കേരളത്തിലങ്ങോളമിങ്ങോളമുള്ള ചെറുതും വലുതുമായ പട്ടണങ്ങളും നഗരങ്ങളും ഗതാഗതക്കുരുക്കില്‍പെട്ടു ശ്വാസം മുട്ടുകയാണ്. റോഡുകളില്‍ യാതൊരു നിയന്ത്രണവുമില്ലാതെ വാഹനങ്ങള്‍ പാര്‍ക്ക്‌ ചെയ്യുന്നതാണ്‌ ഇതിന്റെ പ്രധാന കാരണങ്ങളിലൊന്ന്‌. നഗര പ്രദേശങ്ങളിലെ അനിയന്ത്രിത പാര്‍ക്കിംഗ്‌ ഒഴിവാക്കാനായി ബഹുനില പാര്‍ക്കിംഗ്‌ സംവിധാനങ്ങള്‍ ഏര്‍പ്പെടുത്താന്‍ പൊതുമരാമത്തുവകുപ്പു തയ്യാറെടുക്കുന്നു. കെഎസ്‌ടിപി പദ്ധതിയനുസരിച്ചായിരിക്കും ഇതു നടപ്പിലാക്കുക. തിരുവനന്തപുരം, കൊച്ചി, കോഴിക്കോട്‌ എന്നീ നഗരങ്ങളിലായിരിക്കും പദ്ധതിയുടെ തുടക്കം. ഇതിനുള്ള കേന്ദ്രങ്ങള്‍ കണ്ടെത്തുകയാണ്‌ ആദ്യത്തെ നടപടി. ഈ വര്‍ഷാവസാനത്തോടെ പദ്ധതികള്‍ ആരംഭിക്കാന്‍ കഴിയുമെന്നു പ്രതീക്ഷിക്കുന്നതായി അധികൃതര്‍ വെളിപ്പെടുത്തിയിട്ടുണ്ട്‌.
സ്ഥല ലഭ്യതയനുസരിച്ചു കേരളത്തിലുടനീളം ഈ സംവിധാനം ഏര്‍പ്പെടുത്താനാണു ഗവണ്‍മെണ്ടിന്റെ ഉദ്ദേശ്യം. സ്ഥലം കണ്ടെത്തി കഴിഞ്ഞതിനുശേഷമായിരിക്കും നിര്‍മാണ പ്രവര്‍ത്തനങ്ങള്‍.  സ്റ്റേറ്റ്‌ ഹൈവേകളുടെയും കെ.എസ്‌.ടി.പി റോഡുകളുടെയും ഓരങ്ങളിലായിരിക്കും പാര്‍ക്കിംഗ്‌ സംവിധാനങ്ങള്‍ ആരംഭിക്കുക. റോഡുകളിലെ വളവുകള്‍ നിവര്‍ത്തുമ്പോള്‍ പല സ്ഥലങ്ങളിലും പാഴായിക്കിടക്കുന്ന ഓക്‌സ്‌ബോ പോയിന്റുകള്‍ വാണിജ്യാടിസ്ഥാനത്തില്‍ വികസിപ്പിച്ചെടുക്കാനും ആലോചനയുണ്ട്‌. ഹൈവേകളിലും മറ്റു പ്രധാന റോഡുകളിലുമായി ഇത്തരം അന്‍പതോളം സ്‌പോട്ടുകള്‍ കണ്ടെത്തിയിട്ടുണ്ട്‌. ഇത്തരം സ്ഥലങ്ങളില്‍ പാര്‍ക്കിംഗ്‌ സൗകര്യങ്ങള്‍ക്കു പുറമേ ഭക്ഷണശാലകള്‍ ഉള്‍പ്പെടെയുള്ള ഷോപ്പിംഗ്‌ കോംപ്ലക്‌സുകള്‍, പെട്രോള്‍ പമ്പുകള്‍, വിശ്രമകേന്ദ്രങ്ങള്‍ എന്നിവ നിര്‍മിക്കാനും ഉദ്ദേശിക്കുന്നുണ്ട്‌.