കശ്മീർ മാതൃകയിൽ പാകിസ്താൻ ഐഎസ് ഭീകരരെ അഫ്ഗാനിസ്ഥാനിലേക്ക് തള്ളിവിടുന്നതായി റിപ്പോർട്ട് . മുൻ ടിടിപി കമാൻഡർ എഹ്‌സാനുല്ല എഹ്‌സാൻ സ്വകാര്യ മാദ്ധ്യമത്തിന് നൽകിയ അഭിമുഖത്തിലാണ് ഇക്കാര്യം പറഞ്ഞത് . അഫ്ഗാൻ അതിർത്തിയിൽ പാക് സൈന്യം നടത്തിയത് ‘കശ്മീർ മാതൃകയിലുള്ള നുഴഞ്ഞുകയറ്റ’ ശ്രമമാണെന്ന് അദ്ദേഹം പറഞ്ഞു .

ജനുവരി 20 ന് അഫ്ഗാനിസ്ഥാനിലെ സിർകനായ് ജില്ലയിലെ ഡ്യൂറൻഡ് ലൈനിൽ അഫ്ഗാനിസ്ഥാൻ സായുധ സേനയും പാക് സൈന്യവും തമ്മിൽ സംഘർഷം നടന്നിരുന്നു . അഫ്ഗാനിസ്ഥാനിലെ ഡ്യൂറൻഡ് ലൈനിലെ അതിർത്തി പ്രദേശങ്ങളിൽ കടന്നുകയറുന്ന പാക് സൈനിക നയത്തെ ചെറുക്കാനുള്ള താലിബാൻ സർക്കാരിന്റെ ശ്രമങ്ങളെത്തുടർന്നാണ് ഈ ഏറ്റുമുട്ടൽ ഉണ്ടാകുന്നത് .

പാക് സൈന്യം ഐഎസ് ഭീകരരെ അഫ്ഗാനിസ്ഥാനിലേക്ക് തള്ളിവിടാൻ ശ്രമിച്ചുവെന്നും , ഇതിനായാണ് പാക് സായുധ സേന അതിർത്തിയിൽ തർക്കം ഉണ്ടാക്കുന്നതെന്നും എഹ്‌സാൻ പറഞ്ഞു. അഫ്ഗാനിസ്ഥാനിലെ സൈന്യം ഏറ്റുമുട്ടൽ ചെറുക്കാൻ ശ്രമിക്കുമ്പോൾ ഭീകരർക്ക് അഫ്ഗാനിസ്ഥാനിലേക്ക് പ്രവേശിക്കാനുമാകും. പാക് സൈന്യത്തിന്റെ തന്ത്രമാണിത് .

അഫ്ഗാൻ അതിർത്തി കാവൽക്കാർ അവരെ കാണുകയും നേരിടുകയും ചെയ്തു. അവിടെ നുഴഞ്ഞുകയറ്റക്കാർക്ക് പാകിസ്താൻ സൈന്യത്തിന്റെ പൂർണ്ണ പിന്തുണയുണ്ടായിരുന്നു.അഫ്ഗാൻ സേനയുടെ ആക്രമണത്തെത്തുടർന്ന് അവർ തിരികെ രക്ഷപ്പെട്ട് പാകിസ്താൻ സൈന്യത്തിന്റെ ഭാഗത്തേക്ക് പോയി.

ഐഎസ് ഭീകരരും പാക് സേനയിലെ അംഗങ്ങളും തമ്മിലുള്ള ഏകോപനം സമീപകാലത്ത് വർദ്ധിച്ചു, ഇതിന്റെ തെളിവുകൾ അഫ്ഗാനിസ്ഥാൻ രഹസ്യാന്വേഷണ ഏജൻസിയായ ജനറൽ ഡയറക്ടറേറ്റ് ഓഫ് ഇൻ്റലിജൻസ് ശേഖരിച്ചിട്ടുണ്ടെന്നും എഹ്‌സാനുല്ല എഹ്‌സാൻ പറഞ്ഞു.

