ഐഎസ്ആര്‍ഒയുടെ അഭിമാന പദ്ധതി ചന്ദ്രയാന്‍ മൂന്നിന്റെ വിക്ഷേപണം ഒരു ദിവസം കൂടി നീട്ടാന്‍ സാധ്യത. ചന്ദ്രനില്‍ ലാന്‍ഡര്‍ ഇറങ്ങുന്നതിന് അനുയോജ്യമായ ദിവസം ഓഗസ്റ്റ് 24 ആണെന്ന് കണ്ടെത്തിയതിനെത്തുടര്‍ന്നാണ് വിക്ഷേപണം ഈ മാസം 14ലേക്ക് മാറ്റാന്‍ ആലോചനയിലുള്ളത്. എന്നാല്‍ ഐഎസ്ആര്‍ഒ ഇക്കാര്യം ഔദ്യോഗികമായി സ്ഥിരികരിച്ചിട്ടില്ല.

നേരത്തേ, ഈ മാസം 13ന് വിക്ഷേപിക്കാനാണ് നിശ്ചയിച്ചിരുന്നത്. വിക്ഷേപണത്തിന് മുന്നോടിയായി റോക്കറ്റ് ശ്രീഹരിക്കോട്ടയിലെ വിക്ഷേപണത്തറയിലേക്ക് മാറ്റിയിരുന്നു.

ചന്ദ്രയാന്‍ മൂന്ന് പേടകം വിക്ഷേപണ വാഹനമായ എല്‍വിഎം 3 ല്‍ സംയോജിപ്പിക്കുന്ന ജോലികള്‍ പൂര്‍ത്തിയായി. ചന്ദ്രന്റെ ദക്ഷിണ ധ്രുവത്തില്‍ സോഫ്റ്റ് ലാന്‍ഡിംഗാണ് ചന്ദ്രയാന്‍ മൂന്ന് ദൗത്യം ലക്ഷ്യമിടുന്നത്.