ഗോവ ദബോലിം വിമാനത്താവളത്തിന്റെ റണ്‍വേയില്‍ തെരുവുനായ്ക്കളെ കണ്ടതിനെ തുടര്‍ന്ന് വിമാനം നിലത്തിറക്കാന്‍ കഴിയാതെ എയര്‍ ഇന്ത്യ പൈലറ്റ് ബുദ്ധിമുട്ടി. ചൊവ്വാഴ്ച പുലര്‍ച്ചെയാണു സംഭവം. വിമാനം ലാന്‍ഡ് ചെയ്യാന്‍ സെക്കന്‍ഡുകള്‍ മാത്രം ബാക്കിയുണ്ടായിരുന്നപ്പോഴാണ് റണ്‍വേയില്‍ നായ്ക്കളെ കണ്ടതെന്ന് യാത്രികരിലൊരാള്‍ ഫെയ്‌സ്ബുക്കില്‍ കുറിച്ചു.

പതിമൂന്നിന് പുലര്‍ച്ചെ മൂന്നോടെയാണ് മുംബൈയില്‍നിന്നുള്ള എയര്‍ ഇന്ത്യ വിമാനം എഐ 033 ഗോവയിലിറങ്ങേണ്ടിയിരുന്നത്. അനുമതി നല്‍കിയതിനു പിന്നാലെ റണ്‍വേയില്‍ തെരുവുനായ്ക്കള്‍ നില്‍ക്കുന്നത് പൈലറ്റിന്റെ ശ്രദ്ധയില്‍പ്പെടുകയായിരുന്നു. ഉടന്‍ തന്നെ വിവരം എയര്‍ട്രാഫിക് കണ്‍ട്രോളിനെ അറിയിച്ച് വീണ്ടും പറന്നുയര്‍ന്നു. ഏകദേശം 15 മിനിറ്റുകള്‍ക്കുശേഷം രണ്ടാമതും ശ്രമിച്ചതോടെ വിമാനം സുരക്ഷിതമായി നിലത്തിറക്കി. ഇരുട്ടായതിനാല്‍ നായ്ക്കളെ കണ്ടില്ലെന്നാണ് അധികൃതരുടെ ഔദ്യോഗിക വിശദീകരണം.

ഇറങ്ങാനുള്ള നിര്‍ദേശത്തിനുശേഷം വിമാനം വീണ്ടും പറന്നുയര്‍ന്നതോടെ, യാത്രക്കാരനായ ഗോവിന്ദ് ഗോയങ്കര്‍ പൈലറ്റിനോട് വിവരം അന്വേഷിച്ചപ്പോഴാണ് നായ്ക്കള്‍ നില്‍ക്കുന്ന വിവരം പറഞ്ഞതെന്ന് അദ്ദേഹം പറഞ്ഞു. അഞ്ചോ ആറോ നായ്ക്കള്‍ റണ്‍വേയിലുണ്ടായിരുന്നുവെന്നും അദ്ദേഹം പറയുന്നു. ഗോവ മുന്‍മുഖ്യമന്ത്രിയും പ്രതിപക്ഷ നേതാവുമായ ദിഗംബര്‍ കമാത്ത് ഗോവിന്ദിന്റെ പോസ്റ്റ് ട്വിറ്ററില്‍ ഷെയര്‍ ചെയ്യുകയും വിമര്‍ശനം ഉന്നയിക്കുകയും ചെയ്തു. സിവല്‍ ഏവിയേഷന്‍ വകുപ്പിന്റെ വീഴ്ചയാണെന്നും ഇത് യാത്രക്കാരുടെ സുരക്ഷയെ ബാധിക്കുന്നതാണെന്നും അദ്ദേഹം വിമര്‍ശിക്കുകയും ചെയ്തു.

ഗോവ വിമാനത്താവളത്തിന്റെ പരിസരത്ത് തെരുവുനായ്ക്കളുടെ ശല്യം രൂക്ഷമാണ്. ഏകദേശം 200-ഓളം നായ്ക്കള്‍ ഇവിടെയുണ്ടെന്നാണ് കണക്ക്. ഇവയെ വന്ധീകരിച്ച് സംരക്ഷണകേന്ദ്രങ്ങളിലേക്ക് മാറ്റാനുള്ള പദ്ധതികള്‍ സര്‍ക്കാരിന്റെ പരിഗണനയിലാണ്. നിലവില്‍ ആളുകളെ നിയോഗിച്ച് ഇവ റണ്‍വേയിലേക്ക് പ്രവേശിക്കാതിരിക്കാനുള്ള നടപടികള്‍ സ്വീകരിച്ചിട്ടുണ്ടെന്ന് അധികൃതര്‍ വ്യക്തമാക്കിയിട്ടുണ്ട്.