കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയേയും സഹോദരി പ്രിയങ്ക ഗാന്ധിയേയും രാവണനും ശൂര്‍പ്പണകയുമാക്കി ബി.ജെ.പി നേതാവ് സുരേന്ദ്ര സിംഗ്.പ്രധാനമന്ത്രി നരേന്ദ്രമോദി രാമനാണെന്നും ജനാധിപത്യ വിശ്വാസികള്‍ രാവണനും ശൂര്‍പ്പണകയ്ക്കുമെതിരെ പോരാടണമെന്നും യു.പിയില്‍ നിന്നുള്ള ബി.ജെ.പി എം.എല്‍.എ കൂടിയായ സുരേന്ദ്ര സിംങ് പറഞ്ഞു.കഴിഞ്ഞ ദിവസം രാഹുല്‍ ഗാന്ധിയെ രാമനോട് സാദൃശ്യപ്പെടുത്തി പട്‌നയില്‍ പോസ്റ്ററുകള്‍ പ്രത്യക്ഷപ്പെട്ടിരുന്നതിനെ തുടര്‍ന്നാണ് വിവാദ പ്രസ്താവനയുമായി സുരേന്ദ്ര സിംഗ് വീണ്ടും രംഗത്തെത്തിയത്.

നമുക്കെല്ലാവര്‍ക്കും അറിയാവുന്നത് പോലെ യുദ്ധം ഉണ്ടാകുന്നതിന് മുന്‍പ് രാവണന്‍ ശൂര്‍പ്പണകയെ രാമന്റെയടുത്ത് അയച്ചുവെന്നും അതുപോലെയാണ് രാഹുല്‍ ഗാന്ധി പ്രിയങ്കയെ യുപിയിലേക്ക് അയച്ചതെന്നും സുരേന്ദ്ര സിംഗ് പറഞ്ഞു.ഇതുകൊണ്ട് ഒന്നും സംഭവിക്കാന്‍ പോകുന്നില്ലെന്നും വിജയം രാമനായ നരേന്ദ്ര മോദിക്കാണെന്നും സുരേന്ദ്ര സിംഗ് ഉറപ്പിച്ചു പറഞ്ഞു. മാത്രമല്ല ഈ നീക്കങ്ങള്‍ ജനങ്ങള്‍ തിരിച്ചറിയണമെന്നും സുരേന്ദ്ര സിംഗ് ആവശ്യപ്പെട്ടു.

ലോക്‌സഭാ തിരഞ്ഞെടുപ്പില്‍ ഭരണ ചക്രം എങ്ങോട്ട് തിരിക്കണം എന്ന് തീരുമാനിക്കുന്നത് യു.പിയിലെ സീറ്റുകളായിരിക്കും. ഇത് മുന്നില്‍ കണ്ട് പ്രിയങ്ക ഗാന്ധിയെ യു.പിയുടെ ചുമതലയുള്ള എ.ഐ.സി.സി ജനറല്‍ സെക്രട്ടറിയായും നിയമിച്ചിരുന്നു.