പ്രധാനമന്ത്രി നരേന്ദ്ര മോഡിയെ അനുകൂലിച്ച് സോഷ്യല്‍ മീഡിയയില്‍ പോസ്റ്റിട്ട് വിവാദം വിളിച്ചു വരുത്തിയതിനു പിന്നാലെ ശശി തരൂരിന്റെ അടുത്ത നമ്പര്‍. ഇത്തവണ സ്വന്തം പാര്‍ട്ടിക്കാരെ സുഖിപ്പിക്കാനാണ് കക്ഷിയുടെ ട്വീറ്റ്. മോഡിയെ ഉപദേശിച്ചുകൊണ്ടാണ് തരൂരിന്റെ പുതിയ ട്വീറ്റ് പുറത്തുവന്നത്. മോഡിയുടെ നടപടികളില്‍ ഭൗതിക ശുചിത്വം മാത്രംപോര, ആത്മീയ ശുചിത്വവും വേണം. മോഡി ഗാന്ധിജിയുടെ പാത പിന്തുടരണമെന്നും തരൂര്‍ ട്വിറ്ററില്‍ വ്യക്തമാക്കി. വിദ്വേഷം, അസഹിഷ്ണുത, മതഭ്രാന്ത് എന്നിവയില്‍ നിന്ന് രാജ്യം മുക്തമാവണം. ഇതിനായി മോദി പ്രവര്‍ത്തിക്കണമെന്നും തരൂര്‍ ട്വീറ്റിലൂടെ പറയുന്നു.

പ്രധാനമന്ത്രി നരേന്ദ്ര മോഡിയെ പ്രശംസിച്ച സംഭവത്തില്‍ ശശി തരൂരിനെതിരെ കേരളത്തിലെ കോണ്‍ഗ്രസ് നേതാക്കള്‍ ഒന്നടങ്കം രംഗത്തെത്തിയിരുന്നു. കോണ്‍ഗ്രസ് മുഖപത്രമായ വീക്ഷണവും തരൂരിനെ രൂക്ഷമായി വിമര്‍ശിച്ചിരുന്നു. മോഡി പ്രശംസയുമായി ബന്ധപ്പെട്ട് തരൂരിനെതിരെ നടപടിയെടുക്കണമോയെന്ന് കെപിസിസി നാളെ തീരുമാനിക്കാനിരിക്കെയാണ് മോഡിയെ ഉപദേശിച്ച് തരൂരിന്റെ പുതിയ ട്വീറ്റ്.

കോണ്‍ഗ്രസ് പാര്‍ട്ടിയിലെ ന്യൂജനറേഷനില്‍ പലര്‍ക്കും തരൂരിനെ പിന്തുണയ്ക്കണമെന്നുണ്ട്. എന്നാല്‍ പരസ്യമായി രംഗത്തു വരാന്‍ എല്ലാവര്‍ക്കും മടിയാണ്. മുതിര്‍ന്നവര്‍ കടന്നാക്രമിച്ചാലോ എന്നാണ് ഇവരുടെ പേടി. കെപിസിസി ജനറല്‍ സെക്രട്ടറി ടി.സിദ്ധിഖ് മാത്രമാണ് ഇപ്പോള്‍ തരൂരിനെ അനുകൂലിച്ചിരിക്കുന്നത്. തരൂരിന് പിന്തുണയുമായി ഒ.രാജഗോപാല്‍ രംഗത്തെത്തിയിരുന്നു.രാജ്യസ്‌നേഹമുള്ളതുകൊണ്ടാണ് തരൂര്‍ മോഡിയെ പിന്തുണച്ചത്. അതില്‍ കോണ്‍ഗ്രസുകള്‍ ക്ഷുഭിതരാകുന്നത് എന്തിനാണെന്നും രാജഗോപാല്‍ പ്രതികരിച്ചു.

ബിജെപി സര്‍ക്കാരിന്റെ സ്വച്ഛ് ഭാരത് പദ്ധതിയിലേക്കു തരൂരിനെ പ്രധാനമന്ത്രി നരേന്ദ്ര മോഡി ക്ഷണിച്ചിരുന്നു. മോഡിയുടെ ഈ നടപടിയെ പുകഴ്ത്തികൊണ്ട് തരൂര്‍ ട്വീറ്റ് ചെയ്തിരുന്നു. നേരത്തേയും മോഡി അനുകൂല പ്രസ്താവനകള്‍ തരൂരില്‍ നിന്നുണ്ടായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha