തമിഴ്നാട്ടിലും കേരളത്തിലും ഗവർണർക്കെതിരെ ശക്തമായ പോരാട്ടം നടക്കുന്നുണ്ട്. ഇപ്പോൾ ഇതാ ഇരു സംസ്ഥാനങ്ങളും ശക്തമായ ഒരു തീരുമാനം കൈ കൊണ്ടിരിക്കുകുയാണ്. ഗവർണർക്കെതിരായ പോരാട്ടത്തിൽ യോജിച്ച് പ്രവർത്തിക്കാൻ കേരളവും തമിഴ്നാടും തീരുമാനിച്ചിരിക്കുകയാണ് . ഗവർണർക്കെതിരായ നിലപാടിൽ പിന്തുണ തേടി തമിഴ്നാട് മുഖ്യമന്ത്രി എം കെ സ്റ്റാലിൻ കേരള സർക്കാരിന് കത്തയക്കുകയും ചെയ്തു .

ഇതിനുള്ള മറുപടി കത്തിലായിരുന്നു എല്ലാവിധ പിന്തുണയും ഇക്കാര്യത്തിൽ ഉറപ്പുനൽകുന്നതായി മുഖ്യമന്ത്രി പിണറായി വിജയൻ തമിഴ്നാടിനെ അറിയിച്ചത്. കേരളത്തിലും തമിഴ്നാട്ടിലും സർക്കാരും ഗവർണറും ഇപ്പോൾ രണ്ട് തട്ടിലാണ് നിൽക്കുന്നത്. ഫെഡറൽ സംവിധാനങ്ങളുടെ അധികാരത്തിന് മേലുള്ള കടന്നു കയറ്റം ഗവർണർമാർ നടത്തുന്നതായി കേരള,തമിഴ്നാട് മുഖ്യമന്ത്രിമാർ പറയുന്നുണ്ട്.

ബില്ലുകളെ കുറിച്ച് വ്യക്തത വരുത്തിയിട്ടും ഗവർണർമാർ ഒപ്പിടാത്ത സാഹചര്യമാണുള്ളതെന്നും ഇരു സർക്കാരുകളും പരാതിപ്പെട്ടിരിക്കുകയാണ്. കേരളത്തിൽ സർക്കാരും ഗവർണറും തമ്മിലുള്ള പോരാട്ടം നാം കണ്ടതാണ്, സമാനരീതിയിലെ പോരാട്ടം തന്നെയാണ് തമിഴ്നാട്ടിലും ഗവർണറും സർക്കാരും തമ്മിൽ നടന്നത്. വളരെ വലിയ പ്രതിസന്ധിയിലൂടെ സർക്കാരിനെ ഗവർണർ കടത്തിവിടുന്ന സാഹചര്യങ്ങൾ വരെ തമിഴ്നാട്ടിൽ ഉടലെടുത്തിരുന്നു.