വന്ദേഭാരതിലെ ശുചിമുറി ഉപയോഗിച്ചു... യുവാവിന് ആകെ നഷ്ടം 6000 രൂപ
നിര്ത്തിയിട്ട വന്ദേഭാരത് ട്രെയിനിലെ ശുചിമുറിയില് കയറി മൂത്രമൊഴിച്ച യുവാവിന് നഷ്ടമായത് 6000 രൂപ. ജൂലൈ 15ന് ഭോപ്പാല് റെയില്വേ സ്റ്റേഷനിലാണ് സംഭവം. ഹൈദരാബാദ് സ്വദേശിയായ അബ്ദുള് ഖാദറിനാണ് 6000 രൂപ നഷ്ടമായത്. ഹൈദരാബാദിലും സിങ്ഗ്രൗളിയിലും ഡ്രൈ ഫ്രൂട്ട് ഷോപ്പ് ബിസിനസുകാരനാണ് അബ്ദുള് ഖാദര്. കുടുംബത്തോടൊപ്പം യാത്ര ചെയ്യവെയാണ് ഭോപ്പാല് റെയില്വേ സ്റ്റേഷനില് നിര്ത്തിയിട്ട വന്ദേഭാരത് ട്രെയിനിലെ ശുചിമുറി ഇയാള് ഉപയോഗിച്ചത്. വാതില് അടഞ്ഞുപോയതിനെ തുടര്ന്ന് ട്രെയിനില് നിന്ന് ഇറങ്ങാന് കഴിയാത്തതിനാല് 220 കിലോമീറ്റര് അകലെയുള്ള മറ്റൊരു സ്റ്റേഷനിലാണ് ഇറങ്ങിയത്.
ഭാര്യയ്ക്കും എട്ട് വയസുള്ള മകനുമൊപ്പം ഹൈദരാബാദില് നിന്ന് മധ്യപ്രദേശിലെ സ്വന്തം നാടായ സിങ്ഗ്രൗലിയിലേക്ക് പോവുകയായിരുന്നു ഇയാള്. ഹൈദരാബാദില് നിന്ന് ഭോപ്പാലിലെത്തിയ ഇവര് സിങ്ഗ്രൗളിയിലേക്ക് ട്രെയിന് കാത്തുനില്ക്കുകയായിരുന്നു. വൈകുന്നേരം 5.20 ന് ഭോപ്പാല് സ്റ്റേഷനില് എത്തിയ ഇവര്ക്ക് സിങ്ഗ്രൗളിയിലേക്ക് രാത്രി 8.55നായിരുന്നു ട്രെയിന്. ഇതിനിടെ മൂത്രമൊഴിയ്ക്കാന് അബ്ദുള് ഖാദര് ഇന്ഡോറിലേക്കുള്ള വന്ദേ ഭാരത് ട്രെയിനില് കയറി. എന്നാല്, ബാത്ത്റൂമില് നിന്ന് പുറത്തിറങ്ങിയെങ്കിലും ട്രെയിനിന്റെ വാതില് പൂട്ടിയതിനാല് പുറത്തിറങ്ങാനായില്ല.
മൂന്ന് ടിക്കറ്റ് കളക്ടര്മാരോടും നാല് പൊലീസ് ഉദ്യോഗസ്ഥരോടും അബ്ദുള് ഖാദര് സഹായം തേടിയെങ്കിലും ലോക്കോ പൈലറ്റിന് മാത്രമേ വാതില് തുറക്കാന് കഴിയൂവെന്ന് അവര് അറിയിച്ചു. അതേസമയം, സുരക്ഷാ കാരണങ്ങളാല് ഡ്രൈവറെ അടുത്തേക്ക് പോകാനും സമ്മതിച്ചില്ല. ഒടുവില് ടിക്കറ്റില്ലാതെ ട്രെയിനില് കയറിയതിന് അബ്ദുള് 1020 രൂപ പിഴ അടയ്ക്കേണ്ടി വന്നു. ഉജ്ജയിനില് ട്രെയിന് നിര്ത്തിയ ശേഷമാണ് ഇറങ്ങാന് സാധിച്ചത്. പിന്നീട് 750 രൂപ മുടക്കി ഭോപ്പാലിലേക്ക് ബസ് ടിക്കറ്റെടുത്തു.
ഈ സമയമെല്ലാം ഭാര്യയും മകനും കാത്തിരിക്കുകയായിരുന്നു. സിങ്ഗ്രൗലിയിലേക്ക് ബുക്ക് ചെയ്ത ടിക്കറ്റിനത്തില് 4000 രൂപയും നഷ്ടമായി. വന്ദേഭാരത് ട്രെയിനുകളില് അടിയന്തര സംവിധാനമില്ലാത്തതിനാല് കുടുംബവും താനും കടുത്ത മാനസിക പീഡനമാണ് അനുഭവിച്ചതെന്ന് അബ്ദുള് ഖാദര് ആരോപിച്ചു. അപകടങ്ങള് തടയുന്നതിനും യാത്രക്കാരുടെ ക്ഷേമം ഉറപ്പാക്കുന്നതിനുമാണ് വാതിലുകള് ഇത്തരത്തില് സജ്ജീകരിച്ചതെന്നും ഉന്നത അധികാരികളില് നിന്ന് ഉത്തരവുകള് ലഭിച്ചതിന് ശേഷം മാത്രമേ ട്രെയിന് നിര്ത്താന് കഴിയൂവെന്നും റെയില്വേ അറിയിച്ചു.
https://www.facebook.com/Malayalivartha
