ഛത്തീസ്ഗഡിലെ ബസ്തര്‍, ദന്തേവാദ പ്രദേശങ്ങളില്‍ ആദ്യ മാവോവാദി വിരുദ്ധ വനിതാസേനയെ വിന്യസിച്ചു
ഛത്തീസ്ഗഡിലെ ബസ്തര്‍, ദന്തേവാദ പ്രദേശങ്ങളില്‍ ആദ്യ മാവോവാദി വിരുദ്ധ വനിതാസേനയെ വിന്യസിച്ചു. ദന്തേശ്വരി ഫൈറ്റേഴ്‌സ് എന്ന പുതിയ ബറ്റാലിയനില്‍ 30 വനിതാസൈനികരുണ്ട്. സേനയുടെ നേതൃത്വം ഡെപ്യൂട്ടി സൂപ്രണ്ട് ദിനേശ്വരി നന്ദിനാണ്.
നക്‌സല്‍ മാവോവാദി വിരുദ്ധ സേനയിലെ അഞ്ചംഗങ്ങള്‍ മാവോവാദി പ്രവര്‍ത്തനം ഉപേക്ഷിച്ചിച്ചെത്തിയവരാണെന്നത് കൗതുകകരമായ വസ്തുതയാണ്. ബസ്തര്‍ വനമേഖലയില്‍ താവളമുറപ്പിച്ചിരിക്കുന്ന മാവോവാദികളെ കുറിച്ച് വ്യക്തമായ ധാരണ ലഭിച്ചവരായതിനാല്‍ ഇവര്‍ക്ക് മാവോവാദികള്‍ക്കെതിരെയുള്ള പ്രവര്‍ത്തനം കൂടുതല്‍ ശക്തമാക്കാന്‍ കഴിയുമെന്നാണ് കരുതുന്നത്. ദന്തേവാദ മേഖല എസ്പി അഭിഷേക് പല്ലവിന്റെ കീഴിലാണ് ഇവര്‍ പരിശീലനം പൂര്‍ത്തിയാക്കിയത്.
ബൈക്കോടിക്കല്‍, നൂതന സാങ്കേതിക വിദ്യ, അത്യാധുനിക ആയുധങ്ങളുടെ ഉപയോഗം ഇവയിലെല്ലാം വനിതാ അംഗങ്ങള്‍ക്ക് മികച്ച പരിശീലനം നല്‍കിയിട്ടുണ്ട്. ഛത്തീസ്ഗഡ് പോലീസ് അടുത്തിടെയാണ് ജില്ലാ റിസര്‍വ് ഗാര്‍ഡിലേക്ക് വനിതാ കമാന്‍ഡോകള്‍ക്ക് നിയമനാനുമതി നല്‍കിയത്.
ഇതിന് തൊട്ടു പിന്നാലെയാണ് പൂര്‍ണമായും വനിതാ അംഗങ്ങളുടെ സേനയെ നക്‌സല്‍ വിരുദ്ധ പ്രവര്‍ത്തനത്തിനായി നിയോഗിച്ചിരിക്കുന്നത്. പോലീസ് സേനയിലെ വനിതാ കമാന്‍ഡോകള്‍ക്കും ദന്തേശ്വരി ഫൈറ്റേഴ്‌സിനും ഉള്‍വനത്തിലെ ഏറ്റുമുട്ടലുകള്‍ക്കായി പ്രത്യേക പരിശീലനം നല്‍കിയിട്ടുണ്ട്.
ബസ്തര്‍ മേഖലയിലെ സിആര്‍പിഎഫ് യുവസൈനികരെ ചേര്‍ത്തു കൊണ്ട് ഒരു കൊല്ലം മുമ്പ് ബസ്താരിയ ബറ്റാലിയന്‍ രൂപീകരിച്ചിരുന്നു. ഈ സംഘത്തില്‍ യുവാക്കള്‍ക്കൊപ്പം യുവതികളേയും നിയമിച്ചിരുന്നു. ബസ്താരിയ ബറ്റാലിയന്‍ അംഗങ്ങളുടെ പരിശീലനം പൂര്‍ത്തിയായിക്കഴിഞ്ഞു.
https://www.facebook.com/Malayalivartha
