രാജ്യതലസ്ഥാനത്തെ കോവിഡ് മരണങ്ങള് ഡല്ഹി സര്ക്കാര് മറച്ചുവെച്ചതായി വെളിപ്പെടുത്തി മുനിസിപ്പല് കോര്പ്പറേഷന്റെ കണക്കുകള്... വിറച്ച് തലസ്ഥാനം
രാജ്യതലസ്ഥാനത്തെ കോവിഡ് മരണങ്ങള് ഡല്ഹി സര്ക്കാര് മറച്ചുവെച്ചതായി വെളിപ്പെടുത്തി മുനിസിപ്പല് കോര്പ്പറേഷന്റെ കണക്കുകള്. ഇതുവരെ 2098 പേര് കോവിഡ് ബാധിച്ചു മരിച്ചെന്നാണ് വടക്കന് ഡല്ഹി മുനിസിപ്പല് കോര്പ്പറേഷന് സ്റ്റാന്ഡിങ് കമ്മിറ്റി ചെയര്മാന് ജയ് പ്രകാശിന്റെ വെളിപ്പെടുത്തല്. എന്നാല്, ബുധനാഴ്ചവരെയുള്ള സംസ്ഥാന സര്ക്കാര് കണക്കില് മരണസംഖ്യ 984 മാത്രമാണ്. രോഗവ്യാപനം അതിരൂക്ഷമായ പശ്ചാത്തലത്തില് ഡല്ഹിയില് കര്ശനമായ അടച്ചിടല് ആവശ്യപ്പെട്ട് അഭിഭാഷകന് അനിര്ബാന് മണ്ഡല് ഹൈക്കോടതിയില് പൊതുതാത്പര്യഹര്ജി നല്കി.
പുരാതന ഡല്ഹിയിലെ ജമാ മസ്ജിദില് ഇമാമിന്റെ സെക്രട്ടറി രോഗം ബാധിച്ചു മരിച്ചതിനെത്തുടര്ന്ന് പള്ളി 30 വരെ അടച്ചിട്ടു. സി.ആര്.പി.എഫ്. ചീഫ് മെഡിക്കല് ഓഫീസറെ രോഗബാധയെത്തുടര്ന്ന് ഓഖ്ലയില് ആശുപത്രിയില് പ്രവേശിപ്പിച്ചു. ഇതോടെ, സേനയില് രോഗം ബാധിച്ചവരുടെ എണ്ണം 544 ആയി. ആര്ച്ച് ബിഷപ്പ് വിന്സെന്റ് കോണ്സസോവയും രോഗം സ്ഥിരീകരിച്ച് ആശുപത്രിയിലാണ്.
മൂന്നു മുനിസിപ്പല് കോര്പ്പറേഷനുകളുടെയും പരിധിയില് സംസ്കരിച്ച മൃതദേഹങ്ങളുടെ കണക്കു നിരത്തിയാണ് ജെയ് പ്രകാശിന്റെ വെളിപ്പെടുത്തല്. മാര്ച്ച്മുതല് ജൂണ് പത്തു വരെയുള്ള കണക്കില് 2098 പേര് മരിച്ചു. കോവിഡ് ബാധിച്ചു മരിച്ചതെന്നു സംശയിക്കുന്ന 200 പേരുടെ മൃതദേഹവും ഇതില് ഉള്പ്പെടും. മരണസംഖ്യ ശേഖരിച്ച് മേയ് 17-ന് മൂന്നു കോര്പ്പറേഷനുകളും സര്ക്കാരിനു സമര്പ്പിച്ചിരുന്നു. എന്തുകൊണ്ടാണ് യഥാര്ഥ കണക്കുകള് സര്ക്കാര് മറച്ചുവെക്കുന്നതെന്ന് അറിയില്ലെന്നും ജെയ് പ്രകാശ് പറഞ്ഞു.
ആരാധനാലയങ്ങളും മാളുകളും ഭക്ഷണശാലകളുമൊക്കെ തുറക്കുകയും പൊതുഗതാഗതം പുനരാരംഭിക്കുകയുമൊക്കെ ചെയ്തതോടെ ഡല്ഹിയില് കോവിഡ് കുതിച്ചുയര്ന്നെന്നാണ് പൊതുതാത്പര്യ ഹര്ജിയിലെ വാദം. ആശുപത്രികളില് കിടക്കകള്, വെന്റിലേറ്ററുകള് തുടങ്ങിയവയുടെ വലിയ അഭാവമുണ്ടെന്നും ചൂണ്ടിക്കാട്ടി. ജനങ്ങളുടെ സുരക്ഷ മുന്നിര്ത്തി കര്ശനമായ അടച്ചിടല് ഏര്പ്പെടുത്താന് ഉത്തരവിടണമെന്നാണ് ആവശ്യം.
ഇതിനിടെ, മനുഷ്യാവകാശ കമ്മിഷന് സംഘം കോവിഡ് ആശുപത്രിയായ എല്.എന്.ജെ.പി.യില് മിന്നല് പരിശോധന നടത്തി. സര്ക്കാര് മതിയായ സൗകര്യമൊരുക്കുന്നില്ലെന്നു ചൂണ്ടിക്കാട്ടിയുള്ള പരാതിയില് കഴിഞ്ഞദിവസം കമ്മിഷന് ഡല്ഹി സര്ക്കാരിനു നോട്ടീസയച്ചിരുന്നു.
https://www.facebook.com/Malayalivartha
