ടൗക്തേ ചുഴലിക്കാറ്റില്‍പ്പെട്ട് മുംബയ് കടലില്‍ ഒ.എന്‍.ജി.സി ബാര്‍ജുകള്‍ മുങ്ങി 127പേരെ കാണാതായി. മൂന്നു ബാര്‍ജുകളിലായി നാനൂറിലേറെപ്പേരുണ്ടായിരുന്നു. 147 പേരെ നാവികസേന രക്ഷപ്പെടുത്തി. നാവികസേനയുടെ കപ്പലുകളും ഹെലികോപ്ടറുകളും രക്ഷാപ്രവര്‍ത്തനം തുടരുകയാണ്.

ബാര്‍ജ് പി 305ലെ 136 പേരെ രക്ഷപ്പെടുത്തിയതായി നാവികസേനാ വക്താവ് പറഞ്ഞു. എന്‍ജിന്‍ തകരാറിനെ തുടര്‍ന്ന് 137 പേരുള്ള ഗാല്‍ കണ്‍സ്ട്രക്ടര്‍ എന്ന ബാര്‍ജും 297പേരുള്ള എസ്.എസ്-3 എന്ന ബാര്‍ജും അപകടത്തില്‍പ്പെട്ടിരുന്നു.



ഐ.എന്‍.എസ് കൊച്ചി, ഐ.എന്‍.എസ് കൊല്‍ക്കത്ത എന്നീ യുദ്ധക്കപ്പലുകള്‍ രക്ഷാപ്രവര്‍ത്തനം തുടരുകയാണ്. അതേസമയം, ടൗക്തേയുടെ സംഹാരതാണ്ഡവത്തില്‍ ഗുജറാത്തില്‍ ഏഴ് പേര്‍ മരിച്ചു.

മണിക്കൂറില്‍ 190 കിലോ മീറ്റര്‍ വേഗതയില്‍ വീശിയ കാറ്റിലും കനത്ത മഴയിലും സൗരാഷ്ട്ര മേഖലയില്‍ ശക്തമായ മണ്ണിടിച്ചിലുണ്ടായി. 16,000 വീടുകള്‍ തകര്‍ന്നു. ഇന്നലെ രാവിലെ 12ന് ടൗക്തേ ദുര്‍ബലമായതായി കാലാവസ്ഥാ വകുപ്പ് ട്വീറ്റ് ചെയ്തു.