മന്ത്രിയായാല്‍ ഇങ്ങനെയാകണം. മന്ത്രി കടകം പള്ളിയെ ആയിരങ്ങളാണ് അഭിനന്ദിച്ചത്.കാരണം സാഹസികമായ പ്രവൃത്തി ചെയ്താല്‍ ആരാണ് അഭിനന്ദിക്കാത്തത്. രക്തം വാര്‍ന്ന് ഏറെ നേരം റോഡില്‍ കിടന്നിട്ടും ആരും സഹായിക്കാനില്ലാതെ കിടന്ന ശ്രീജ എന്ന യുവതിയെ മന്ത്രി രക്ഷിച്ചു.

ഭര്‍ത്താവ് കണ്ണനുമൊത്ത് ബൈക്കില്‍ പോകവെയാണ് എതിര്‍ വശത്ത് നിന്നു വന്ന കാര്‍ ശ്രീജയെയും ഭര്‍ത്താവിനെയും ഇടിച്ചിടുകയായിരുന്നു.

ചോര വാര്‍ന്നു കിടന്ന ശ്രീജയെ ആരും നോക്കാതിരുന്നപ്പോഴാണ് മന്ത്രി കടകം പള്ളി അതുവഴി വന്നത്. ഉടന്‍ തന്നെ ഗണ്‍മാനെയുംകൂട്ടി ഗുരുതര പരുക്കേറ്റ സ്ത്രീയെ മന്ത്രി കാറില്‍ കയറ്റി ആശുപത്രിയിലെത്തിച്ചു. ഡോക്ടര്‍മാരെ കണ്ടു ചികിത്സ ഉറപ്പാക്കിയശേഷമായിരുന്നു മടക്കം. നെയ്യാറ്റിന്‍കര സ്വദേശികളാണ് ശ്രീജ(29)യും ഭര്‍ത്താവ് കണ്ണനും. ഗുരുതര പരുക്കേറ്റ ശ്രീജ നഗരത്തിലെ സ്വകാര്യ ആശുപത്രിയില്‍ ചികിത്സയിലാണ്. 

ദേശീയപാതാ ബൈപാസില്‍ ചാക്ക സുബ്രഹ്മണ്യക്ഷേത്രത്തിനു സമീപത്തായിരുന്നു സംഭവം. കഴക്കൂട്ടത്തെ ഒരു ചടങ്ങില്‍ പങ്കെടുത്തശേഷം ഉച്ചഭക്ഷണത്തിനായി വീട്ടിലേക്കു പോകുകയായിരുന്നു മന്ത്രി. ചാക്കയിലെത്തിയപ്പോള്‍ ആള്‍ക്കൂട്ടവും ഗതാഗതക്കുരുക്കും ശ്രദ്ധയില്‍പെട്ട അദ്ദേഹം ഗണ്‍മാനോട് ഇറങ്ങിനോക്കാന്‍ പറഞ്ഞു.

മന്ത്രി നേരിട്ട് ഇടപെടുകയായിരുന്നു. ഗുരുതരമാണ് അവസ്ഥ എന്നറിഞ്ഞപ്പോള്‍ വെറെയൊന്നും നോക്കാതെ ദമ്പതികളെ ആശുപത്രിയിലെത്തിക്കുകയായിരുന്നു. തുടര്‍ന്ന് ആശുപത്രിയില്‍ പ്രവേശിപ്പിച്ചു.

്‌