വിവാഹവേദിയിൽ നിന്നും വരൻ  അപ്രതീക്ഷിതമായി. ഉത്തര്‍പ്രദേശിലെ കാണ്‍പൂരിലുള്ള മഹാരാജ്പൂരിലാണ് സംഭവം. സംഭവവുമായി ബന്ധപ്പെട്ട് ഇരു കുടുംബങ്ങളും പോലീസിനെ സമീപിച്ചു.

മാലയിടല്‍ ചടങ്ങിന് തൊട്ടുമുന്‍പാണ് വിവാഹ വേദിയില്‍ നിന്നും വരനെ കാണാതായത്. തുടര്‍ന്ന് വധുവിന്റെയും വരന്റെയും കുടുംബാംഗങ്ങള്‍ വരനെ കണ്ടെത്താന്‍ ഏറെ നേരം തെരച്ചില്‍ നടത്തിയെങ്കിലും ഫലമുണ്ടായില്ല. വരനെ ആരും തട്ടിക്കൊണ്ടുപോയതല്ലെന്നും ഇയാള്‍ സ്വന്തം ഇഷ്ടപ്രകാരം കടന്നുകളഞ്ഞതാണെന്നുമാണ് വിവരം.

വിവാഹം മുടങ്ങുമെന്നായതോടെ വധുവിന്റെ കുടുംബാംഗങ്ങളുടെ ദു:ഖം കണ്ട വരന്റെ ബന്ധുക്കളില്‍ ഒരാള്‍ വിഷയത്തില്‍ ഇടപെട്ടു. വിവാഹം നിശ്ചയിച്ച സമയത്ത് നടത്താമെന്നും വരന്റെ ഭാഗത്തുനിന്നും വിവാഹത്തിനെത്തിയവരില്‍ അനുയോജ്യനായ ഒരാളെ വിവാഹം കഴിക്കണമെന്നും അഭിപ്രായം ഉയര്‍ന്നു. തുടര്‍ന്ന് ഇവരില്‍ ഒരാളുടെ കുടുംബാംഗങ്ങളുമായി വധുവിന്റെ ബന്ധുക്കള്‍ സംസാരിക്കുകയും വിവാഹം നടത്തുകയും ചെയ്തു.

തക്ക സമയത്ത് കടന്നുകളഞ്ഞ വരനെതിരെ ഉചിതമായ നടപടി എടുക്കണമെന്ന് ആവശ്യപ്പെട്ട് വധുവിന്റെ കുടുംബം പോലീസില്‍ പരാതി നല്‍കി. എന്നാല്‍, കാണാതായ മകനെ കണ്ടെത്തണമെന്ന് ആവശ്യപ്പെട്ടാണ് വരന്റെ കുടുംബം പോലീസിനെ സമീപിച്ചത്.