ജമ്മു കശ്മീരില്‍ നിയന്ത്രണ രേഖയ്ക്ക് സമീപം മൈന്‍ പൊട്ടിത്തെറിച്ച് ആറ് സൈനികര്‍ക്ക് പരിക്ക്. ജമ്മു കശ്മീരിലെ രജൗറിയിലെ നൗഷേര സെക്ടറിലെ യഥാര്‍ത്ഥ നിയന്ത്രണ രേഖയ്ക്ക് സമീപമാണ് ചൊവ്വാഴ്ച മൈന്‍ സ്‌ഫോടനം നടന്നത്. വൃത്തങ്ങള്‍ പറയുന്നതനുസരിച്ച്, രാവിലെ 10.45 ഓടെ രജൗറിയിലെ ഖംബ കോട്ടയ്ക്ക് സമീപം ഗൂര്‍ഖ റൈഫിള്‍സിലെ ഉദ്യോഗസ്ഥര്‍ പതിവ് പട്രോളിംഗ് നടത്തുന്നതിനിടെയാണ് ആകസ്മികമായി സ്‌ഫോടനം നടന്നത്. പരിക്കേറ്റ സൈനികരെ ചികിത്സയ്ക്കായി അടുത്തുള്ള ആശുപത്രിയില്‍ പ്രവേശിപ്പിച്ചു.

ആശുപത്രിയില്‍ പ്രവേശിപ്പിച്ചവരുടെ ആരോഗ്യനില തൃപ്തികരമെന്ന് റിപ്പോര്‍ട്ടുകള്‍ സൂചിപ്പിക്കുന്നു. ജനുവരി 4 ന് ജമ്മു കശ്മീരിലെ ബന്ദിപ്പോറില്‍ സൈനികരെ വഹിച്ചുകൊണ്ടുപോയ ഒരു സൈനിക ട്രക്ക് നിയന്ത്രണം നഷ്ടപ്പെട്ട് ഒരു കുന്നിലേക്ക് മറിഞ്ഞ് നാല് സൈനികര്‍ മരിക്കുകയും മൂന്ന് പേര്‍ക്ക് പരിക്കേല്‍ക്കുകയും ചെയ്തിരുന്നു. ജില്ലയിലെ സദര്‍ കൂട്ട് പയേണ്‍ പ്രദേശത്തിന് സമീപം ഒരു വളവില്‍ ഒരു ട്രക്കിനെ മറികടക്കാന്‍ ശ്രമിക്കുന്നതിനിടെ ഡ്രൈവര്‍ക്ക് നിയന്ത്രണം നഷ്ടപ്പെട്ടപ്പോഴാണ് അപകടം സംഭവിച്ചത്.