ആന്ധ്രാപ്രദേശ് പ്രകാശം ജില്ലയിലുണ്ടായ ബസ് അപകടത്തില്‍ ഏഴുപേര്‍ മരിച്ചു.12 പേര്‍ക്ക് ഗുരുതരപരിക്ക്. മരിച്ചവരില്‍ ഒരു കുട്ടിയും ഉള്‍പ്പെടുന്നു.

അബ്ദുള്‍ അസീസ് (65), അബ്ദുള്‍ ഹാനി (60), ഷെയ്ഖ് റമീസ് (48), മുല്ല നൂര്‍ജഹാന്‍ (58), മുല്ല ജാനി ബീഗം (65), ഷെയ്ഖ് ഷബീന (35), ഷെയ്ഖ് ഹിന (6) എന്നിവരാണ് മരിച്ചത്.


വിവാഹസംഘം സഞ്ചരിച്ച ബസ് കനാലിലേക്ക് മറിയുകയായിരുന്നു. സര്‍ക്കാര്‍ ഉടമസ്ഥതയിലുള്ള ആന്ധ്രപ്രദേശ് സ്റ്റേറ്റ് റോഡ് ട്രാന്‍സ്‌പോര്‍ട്ട് കോര്‍പ്പറേഷന്റെ (എപിഎസ്ആര്‍ടിസി) ബസിലായിരുന്നു സംഘം സഞ്ചരിച്ചത്. 35 മുതല്‍ 40 പേര്‍ വരെ ബസില്‍ ഉണ്ടായിരുന്നു.

പൊദിലിയില്‍ നിന്ന് കാക്കിനടയിലേക്ക് പോവുകയായിരുന്ന ബസ് ദര്‍ശിക്കടുത്ത് സാഗര്‍ കനാലിലേക്ക് മറിയുകയായിരുന്നു. ബസ് ഡ്രൈവര്‍ ഉറങ്ങിപ്പോയതാണ് അപകടകാരണമെന്നാണ് പ്രാഥമിക നിഗമനത്തിലുള്ളത്.