മനു ഭാക്കറിന്റെ കുടുംബം സഞ്ചരിച്ച വാഹനം അപകടത്തില്പ്പെട്ടു; താരത്തിന്റെ മുത്തശ്ശിയും അമ്മാവനും മരിച്ചു
ഒളിമ്പിക്സ് മെഡല് ജേതാവ് മനു ഭാക്കറിന്റെ ബന്ധുക്കള് സഞ്ചരിച്ച സ്കൂട്ടര് അപകടത്തില്പ്പെട്ടു. അപകടത്തില് മനു ഭാക്കറിന്റെ അമ്മാവനും മുത്തശ്ശിയും മരിച്ചു.ഹരിയാനയിലെ ചാര്ഖി ദാദ്രിയില് മഹേന്ദ്രഗഡ് ബൈപാസ് റോഡിലാണ് അപകടമുണ്ടായതെന്ന് ദേശീയ മാധ്യമങ്ങള് റിപ്പോര്ട്ട് ചെയ്തു. മനുവിന്റെ ബന്ധുക്കള് സഞ്ചരിച്ച സ്കൂട്ടര് കാറുമായി കൂട്ടിയിടിക്കുകയായിരുന്നു. ഇരുവരും സംഭവസ്ഥലത്ത് തന്നെ മരിച്ചു. കാര് ഡ്രൈവര് ഒളിവിലാണ്.
അപകടവിവരം ലഭിച്ചതിനെ തുടര്ന്ന് പൊലീസ് സ്ഥലത്തെത്തി മൃതദേഹങ്ങള് പോസ്റ്റ്മോര്ട്ടത്തിനായി അയച്ചു. കൂടുതല് അന്വേഷണം നടത്തിവരികയാണ്. അപകടത്തെ കുറിച്ച് മനു ഭാക്കറിന്റെ കുടുംബത്തിന്റെ ഭാഗത്ത് നിന്ന് പ്രതികരണങ്ങളൊന്നും ഉണ്ടായിട്ടില്ല.
ഒളിമ്പിക്സില് ഒന്നിലധികം മെഡല് നേടുന്ന ആദ്യ ഇന്ത്യന് താരമെന്ന നേട്ടം പാരിസ് ഒളിമ്പിക്സില് മനു ഭാക്കര് സ്വന്തമാക്കിയിരുന്നു. ഷൂട്ടിങ്ങില് വനിതകളുടെ 10 മീറ്റര് എയര് പിസ്റ്റളിലും ടീം ഇനത്തിലും വെങ്കല മെഡല് നേടിയാണ് 22കാരി ചരിത്രം കുറിച്ചത്. ഷൂട്ടിങ്ങില് ഇന്ത്യക്കായി വെങ്കലം നേടുന്ന ആദ്യ വനിത താരമാകാനും മനുവിന് സാധിച്ചിരുന്നു.
https://www.facebook.com/Malayalivartha
