ഭര്‍ത്താവിന്റെ ക്രൂര പീഡനത്തിനിരയായ യുവതി മരിച്ചതായി റിപ്പോര്‍ട്ട്. കുടുംബാംഗങ്ങളുടെ സാന്നിധ്യത്തില്‍ ഭര്‍ത്താവ് യുവതിയെ മര്‍ദിക്കുന്ന വീഡിയോയാണ് നേരത്തെ പുറത്തുവന്നിരുന്നത്. അതിന് ശേഷം, ഞായറാഴ്ചയും യുവതിക്ക് ഭര്‍ത്താവിന്റെ ക്രൂരമര്‍ദനം ഏല്‍ക്കേണ്ടി വന്നുവെന്നും തുടര്‍ന്ന് യുവതി മരിച്ചുവെന്നുമാണ് പൊലിസ് പറയുന്നത്.

ഭര്‍ത്താവ് ഹാഷിമിനും അയാളുടെ കുടുംബക്കാര്‍ക്കുമെതിരെ പൊലിസ് സ്ത്രീധന പീഡന വകുപ്പ് പ്രകാരം കേസെടുത്തിട്ടുണ്ട്. മരണം നടന്ന് 24 മണിക്കൂര്‍ പിന്നിട്ടിട്ടും ഇതുവരെ പ്രതികളില്‍ ഒരാള്‍ പോലും അറസ്റ്റിലായിട്ടില്ല. പ്രതികളായ ഭര്‍ത്താവും അയാളുടെ കുടുംബാംഗങ്ങളും ഒളിവിലാണ്.
ക്രൂര പീഡനത്തിനിടയില്‍ അമ്മയെ വിളിച്ച് കരയുന്ന യുവതിയുടെ ദൃശ്യങ്ങളാണ് ആദ്യം പുറത്തുവന്നത്. യുവതിയുടെ വായിലൂടെ ചോരയൊഴുകുന്നത് വീഡിയോയില്‍ കാണാം. പുറത്തുവന്ന മറ്റൊരു വീഡിയോയില്‍, വായില്‍ പഞ്ഞി തിരുകിയ നിലയില്‍ കട്ടിലില്‍ കിടക്കുന്ന യുവതിയുടെ ദൃശ്യങ്ങളാണുള്ളത്. യുവതിയുടെ വായിലേയ്ക്ക് മറ്റൊരു സ്ത്രീ വെള്ളം ഒഴിച്ചുകൊടുക്കുന്നതും 'അവളെ ഇങ്ങനെ തല്ലരുതെ'ന്ന് മറ്റൊരു സ്ത്രീ പറയുന്നതും ഈ വീഡിയോയിലുണ്ട്. ഈ ദൃശ്യങ്ങള്‍ ആരാണ് മൊബൈലില്‍ പകര്‍ത്തിയതെന്ന് വ്യക്തമല്ല. എന്നാല്‍ ഈ ദൃശ്യങ്ങള്‍ മാധ്യമങ്ങള്‍ക്ക് നല്‍കിയത് മരിച്ച യുവതിയുടെ സഹോദരിയാണ്.