പേഴ്‌സണല്‍ സ്റ്റാഫിന്റെ വിദ്യാഭ്യാസ യോഗ്യത ചവറ്റു കുട്ടയിലേയ്ക്ക്… ഭാവിയില്‍ നിയമിക്കപ്പെടുന്നവര്‍ക്ക് മാത്രം വിദ്യാഭ്യാസ യോഗ്യത നിര്‍ബന്ധം
മന്ത്രിമാരുടെ പേഴ്‌സണല്‍ സ്റ്റാഫ് അംഗങ്ങള്‍ക്ക് വിദ്യാഭ്യാസ യോഗ്യത നിര്‍ബന്ധമാക്കണമെന്ന ഫയല്‍ ഉന്നതര്‍ പൂഴ്ത്തി. മുഖ്യമന്ത്രിയുടെ ഓഫീസില്‍ ഉന്നത തസ്തികയില്‍ ജോലിചെയ്യുന്ന പത്താംക്ലാസുകാരനാണ് ഫയല്‍ മുക്കുന്നതിന് ചുക്കാന്‍ പിടിച്ചത്. ഭാവിയില്‍ നിയമിക്കപ്പെടുന്നവര്‍ക്ക് മാത്രം വിദ്യാഭ്യാസ യോഗ്യത നിര്‍ബന്ധമാക്കിയാല്‍ മതിയെന്നാണ് സര്‍ക്കാരിന്റെ പുതിയ നിലപാട്.
വിവിധ തസ്തികകള്‍ക്ക് അതാത് തസ്തികക്ക് സംസ്ഥാന സര്‍ക്കാരില്‍ സമാനതയുളള വിദ്യാഭ്യാസയോഗ്യത നിശ്ചയിക്കണമെന്നായിരുന്നു സര്‍ക്കാര്‍ തീരുമാനം. നിലവിലുള്ളവര്‍ക്കും അത് ബാധകമാക്കണമെന്നാണ് സര്‍ക്കാര്‍ തീരുമാനിച്ചത്. എന്നാല്‍ അത് വേണ്ടെന്നു വയ്ക്കാന്‍ മുഖ്യമന്ത്രി തന്നെ നിര്‍ദ്ദേശിക്കുകയായിരുന്നു. സര്‍ക്കാര്‍ കനത്ത സാമ്പത്തിക പ്രതിസന്ധി അനുഭവിക്കുമ്പോള്‍ പേഴ്‌സണല്‍ സ്റ്റാഫ് അംഗങ്ങള്‍ കോടികളാണ് ഖജനാവില്‍ നിന്നും കടത്തുന്നത്.
ശമ്പളത്തിനു പുറമേ റ്റി.എ ഇനത്തിലും കോടികളാണ് പേഴ്‌സണല്‍ സ്റ്റാഫ് കൊണ്ടുപോകുന്നത്. മന്ത്രിമാര്‍ക്ക് ഇതില്‍ പരാതിയേ ഇല്ല. പലപ്പോഴും മന്ത്രാലയങ്ങളെ നിയന്ത്രിക്കുന്നത് പേഴ്‌സണല്‍ സ്റ്റാഫ് അംഗങ്ങളാണ്. മന്ത്രിമാരുടെ സില്‍ബന്തികള്‍ പേഴ്‌സണല്‍ സ്റ്റാഫിലെത്തുമ്പോള്‍ ഐഎഎസുകാര്‍ പോലും ഇവരെ ഭയപ്പെടുന്നു. തങ്ങളെന്തെങ്കിലും പറഞ്ഞാല്‍ മന്ത്രിയോട് നുണ പറഞ്ഞ് തങ്ങളെ തെറിപ്പിക്കുമെന്നാണ് ഉയര്‍ന്ന ഉദ്യോഗസ്ഥരുടെ ഭയം.
സര്‍ക്കാര്‍ സര്‍വീസില്‍ നിന്നും ഒരു നിശ്ചിത ശതമാനം ഉദ്യോഗസ്ഥരെ നിയമിക്കണമെന്ന് വ്യവസ്ഥയുണ്ടെങ്കിലും മന്ത്രിമാര്‍ അതൊന്നും ഗൗനിക്കാറില്ല. സര്‍ക്കാര്‍ സര്‍വീസില്‍ നിന്നും വരുന്നവര്‍ മന്ത്രിമാരെ നിയന്ത്രിക്കുന്നത് ഇഷ്ടപ്പെടാത്തവരാണ് വേലയും ജോലിയുമില്ലാത്ത പേഴ്‌സണല്‍ സ്റ്റാഫ് അംഗങ്ങള്‍. അതുകൊണ്ടു തന്നെ ഉദ്യോഗസ്ഥര്‍ സാധാരണ ജോലിയില്ലാത്ത പേഴ്‌സണല്‍ സ്റ്റാഫിനെ ഭരിക്കാന്‍ ചെല്ലാറില്ല.
സംസ്ഥാന മന്ത്രിസഭയിലെ മിക്കവാറും മന്ത്രിമാരുടെ സ്റ്റാഫിലുള്ളത് വേണ്ടത്ര വിദ്യാഭ്യാസം ഇല്ലാത്തവരാണ്. ഉയര്‍ന്ന തസ്തികകളിലാണ് ഇവരെയൊക്കെ നിയമിച്ചിരിക്കുന്നത്. ഒരു ദിനപത്രം പേഴ്‌സണല്‍ സ്റ്റാഫിന്റെ തട്ടിപ്പുകള്‍ പുറത്തു കൊണ്ടുവന്നതോടെയാണ് സര്‍ക്കാര്‍ ഇതു സംബന്ധിച്ച് തീരുമാനമെടുക്കാന്‍ നിര്‍ബന്ധിതമായത്. എന്നാല്‍ തുടക്കം മുതല്‍ തന്നെ സര്‍ക്കാര്‍ തീരുമാനത്തെ അട്ടിമറിക്കാനുള്ള ശ്രമങ്ങള്‍ നടന്നിരുന്നു. കാരണം തീരുമാനമെടുക്കേണ്ട മുഖ്യമന്ത്രിയുടെ ഓഫീസിലും വേണ്ടത്ര വിദ്യാഭ്യാസമില്ലാത്തയാള്‍ ഉന്നത തസ്തികയില്‍ ജോലി ചെയ്യുന്നുണ്ട്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
