വടക്കുകിഴക്കൻ സംസ്ഥാനങ്ങളിലും പശ്ചിമ ബംഗാളിലും 5.8 തീവ്രത രേഖപ്പെടുത്തിയ ഭൂകമ്പം ഉണ്ടായപ്പോൾ, അസമിലെ നാഗോണിലെ ഒരു ആശുപത്രിയിലെ നഴ്‌സുമാർ യഥാർത്ഥ ജീവിതത്തിലെ സൂപ്പർഹീറോസ് ആയി മാറി. വാർഡിൽ ഭൂചലനം അനുഭവപ്പെട്ടപ്പോൾ നവജാത ശിശുക്കളുടെ തൊട്ടിലുകൾ ഉറപ്പിക്കാൻ അവർ ഓടുന്നത് ഇപ്പോൾ സമൂഹ മാധ്യമങ്ങളിൽ വൈറൽ ആയ വീഡിയോയിൽ കാണാം. അവരുടെ വേഗത്തിലുള്ള പ്രവർത്തനം കുഞ്ഞുങ്ങൾ സുരക്ഷിതരാണെന്ന് ഉറപ്പാക്കി.

വടക്കുകിഴക്കൻ ഇന്ത്യയുടെ ചില ഭാഗങ്ങളിൽ റിക്ടർ സ്കെയിലിൽ 5.8 തീവ്രത രേഖപ്പെടുത്തിയ ഭൂചലനം ഉണ്ടായതായി അധികൃതർ അറിയിച്ചു. സംസ്ഥാന ദുരന്ത നിവാരണ അതോറിറ്റിയുടെ കണക്കനുസരിച്ച്, വൈകുന്നേരം 4:41 ന് ഭൂചലനം രേഖപ്പെടുത്തി, ഉദൽഗുരി ജില്ലയിലാണ് അതിന്റെ പ്രഭവകേന്ദ്രം 5 കിലോമീറ്റർ ആഴത്തിൽ. സമീപ പ്രദേശങ്ങളിൽ ശക്തമായ പ്രകമ്പനങ്ങൾ അനുഭവപ്പെട്ടതിനാൽ താമസക്കാർ പരിഭ്രാന്തരായി പുറത്തിറങ്ങി.

"ഇന്ന് അസമിൽ 5.6 തീവ്രത രേഖപ്പെടുത്തിയ ഭൂചലനം ഉണ്ടായി. ഉദൽഗുരിക്കടുത്തായിരുന്നു പ്രഭവകേന്ദ്രം. ഇതുവരെ വലിയ നാശനഷ്ടങ്ങളോ ജീവഹാനിയോ റിപ്പോർട്ട് ചെയ്തിട്ടില്ല. സ്ഥിതിഗതികൾ ഞങ്ങൾ സജീവമായി നിരീക്ഷിച്ചുവരികയാണ്," അസം മുഖ്യമന്ത്രി ഹിമന്ത ബിശ്വ ശർമ്മ X-ലെ ഒരു പോസ്റ്റിൽ പറഞ്ഞു.

ആളപായമോ സ്വത്തുക്കൾക്ക് നാശനഷ്ടമോ ഉണ്ടായതായി ഉടൻ റിപ്പോർട്ടുകൾ ഇല്ലെന്ന് സർക്കാർ ഉദ്യോഗസ്ഥർ സ്ഥിരീകരിച്ചു. "ഞങ്ങൾ സ്ഥിതിഗതികൾ സൂക്ഷ്മമായി നിരീക്ഷിച്ചുകൊണ്ടിരിക്കുകയാണ്, ഇതുവരെ ജീവഹാനിയോ അടിസ്ഥാന സൗകര്യ നാശമോ റിപ്പോർട്ട് ചെയ്തിട്ടില്ല," ഒരു ഉദ്യോഗസ്ഥൻ പറഞ്ഞതായി റിപ്പോർട്ട് ഉണ്ട് .ഉയർന്ന ഭൂകമ്പ സാധ്യതാ മേഖലയിൽ വരുന്ന അസം ഇടയ്ക്കിടെ ഭൂചലനങ്ങൾ അനുഭവപ്പെട്ടിട്ടുണ്ട്. 2021 ൽ 6.4 തീവ്രത രേഖപ്പെടുത്തിയ ഭൂകമ്പം സോണിത്പൂർ ജില്ലയിൽ ