യോഗി ആദിത്യനാഥിനെ ഹീറോ ആയി വാഴ്ത്താന് നടത്തുന്ന സംഘപരിവാര് ശ്രമങ്ങള് അങ്ങേയറ്റം അപകടകരമാണെന്ന് എ.എ.റഹീം
പൊലീസ് നടത്തുന്ന കൊലപാതകങ്ങളെയാകെ മഹത്വവല്ക്കരിക്കാനും മുഖ്യമന്ത്രി യോഗി ആദിത്യനാഥിനെ ഹീറോ ആയി വാഴ്ത്താനും നടത്തുന്ന സംഘപരിവാര് ശ്രമങ്ങള് അങ്ങേയറ്റം അപകടകരമാണ്. ഉമേഷ് പാല് വധക്കേസിലെ പ്രതിയും സമാജ്വാദി പാര്ട്ടി മുന് എംപിയും ഗുണ്ടാത്തലവനുമായ ആതിഖ് അഹ്മദും സഹോദരന് അഷ്റഫ് അഹ്മദും വെടിവയ്പില് കൊല്ലപ്പെട്ട സംഭവത്തില് പ്രതികരിച്ച് ഡിവൈഎഫ്ഐ അഖിലേന്ത്യാ പ്രസിഡന്റും രാജ്യസഭാ എംപിയുമായ എ.എ.റഹീം. യുപിയില് നടക്കുന്നത് ബാര്ബേറിയന് കാലത്തെ അനുസ്മരിപ്പിക്കുന്നതാണെന്നു റഹീം പറഞ്ഞു.
''ഓരോ 13 ദിവസങ്ങള്ക്കിടയിലും ഒരാള് വീതം യുപിയില് പൊലീസ് എന്കൗണ്ടറില് കൊല്ലപ്പെടുന്നു എന്നാണ് റിപ്പോര്ട്ട്. കഴിഞ്ഞ 6 വര്ഷത്തിനിടയില് സമാന സ്വഭാവമുള്ള 10,713 'എന്കൗണ്ടര്' സംഭവങ്ങള് ഉണ്ടായി. പൊലീസ് നടത്തുന്ന കൊലപാതകങ്ങളെയാകെ മഹത്വവല്ക്കരിക്കാനും മുഖ്യമന്ത്രി യോഗി ആദിത്യനാഥിനെ ഹീറോ ആയി വാഴ്ത്താനും നടത്തുന്ന സംഘപരിവാര് ശ്രമങ്ങള് അങ്ങേയറ്റം അപകടകരമാണ്.'' റഹീം ഫെയ്സ്ബുക്കില് കുറിച്ചു.
കുറിപ്പിന്റെ പൂര്ണരൂപം:
കണ്ണിന് പകരം കണ്ണ്, പല്ലിന് പകരം പല്ല്...
യുപിയില് നടക്കുന്നത് ബാര്ബേറിയന് കാലത്തെ അനുസ്മരിപ്പിക്കുന്ന സംഭവങ്ങള്. കഴിഞ്ഞ ദിവസം മുന് എംപി ആതിഖ് അഹ്മദും അയാളുടെ സഹോദരനും പൊലീസ് കസ്റ്റഡിയ്ക്കിടെ ഒരു പൊതുസ്ഥലത്തു വച്ചു വെടിവയ്പ്പില് കൊല്ലപ്പെട്ടു. മാധ്യമങ്ങളുടെയും വന് പൊലീസ് സന്നാഹത്തിന്റെയും നടുവില് വച്ചാണ് ഇരുവരും വെടിയേറ്റ് കൊല്ലപ്പെട്ടത്! മാധ്യമ പ്രവര്ത്തകരുടെ വേഷത്തിലെത്തിയ ക്രിമിനല് സംഘമാണ് കൃത്യം ചെയ്തത്. തെരുവില് ക്രിമിനല് സംഘങ്ങള് വെടിയുതിര്ത്തു പരസ്പരം കൊല്ലുന്നു.
