ഉത്തര്‍പ്രദേശിലെ ബല്‍റാംപൂരിലെ സര്‍ക്കാര്‍ ഓഫീസിന് മുന്നില്‍ കുഴഞ്ഞുവീണ് മരിച്ചയാളുടെ മൃതദേഹം മുനിസിപ്പല്‍ കോര്‍പ്പറേഷന്‍ ജീവനക്കാര്‍ മാലിന്യവണ്ടിയില്‍ കയറ്റി പോലീസ് സ്‌റ്റേഷനിലെത്തിച്ചു. സ്ഥലത്ത് ആംബുലന്‍സ് ലഭ്യമായിരുന്നുവെങ്കിലും കോവിഡ് ബാധിച്ച് മരിച്ചയാളാവാം എന്നു കരുതിയാണ് ആരും സഹായത്തിന് എത്താതിരുന്നത്.

. പോലീസുകാര്‍ ഉള്‍പ്പെടെ നോക്കി നില്‍ക്കെയായിരുന്നു ഈ സംഭവം. സ്ഥലത്ത് ആംബുലന്‍സ് ഉണ്ടായിട്ടും കോവിഡ് പേടി മൂലം അവര്‍ ഇയാളുടെ മൃതശരീരം എടുക്കാനും തയാറായില്ല. സംഭവത്തില്‍ ഒരു എസ്.ഐ ഉള്‍പ്പെടെ മൂന്ന് പോലീസുകാരെ സസ്‌പെന്‍ഡ് ചെയ്തിട്ടുണ്ട്.

ബല്‍റാംപുര്‍ സ്വദേശിയായ മുഹമ്മദ് അന്‍വര്‍ (42) ആണ് മരിച്ചത്. പ്രദേശത്തെ സര്‍ക്കാര്‍ ഓഫീസിലെത്തിയ അദ്ദേഹം പ്രവേശന കവാടത്തില്‍ കുഴഞ്ഞുവീണ് മരിക്കുകയായിരുന്നു. മൊബൈല്‍ ഫോണില്‍ പകര്‍ത്തിയ സംഭവത്തിന്റെ വീഡിയോ ദൃശ്യങ്ങള്‍ സാമൂഹ്യ മാധ്യമങ്ങളില്‍ പ്രചരിച്ചതോടെ മൂന്ന് പോലീസ് ഉദ്യോഗസ്ഥരെയും മൂന്ന് മുനിസിപ്പല്‍ കോര്‍പ്പറേഷന്‍ ജീവനക്കാരെയും അധികൃതര്‍ സസ്‌പെന്‍ഡു ചെയ്തു.

സംഭവം ഒരു വിധത്തിലും ന്യായീകരിക്കാന്‍ പറ്റില്ലെന്നും മനുഷ്യത്വഹീനമായ നടപടിയാണ് ഉണ്ടായതെന്നും ബല്‍റാംപൂര്‍ പോലീസ് തലവന്‍ ദേവ് രഞ്ജന്‍ വര്‍മ പിന്നീട് വ്യക്തമാക്കി. കോവിഡ് ബാധിച്ചാണോ അന്‍വര്‍ മരിച്ചത് എന്നറിയില്ല. എന്നാല്‍ ഇത്തരമൊരു സമീപനം ഒരുവിധത്തിലും അംഗീകരിക്കാന്‍ പറ്റില്ലെന്നും അദ്ദേഹം പറഞ്ഞു. ഇതിനു പിന്നാലെയാണ് ദൃശ്യങ്ങളില്‍ കാണുന്ന എസ്.ഐ ഉള്‍പ്പെടെ മൂന്ന് പോലീസുകാരെയും സസ്‌പെന്‍ഡ് ചെയ്യാന്‍ തീരുമാനിച്ചത്. നാല് മുന്‍സിപ്പല്‍ തൊഴിലാളികളും സംഭവത്തില്‍ കുറ്റക്കാരാണെന്നാണ് അധികൃതര്‍ പറയുന്നത്.
. കോവിഡ് സംശയിക്കുന്ന ആളെ പിപിഇ സ്യൂട്ട് ധരിച്ച് ആംബുലന്‍സില്‍ ആശുപത്രിയില്‍ എത്തിക്കേണ്ടതായിരുന്നു. സംഭവത്തില്‍ അന്വേഷണം തുടങ്ങിയെന്നും പോലീസ് സൂപ്രണ്ട് പറഞ്ഞു.മരിച്ച മുഹമ്മദ് അന്‍വറിന് കോവിഡ് ബാധയുണ്ടോ എന്നകാര്യം വ്യക്തമായിട്ടില്ല.ഇന്നലെയാണ് അന്‍വര്‍ മരിച്ചത്. ഇന്ന് ഉച്ചയോടു കൂടിയാണ് ഇതു സംബന്ധിച്ച ദൃശ്യങ്ങള്‍ സോഷ്യല്‍ മീഡിയയില്‍ പ്രത്യക്ഷപ്പെട്ടത്. എന്‍ഡിടിവി ഉത്തര്‍ പ്രദേശ് ലേഖകന്‍ അലോക് പാണ്ഡെ ഇക്കാര്യം ചൂണ്ടിക്കാട്ടി ട്വിറ്ററില്‍ പോസ്റ്റ് ചെയ്തിരുന്നു.ഇതിനു പിന്നാലെ പ്രദേശവാസികള്‍ പകര്‍ത്തിയ ദൃശ്യങ്ങളും അദ്ദേഹം പങ്കുവച്ചു. സ്ഥലത്ത് ആംബുലന്‍സ് എത്തിയിട്ടും അതില്‍ മരിച്ചയാളെ കൊണ്ടു പോകാന്‍ തയാറാകാത്തതിന്റെ ദൃശ്യങ്ങളാണത്.