ലോകത്ത് ഏറ്റവും കൂടുതല്‍ കൊറോണ രോഗികളുള്ള നാലാമത്തെ രാജ്യമായി ഇന്ത്യ. നേരത്തെ നാലാം സ്ഥാനത്തുള്ള ബ്രിട്ടനെയാണ് രോഗികളുടെ എണ്ണത്തില്‍ ഇന്ത്യ മറികടന്നത്. ഇന്ത്യയില്‍ ഇന്നലെ വൈകീട്ടത്തെ കണക്കുപ്രകാരം 2,95 772 രോഗികളാണ് ഉള്ളത്. ഇന്നലെ മാത്രം 9996 രോഗികള്‍ക്കാണ് പുതുതായി കൊറോണ ബാധ ഉണ്ടായതായി കണക്കാക്കുന്നത്.. പ്രതിദിന രോഗബാധ പതിനായിരത്തോളമായ സാഹചര്യത്തിൽ ഇന്ത്യ ബ്രിട്ടണിനെ മറികടന്നതായി കൊവിഡ് വേൾഡോ മീറ്റർ വ്യക്തമാക്കുന്നു. ബ്രിട്ടനില്‍ 2,91,588 രോഗികളാണ് ഉണ്ടായിരുന്നത്. അമേരിക്ക, ബ്രസീല്‍, റഷ്യ എന്നീ രാജ്യങ്ങളിലാണ് ഇന്ത്യയെക്കാള്‍ കൂടുതല്‍ കോവിഡ് രോഗികളുള്ളത്. റഷ്യയില്‍ അഞ്ച് ലക്ഷത്തോളം രോഗികളും ബ്രസീലില്‍ എട്ട് ലക്ഷത്തോളം രോഗികളുമാണുള്ളത്. അമേരിക്കയില്‍ ഇതിനകം രോഗികളുടെ എണ്ണം 20 ലക്ഷമായിട്ടുണ്ട്

രാജ്യത്ത് കൊവിഡ് വലിയൊരു വിഭാഗത്തെ ബാധിച്ചേക്കാമെന്നും വരും ദിവസങ്ങളില്‍ കൊവിഡ് ബാധിതരുടെ എണ്ണം കുതിച്ചുയരുമെന്നും ഐസിഎംആര്‍ വ്യക്തമാക്കിയിരുന്നു. രോഗം മാസങ്ങളോളം നീണ്ടു നിന്നേക്കാമെന്നും ഐസിഎംആര്‍ മുന്നറിയിപ്പ് നല്‍കി. രാജ്യത്തെ 83 ജില്ലകളിലെ 26,400 പേരില്‍ നടത്തിയ സെറോളജിക്കല്‍ സര്‍വ്വേയുടെ ഫലമാണ് ഐസിഎംആര്‍ പുറത്ത് വിട്ടത്. നിലവിലുള്ള രോഗബാധിതരുടെ മൂന്നിരട്ടി പേര്‍ക്ക് കൊവിഡ് ബാധിച്ചിരിക്കാം. ലക്ഷണങ്ങള്‍ പ്രകടമല്ലാത്തതിനാല്‍ രോഗം തിരിച്ചറിഞ്ഞിട്ടുണ്ടാവില്ല. നഗരപ്രദേശങ്ങളിലെ ചേരികളില്‍ രോഗവ്യാപനം അതിതീവ്രമാണെന്നും ഐസിഎംആര്‍ വ്യക്തമാക്കുന്നു.
കഴിഞ്ഞ മാസം 24 മുതലാണ് ഇന്ത്യയില്‍ കൊറോണ രോഗികളുടെ എണ്ണം വലിയ തോതില്‍ വര്‍ധിക്കാന്‍ തുടങ്ങിയത്. അന്ന് ലോകത്ത് രോഗികളുടെ എണ്ണത്തില്‍ ഇന്ത്യയുടെ സ്ഥാനം പത്താമതായിരുന്നു. പിന്നീട് പത്തുദിവസം കൊണ്ടാണ് ഇന്ത്യയില്‍ രോഗികളുടെ എണ്ണം വര്‍ധിച്ച് ലോകത്ത് നാലാം സ്ഥാനത്ത് എത്തിയത്. ഇറ്റലി,സ്‌പെയിന്‍ തുടങ്ങി ലോകത്ത് കൊറോണ ഏറ്റവും കൂടുതല്‍ ബാധിച്ച രാജ്യങ്ങളെയൊക്കെ രോഗികളുടെ എണ്ണത്തില്‍ ഇന്ത്യ പിന്താങ്ങിയത് ഈ ദിവസങ്ങളിലാണ്. കഴിഞ്ഞ ഒരാഴ്ചയായി ഇന്ത്യയില്‍ രോഗികളുടെ എണ്ണം പ്രതിദിനം 9000 മുകളിലാണ്. ഇന്നലെ 9996 രോഗികളാണ് പുതുതായി തിരിച്ചറിഞ്ഞത്. 8500 പേര്‍ ഇന്ത്യയില്‍ ഇതിനകം കൊറോണ ബാധിച്ച് മരിച്ചു. ഇന്നലെ 350 പേരാണ് മരിച്ചത്.