പൊലീസ് 'എന്കൗണ്ടര്' പരമ്പരകളില് കൊല്ലപ്പെടുന്നവര് വേറെ... ഓരോ പതിമൂന്ന് ദിവസങ്ങള്ക്കിടയിലും ഒരാള് വീതം യുപിയില് പൊലീസ് എന്കൗണ്ടറില് കൊല്ലപ്പെടുന്നു എന്നാണ് ഇന്ത്യ ടുഡേ റിപ്പോര്ട്ട് ചെയ്യുന്നത്. കഴിഞ്ഞ ആറ് വര്ഷത്തിനിടയില് സമാന സ്വഭാവമുള്ള പതിനായിരത്തി എഴുന്നൂറ്റി പതിമൂന്ന് 'എന്കൗണ്ടര്' സംഭവങ്ങള് ഉണ്ടായി. ഈ സംഭവങ്ങളില് 183 പേര് കൊല്ലപ്പെട്ടു, 4911 പേര്ക്ക് പരുക്കേറ്റു!!. ഇങ്ങനെ കൊല്ലപ്പെടുന്നവരൊക്കെ ക്രിമിനലുകള് ആണെന്നാണ് പൊലീസ് വാദം.
ക്രിമിനലുകളും ഗുണ്ടകളും ആണെങ്കില്, വെടിയുതിര്ത്തത് അവരെ കൊല്ലാന് ആരാണ് യുപിയിലെ ബിജെപി സര്ക്കാരിന് അധികാരം നല്കുന്നത്? മേല്പറഞ്ഞ വലിയ പട്ടിക യാദൃച്ഛികമോ സ്വാഭാവികമോ അല്ല ഈ സംഭവങ്ങള് എന്ന് ഏതൊരാള്ക്കും വ്യക്തമാകുന്നതാണ്. ഈ എക്സ്ട്രാ ജുഡീഷ്യല് എക്സിക്യൂഷന് പരമ്പരയും ക്രിമിനല് സംഘങ്ങളുടെ ഏറ്റുമുട്ടലും കൊലപാതകങ്ങളും വെടിവയ്പ്പും യുപിയില് നിയമവാഴ്ച പൂര്ണമായി തകര്ന്നതിന്റെ നേര്സാക്ഷ്യമാണ്. പൊലീസ് നടത്തുന്ന കൊലപാതകങ്ങളെയാകെ മഹത്വവല്ക്കരിക്കാനും, മുഖ്യമന്ത്രി യോഗി ആദിത്യനാഥിനെ ഹീറോ ആയി വാഴ്ത്താനും നടത്തുന്ന സംഘപരിവാര് ശ്രമങ്ങള് അങ്ങേയറ്റം അപകടകരമാണ്. അത്, ഇന്ത്യന് നിയമ വ്യവസ്ഥയോടുള്ള സംഘപരിവാറിന്റെ വെല്ലുവിളിയുമാണ്.
കുറ്റം ചെയ്യുന്നവര് ആരായാലും അവരെ നിയമത്തിന്റെ മുന്നിലെത്തിക്കുകയും നിയമപ്രകാരമുള്ള ശിക്ഷ ഉറപ്പു വരുത്തുകയുമാണ് ചെയ്യേണ്ടത്. നിയമവാഴ്ചയിലൂടെയാണ് ക്രിമിനലുകളെ അമര്ച്ച ചെയ്യേണ്ടത്. അല്ലാതെ, കണ്ണിന് പകരം കണ്ണ്, പല്ലിനു പകരം പല്ല് എന്ന അപരിഷ്കൃതവും, ഇന്ത്യന് ഭരണഘടനാ വിരുദ്ധവുമായ ഈ വന്യമായ രീതി തിരഞ്ഞെടുക്കുന്നത് അംഗീകരിക്കാനാകില്ല. ഈ കിരാതമായ നടപടികളെ രാജ്യം ഒറ്റപ്പെടുത്തേണ്ടതുണ്ട്. യുപിയില് നടന്ന സമാന സ്വഭാവമുള്ള എല്ലാ സംഭവങ്ങളുടെയും നിജസ്ഥിതി പുറത്തുകൊണ്ടുവരാന് സമഗ്രമായ അന്വഷണം നടത്തണം. ഹൈക്കോടതിയുടെ മേല്നോട്ടത്തില് ഈ അന്വഷണം നടക്കണം. സ്റ്റേറ്റ് സ്പോണ്സേര്ഡ് അരാജകത്വം അനുവദിക്കരുത്. ക്രിമിനലുകളെ നിയമപരമായി അടിച്ചമര്ത്തുകയാണ് വേണ്ടത്.
https://www.facebook.com/Malayalivartha
