവദിക്കാന്‍ തീരുമാനിച്ചത്. എംഎല്‍എമാരുടെ അഡീഷണല്‍ പിഎമാരുടെ അലവന്‍സും വര്‍ധിപ്പിച്ചിട്ടുണ്ട്. തുക വര്‍ധനയ്ക്കു 2016 ജൂണ്‍ 20 മുതല്‍ പ്രാബല്യമുണ്ടാകും.

ഇന്ത്യയിലെ ഏറ്റവും ഉയര്‍ന്ന ശമ്പളം കൈപ്പറ്റുന്ന എംഎല്‍എമാര്‍ തെലങ്കാനയിലാണ്; പ്രതിമാസ ശമ്പളം 2.50 ലക്ഷം രൂപ. രാജ്യത്തെ എംഎല്‍എമാരുടെ ശരാശരി വേതനം പ്രതിമാസം 1.10 ലക്ഷം രൂപയാണ്. രാജ്യത്ത് ഏറ്റവും കുറഞ്ഞ വേതനം കൈപ്പറ്റുന്നതു മണിപ്പൂരിലെ സാമാജികരാണ്; 18,500 രൂപ മാത്രം. ത്രിപുരയില്‍ 24,200 രൂപയാണ് നിയമസഭാ സാമാജികരുടെ ശമ്പളം. കഴിഞ്ഞ മാസം തമിഴ്‌നാട് എംഎല്‍എമാരുടെ പ്രതിമാസ ശമ്പളം 55,000 രൂപയില്‍നിന്ന് 1.05 ലക്ഷം രൂപയായി വര്‍ധിപ്പിച്ചിരുന്നു. അവിടെ എംഎല്‍എമാരുടെ പ്രാദേശിക വികസന ഫണ്ട് രണ്ടര കോടി രൂപയാക്കിയും ഉയര്‍ത്തി.

മുഖ്യമന്ത്രി, മന്ത്രിമാര്‍, സ്പീക്കര്‍, പ്രതിപക്ഷ നേതാവ്, ഡെപ്യൂട്ടി സ്പീക്കര്‍ എന്നിവരുടെ ശമ്പളവും ആനുകൂല്യങ്ങളും ആനുപാതികമായി വര്‍ധിപ്പിച്ചു. കഴിഞ്ഞ വര്‍ഷം ഓഗസ്റ്റില്‍ മഹാരാഷ്ട്ര നിയമസഭയുടെ വര്‍ഷകാല സമ്മേളനം അവസാനിച്ചത് സഭാംഗങ്ങള്‍ക്കുള്ള ശമ്പളവര്‍ധനയ്ക്കുള്ള ബില്‍ കൂടി പാസാക്കിയശേഷമായിരുന്നു. നിലവിലുള്ള വേതനം ഇരട്ടിയാക്കി എംഎല്‍എമാര്‍ക്കും എംഎല്‍സിമാര്‍ക്കും ശമ്പളവും ആനുകൂല്യങ്ങളുമായി പ്രതിമാസം ഒന്നര ലക്ഷം രൂപ ലഭ്യമാക്കാനായിരുന്നു ബില്ലിലെ വ്യവസ്ഥ.