ഇറാനിൽ ഒമ്പത് പാകിസ്താനികളെ വെടിവച്ച് കൊന്ന് അജ്ഞാതർ. ഇരുരാജ്യങ്ങളും തമ്മിലുള്ള സംഘർഷം രൂക്ഷമാകുന്നതിനിടെയാണ് പുതിയ ആക്രമണം റിപ്പോർട്ട് ചെയ്തിരിക്കുന്നത്. തെക്കുകിഴക്കൻ ഇറാന്റെ പാക് അതിർത്തിയോട് ചേർന്നുള്ള പ്രദേശത്താണ് വെടിവയ്പ്പുണ്ടായത്.

ഇറാനിലെ സിസ്താൻ-ബലൂചിസ്ഥാൻ പ്രവിശ്യയിലാണ് ആക്രമണം നടന്ന പ്രദേശമുള്ളത്. ഇവിടുത്തെ സരവൻ ടൗണിനടുത്തായിരുന്നു ആക്രമണം. അതേസമയം ആക്രമണത്തിന്റെ ഉത്തരവാദിത്വം ഇതുവരെ ആരും ഏറ്റെടുത്തിട്ടില്ല. കൊല്ലപ്പെട്ട പാകിസ്താനികൾ എല്ലാവരും പ്രദേശത്തെ ഓട്ടോ റിപ്പയർ ഷോപ്പിലെ തൊഴിലാളികളായിരുന്നു. വെടിവെപ്പിൽ മൂന്ന് പാകിസ്താനികൾക്ക് പരിക്കേറ്റിട്ടുണ്ട്.

പാക് പൗരന്മാരുടെ കൂട്ടക്കൊല ഞെട്ടിപ്പിക്കുന്നതാണെന്ന് ഇറാനിലെ പാക് എംബസി പ്രതികരിച്ചു. കൊല്ലപ്പെട്ടവരുടെ കുടുംബത്തിന് എല്ലാവിധ പിന്തുണയും ഉറപ്പുനൽകുമെന്നും സംഭവത്തിൽ വിശദമായ അന്വേഷണം നടത്താൻ ഇറാന്റെ ഭാഗത്ത് നിന്നുള്ള സഹകരണം ആവശ്യപ്പെടുന്നതായും ടെഹ്‌റാനിലെ പാക് അംബാസിഡർ അറിയിച്ചു.

കഴിഞ്ഞയാഴ്ചയായിരുന്നു പാകിസ്താനിൽ ഇറാൻ നടത്തിയ മിസൈലാക്രമണത്തിന് പാകിസ്താൻ പ്രത്യാക്രമണം നടത്തിയത്. ഭീകരസംഘടനകളുടെ ഒളിത്താവളം ലക്ഷ്യമിട്ട് നടത്തിയ ആക്രമണമാണെന്ന് സംഭവത്തിൽ ഇറാൻ വിശദീകരണം നൽകിയിരുന്നു. എന്നാൽ കുട്ടികളുൾപ്പടെ ആക്രമണത്തിൽ കൊല്ലപ്പെട്ടു. ഇതോടെ ഇറാനിലേക്ക് മിസൈൽ അയച്ച് പാകിസ്താനും സാധാരണക്കാരുടെ ജീവൻ എടുത്തിരുന്നു. പകരത്തിന് പകരം എന്ന നിലപാടിലേക്ക് ഇരുരാജ്യങ്ങളുമെത്തിയതോടെ വിഷയം ഗൗരവതരമായി നിരീക്ഷിക്കുകയാണെന്ന് ഇന്ത്യയും വ്യക്തമാക്കി. അതിർത്തി കടന്നുള്ള ഭീകരതയെ വെച്ചുപൊറുപ്പിക്കില്ലെന്നതാണ് ഭാരതത്തിന്റെ നയമെന്നും വിദേശകാര്യമന്ത്രാലായം നിലപാടറിയിച്ചു. ഇതിനിടെ ഇരുരാജ്യങ്ങളും തങ്ങളുടെ പ്രതിനിധികളെ തിരിച്ചുവിളിച്ചു. എന്നാൽ കഴിഞ്ഞ ദിവസം ഇവർ തിരിച്ച് ജോലിയിൽ പ്രവേശിച്ചതിന് പിന്നാലെയാണ് വീണ്ടുമൊരു ആക്രമണം റിപ്പോർട്ട് ചെയ്തിരിക്കുന്നത്.