പശുവിൻ്റെ മൂത്രം കുടിച്ചാൽ കൊവിഡിനെ തടയാമെന്നും, ദിവസവും ഗോമൂത്രം കുടിച്ചാൽ കൊവിഡ് പ്രതിരോധ കുത്തിവെപ്പ് സ്വീകരിക്കേണ്ടതില്ലെന്നും ബിജെപി എംപി പ്രഗ്യാ താക്കൂര്‍, കൂടാതെ ഗോമൂത്രം കുടിക്കുന്ന സമയത്ത് പ്രാർഥനയും നടത്തണം

കൊവിഡ്-19 ബാധിക്കാതിരിക്കാൻ ഇന്ത്യൻ പശുവിൻ്റെ മൂത്രം കുടിച്ചാൽ മതിയെന്ന് ബിജെപി എംപി പ്രഗ്യാ സിങ് താക്കൂർ. ദിവസവും ഗോമൂത്രം കുടിച്ചാൽ കൊവിഡ് പ്രതിരോധ കുത്തിവെപ്പ് എടുക്കേണ്ടതില്ലന്നും, മരുന്നും കഴിക്കേണ്ടതില്ലെന്നും, ശ്വാസ കോശത്തിലെ അണുബാധ തടയാൻ ഗോമൂത്രം മികച്ചതാണെന്നും ഇവർ വ്യക്തമാക്കുന്നു.

രാജ്യത്ത് ഓക്‌സിജൻ ക്ഷാമത്തിന് കാരണമായത് ആലും വേപ്പും പോലെയുള്ള മരങ്ങൾ കുറഞ്ഞതാണ്. ചില ആളുകൾ മരങ്ങൾ വ്യാപകമായി വെട്ടിനശിപ്പിക്കുകയാണ്. വേപ്പ്, ആൽ, തുളസി എന്നിവ നട്ടുവളർത്തണം. ഓരോ കുടുംബവും പത്ത് മരങ്ങൾ വീതം നട്ടുവളർത്തി പരിപാലിക്കണമെന്നും ബിജെപി എംപി പറഞ്ഞു.

ഗോമൂത്രം കുടിക്കുന്ന സമയത്ത് പ്രാർഥനയും നടത്തണമെന്നും സാന്ത് നഗറിൽ നടന്ന ഒരു യോഗത്തിൽ പങ്കെടുത്ത് സംസാരിക്കുന്നതിനിടെ പ്രഗ്യാ സിങ് താക്കൂർ പറഞ്ഞു. മധ്യപ്രദേശിൽ ഏറ്റവുമധികം കൊവിഡ് കേസുകൾ റിപ്പോർട്ട് ചെയ്യുന്ന ഭോപ്പാലിലെ കൊവിഡ് പ്രതിരോധ പ്രവർത്തനങ്ങളിൽ നിന്ന് എംപി വിട്ട് നിൽക്കുന്നതായി ആരോപണം ശക്തമാണ്. എംപിക്കെതിരെ ഭോപ്പാലിൽ പോസ്‌റ്ററുകൾ വ്യാപകമാണ്. ഇതിനിടെയാണ് പ്രതികരണവുമായി പ്രഗ്യാ സിങ് താക്കൂർ എത്തിയത്.

നേരത്തെ കൊറോണ വൈറസിനും ഈ ഭൂമിയിൽ ജീവിക്കാൻ അവകാശമുണ്ടെന്ന് വ്യക്തമാക്കിയ ഉത്തരാഖണ്ഡ് മുന്‍ മുഖ്യമന്ത്രി ത്രിവേന്ദ്ര സിംഗ് റാവത്തിൻ്റെ പ്രസ്‌താവന വിവാദമായിരുന്നു. നമ്മളെപ്പോലെ കൊറോണ വൈറസിനും ജീവനുണ്ടെന്നാണ് ഒരു സ്വകാര്യ ചാനലിന് നൽകിയ അഭിമുഖത്തിൽ ത്രിവേന്ദ്ര സിങ് വ്യക്തമാക്കിയത്.

"ഈ ഭൂമിയിൽ അവർക്കും ജീവിക്കാൻ അവകാശമുണ്ട്. കൊറോണ വൈറസും ജീവജാലകമാണ്. അതിനാൽ നമ്മളെ പോലെ അവയ്‌ക്കും ജീവിക്കാനുള്ള അവകാശമുണ്ട്. ബുദ്ധിമാന്മാർ ആണെന്ന തോന്നൽ മൂലം മനുഷ്യർ കൊറോണ വൈറസിനെ ഇല്ലാതാക്കാൻ ശ്രമിക്കുകയാണ്. എന്നാൽ, അവ നിരന്തരം ജനിതകമാറ്റത്തിന് വിധേയമാകുന്നു" - എന്നും അദ്ദേഹം പറഞ്ഞത്.