ഫ്രാന്‍സില്‍ കൂടുതല്‍ ഇന്ത്യന്‍ വിദ്യാര്‍ഥികള്‍ക്ക് പഠിക്കാനുള്ള സൗകര്യമൊരുക്കുമെന്ന് ഫ്രഞ്ച് പ്രസിഡന്റ് ഇമ്മാനുവല്‍ മാക്രോണ്‍. രാജ്യത്തിന്റെ 75ാം റിപ്പബ്ലിക് ദിനാഘോഷത്തില്‍ മുഖ്യാതിഥിയായി പങ്കെടുക്കാനെത്തിയതാണ് മാക്രോണ്‍. 2030ഓടെ ഫ്രാന്‍സില്‍ ഇന്ത്യന്‍ വിദ്യാര്‍ഥികളുടെ എണ്ണം30000 ആക്കുക എന്നതാണ് ലക്ഷ്യം.

ഫ്രഞ്ച് സംസാരിക്കാത്ത വിദ്യാര്‍ഥികള്‍ക്ക് രാജ്യത്തെ സര്‍വകലാശാലകളില്‍ പഠിക്കാനായി അന്താരാഷ്ട്ര ക്ലാസുകള്‍ സ്ഥാപിക്കും. ഫ്രാന്‍സില്‍ പഠിച്ച മുന്‍ ഇന്ത്യന്‍ വിദ്യാര്‍ഥികള്‍ക്ക് വിസയുമായി ബന്ധപ്പെട്ട പ്രക്രിയകള്‍ സുഗമമാക്കുമെന്നും വ്യക്തമാക്കി മാക്രോണ്‍.

'2030ഓടെ 30,000 ഇന്ത്യന്‍ വിദ്യാര്‍ഥികള്‍ ഫ്രാന്‍സില്‍. ഇതു സാധ്യമാക്കാന്‍ ശ്രമിക്കും' -മാക്രോണ്‍ എക്‌സില്‍ കുറിച്ചു. വ്യാഴാഴ്ച ജയ്പൂരില്‍ പ്രധാനമന്ത്രി നരേന്ദ്ര മോദിക്കൊപ്പം മാക്രോണ്‍ റോഡ് ഷോയില്‍ പങ്കെടുത്തിരുന്നു. ഇത്തവണ 95 ഫ്രഞ്ച് സേനാംഗങ്ങളും പരേഡില്‍ പങ്കെടുക്കുന്നുണ്ട്. 33 പേരുള്ള ബാന്‍ഡ് സംഘവും ഫ്രാന്‍സില്‍ നിന്ന് വന്നിട്ടുണ്ട്.