മറയൂരിലെ ചന്ദനക്കാട്ടില്‍ നിന്നും ചന്ദനമരങ്ങള്‍ മോഷണം പോകുന്നതു തടയാനായി ആധുനിക സാങ്കേതിക വിദ്യയുടെ സഹായം തേടുകയാണു വനംവകുപ്പ്‌. ചന്ദനമരങ്ങളില്‍ മൈക്രോചിപ്പ്‌ ഘടിപ്പിക്കുന്നതിലൂടെ മോഷണം തടയാനാകുമെന്നാണ്‌ അധികൃതര്‍ കരുതുന്നത്‌. ഓരോ മരത്തിന്റെയും സമ്പൂര്‍ണ വിവരങ്ങള്‍ രേഖപ്പെടുത്തിയ ചിപ്പുകളാണ്‌ അതതു മരങ്ങളില്‍ നിക്ഷേപിക്കുന്നത്‌. ഏതെങ്കിലും മരം മുറിച്ചുകടത്തിയാല്‍ അത്‌ എവിടേക്കാണു കടത്തിക്കൊണ്ടു പോയത്‌ എന്നറിയാനും അതു കണ്ടെത്താനും ചിപ്പ്‌ ഘടിപ്പിക്കുന്നതിലൂടെ കഴിയും. ഇപ്രകാരം കുറ്റവാളികളെ കണ്ടെത്തുന്നതിനും മോഷണം തടയുന്നതിനും സാധിക്കും. ഏകദേശം നൂറു ചതുരശ്ര കിലോമീറ്റര്‍ വ്യാപിച്ചു കിടക്കുന്ന മറയൂരിലെ ചന്ദനക്കാട്ടില്‍ ഏകദേശം അറുപതിനായിരത്തോളം ചന്ദനമരങ്ങളുണ്ടെന്നാണു വനംവകുപ്പിന്റെ കണക്ക്‌. ഇത്രയും മരങ്ങള്‍ക്ക്‌ ഏകദേശം രണ്ടായിരം കോടി രൂപ വിലമതിക്കുമെന്നും കണക്കാക്കിയിട്ടുണ്ട്‌. ഇവിടെ നിന്നും വന്‍തോതില്‍ ചന്ദനമരങ്ങള്‍ മോഷണം പോകുന്നതായി വനംവകുപ്പിലെ ഉദ്യോഗസ്ഥര്‍ തന്നെ സമ്മതിക്കുന്നുണ്ട്‌. ആധുനിക ഉപകരണങ്ങളുടെ സഹായത്തോടെ വന്‍മരങ്ങള്‍ പോലും എളുപ്പത്തില്‍ മുറിച്ചു കഷണങ്ങളാക്കാന്‍ സാധിക്കുമെന്നതിനാല്‍ വെളുപ്പാന്‍ കാലത്താണു മോഷ്‌ടാക്കള്‍ മിക്കവാറും മരങ്ങള്‍ മുറിക്കുന്നത്‌. കഷണങ്ങളാക്കിയ മരങ്ങള്‍ ഉടന്‍തന്നെ വാഹനങ്ങളില്‍ തമിഴ്‌നാട്ടിലേക്കു കടത്തുകയാണു പതിവ്‌.
ആയുര്‍വേദ ഔഷധങ്ങളും സൗന്ദര്യവര്‍ധക ഉത്‌പന്നങ്ങളും നിര്‍മിക്കുന്നതിനാണു ചന്ദനം പ്രധാനമായി ഉപയോഗിക്കുന്നത്. ക്ഷേത്രങ്ങളിലും ചന്ദനം ഉപയോഗിക്കുന്നുണ്ട്‌. ചന്ദനത്തൈലമാണു ചന്ദനത്തില്‍ നിന്നുണ്ടാക്കുന്ന പ്രധാന ഉത്‌പന്നം. സംസ്ഥാനത്തു ചന്ദനത്തൈലം ഉത്‌പാദിപ്പിക്കുന്ന സ്വകാര്യഫാക്‌ടറികള്‍ മുമ്പുണ്ടായിരുന്നെങ്കിലും ഇപ്പോള്‍ ഒന്നും പ്രവര്‍ത്തിക്കുന്നില്ല. വനം വകുപ്പിനു മാത്രമേ ഇപ്പോള്‍ ചന്ദനം ശേഖരിക്കുന്നതിനും കൈവശം വക്കുന്നതിനും അധികാരമുള്ളൂ. വനം വകുപ്പില്‍ നിന്നും ലേലം കൊള്ളുന്ന ചന്ദനമാണ്‌ ഔഷധനിര്‍മാണക്കമ്പനികളും മറ്റും പ്രയോജനപ്പെടുത്തുന്നത്‌.
ചന്ദനക്കൊള്ളക്കാരെ നേരിടാന്‍ വേണ്ടത്ര ആളുകളോ ആയുധശേഷിയോ നിലവില്‍ വനംവകുപ്പിനില്ല. ഇതു പരിഹരിച്ചെങ്കില്‍ മാത്രമേ ചന്ദനമരങ്ങളെ സംരക്ഷിക്കാന്‍ കഴിയൂ എന്നാണ്‌ ഉദ്യോഗസ്ഥര്‍ പറയുന്നത്‌. മരങ്ങളില്‍ മൈക്രോചിപ്പ്‌ ഘടിപ്പിക്കുന്നതു മോഷണം ഗണ്യമായി കുറയ്‌ക്കുമെന്ന്‌ ഉദ്യോഗസ്ഥര്‍ അഭിപ്രായപ്പെട്ടു. കെല്‍ട്രോണ്‍ പോലുള്ള പൊതുമേഖലാ സ്ഥാപനങ്ങളുമായി ബന്ധപ്പെട്ട്‌ ഇതിനുള്ള നടപടികള്‍ ഏതാനും മാസങ്ങള്‍ക്കുള്ളില്‍ പൂര്‍ത്തിയാക്കുമെന്നു വനംവകുപ്പിലെ ഉന്നതോദ്യോഗസ്ഥര്‍ വ്യക്തമാക്കുന്നു.