പ്രധാനമന്ത്രി നരേന്ദ്ര മോദിയുടെ മൂന്നു ദിവസത്തെ ഫ്രാന്സ്, യു.എ.ഇ സന്ദര്ശനം... പ്രതിരോധ മേഖലയിലടക്കം ഇന്ത്യയും ഫ്രാന്സും തമ്മിലുള്ള സഹകരണത്തിന്റെ 25-ാം വാര്ഷിക വേളയിലാണ് പ്രധാനമന്ത്രിയുടെ സന്ദര്ശനം
മൂന്നു ദിവസത്തെ ഫ്രാന്സ്, യു.എ.ഇ സന്ദര്ശനത്തിനായി പ്രധാനമന്ത്രി നരേന്ദ്ര മോദി ഇന്ന് പുറപ്പെടും. രാത്രി ഫ്രാന്സിലെത്തും. സന്ദര്ശന വേളയില് നാവിക സേനയ്ക്കുള്ള 26 റാഫേല് യുദ്ധവിമാനങ്ങള്ക്കായുള്ള കരാറില് ഒപ്പിടും.
പ്രസിഡന്റ് ഇമ്മാനുവല് മാക്രോണിന്റെ ക്ഷണപ്രകാരം ഫ്രാന്സിലെത്തുന്ന പ്രധാനമന്ത്രി നാളെ നടക്കുന്ന ബാസ്റ്റില് ഡേ പരേഡില് മുഖ്യാതിഥിയാകുകയും ചെയ്യും.
പരേഡില് ഇന്ത്യയുടെ കര, നാവിക, വ്യോമസേനാംഗങ്ങളും ഭാഗമാകും. ഇന്ന് രാത്രി പാരീസിലെത്തുന്ന നരേന്ദ്രമോദി ഫ്രാന്സ് പ്രധാനമന്ത്രി, സെനറ്റ്, നാഷണല് അസംബ്ലി പ്രസിഡന്റുമാര് എന്നിവരുമായി കൂടിക്കാഴ്ച നടത്തും. നാളെ പ്രസിഡന്റ് മാക്രോണുമായി ചര്ച്ച നടത്തും. പ്രധാനമന്ത്രിക്കായി മാക്രോണ് ഔദ്യോഗിക അത്താഴ വിരുന്നുമൊരുക്കും.
ഫ്രാന്സിലെ ഇന്ത്യന് പ്രവാസികള്, ഇന്ത്യന്, ഫ്രഞ്ച് കമ്പനികളുടെ മേധാവിമാര്, പ്രമുഖ വ്യക്തികള് എന്നിവരുമായി പ്രധാനമന്ത്രി സംവദിക്കും.പ്രതിരോധ മേഖലയിലടക്കം ഇന്ത്യയും ഫ്രാന്സും തമ്മിലുള്ള സഹകരണത്തിന്റെ 25-ാം വാര്ഷിക വേളയിലാണ് പ്രധാനമന്ത്രിയുടെ ഈ സന്ദര്ശനം. തന്ത്രപരമായ മേഖലകള്ക്കു പുറമെ സാംസ്കാരികം, ശാസ്ത്രപരം, അക്കാഡമിക്, സാമ്പത്തിക മേഖലകളിലെ സഹകരണം തുടരാനുള്ള സന്ദര്ശനം ചര്ച്ചകളും ലക്ഷ്യമിടുന്നുണ്ട്.
15ന് അബുദാബിയിലെത്തുന്ന മോദി യു.എ.ഇ പ്രസിഡന്റും അബുദാബി ഭരണാധികാരിയുമായ ഷെയ്ഖ് മുഹമ്മദ് ബിന് സായിദ് അല് നഹ്യാനുമായി ചര്ച്ച നടത്തും.
ഊര്ജ്ജം, വിദ്യാഭ്യാസം, ആരോഗ്യം, ഭക്ഷ്യസുരക്ഷ, ഫിന്ടെക്, പ്രതിരോധം, സംസ്കാരം തുടങ്ങിയ വിവിധ മേഖലകളില് സഹകരണം വര്ദ്ധിപ്പിക്കാനായി ലക്ഷ്യമിട്ടാണ് പ്രധാനമന്ത്രിയുടെ ഈ സന്ദര്ശനം.
"
https://www.facebook.com/Malayalivartha