ഇന്ത്യയില്‍ രോഗികളുടെ എണ്ണത്തില്‍ വലിയ തോതില്‍ വര്‍ധനയുണ്ടാകുന്നുണ്ടെങ്കിലും സമൂഹ വ്യാപനം ഇന്ത്യയില്‍ ഉണ്ടായിട്ടില്ലെന്നാണ് അധികൃതര്‍ പറയുന്നത്. ഇക്കാര്യം ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ച് കഴിഞ്ഞ ദിവസവും വിശദീകരിച്ചു. ' ഇന്ത്യയില്‍ ഇതുവരെ സമുഹ വ്യാപനം ഉണ്ടായിട്ടില്ല. എന്നാല്‍ ടെസ്റ്റ് ചെയ്യുക രോഗികള്‍ ബന്ധപ്പെട്ടവരെ കണ്ടെത്തുക തുടങ്ങി ഇപ്പോള്‍ സ്വീകരിക്കുന്ന നടപടികള്‍ തുടരണം' ഐസിഎംആര്‍ ഡയറക്ടര്‍ ജനറല്‍ ഭാര്‍ഗവ കഴിഞ്ഞ ദിവസം പറഞ്ഞു. മെയ് മൂന്നാം വാരത്തില്‍ ഐസിഎംആര്‍ രാജ്യത്തെ 83 ജില്ലകളില്‍ നടത്തിയ സര്‍വെ പ്രകാരം ഒരു ശതമാനത്തില്‍ കുറവ് ആളുകളില്‍ മാത്രമെ വൈറസ് ബാധ ഉണ്ടായതായി കണ്ടെത്തിയിട്ടുള്ളു. ഇന്ത്യയില്‍ ലോക്ഡൗണ്‍ ഫലപ്രദമായിരിന്നു എന്ന് ഇത് തെളിയിക്കുന്നതയായും ഐസിഎംആര്‍ വ്യക്തമാക്കി. നഗരപ്രദേശങ്ങളിലാണ് ഗ്രാമങ്ങളേക്കാള്‍ രോഗ സാധ്യതയെന്നാണ് റിപ്പോര്‍ട്ടിലെ കണ്ടെത്തല്‍.

അതേസമയം ലോകത്ത് ആകെ കൊവിഡ് രോഗികളുടെ എണ്ണം എഴുപത്തിയഞ്ച് ലക്ഷത്തി എൺപത്തിരണ്ടായിരം പിന്നിട്ടു. നാല് ലക്ഷത്തി ഇരുപത്തിമൂന്നായിരത്തിലധികം പേര്‍ മരിച്ചു. 4,937 പേരാണ് ഇരുപത്തിനാല് മണിക്കൂറിനുള്ളിൽ മരിച്ചത്. ബ്രസീലിൽ മാത്രം ഇന്നും ആയിരത്തിൽ അധികം പേർ മരിച്ചു. ആകെ രോഗികൾ എട്ട് ലക്ഷം കടന്നു. രോഗവ്യാപനം ഓഹരിവിപണികളിലും പ്രതിഫലിച്ചു.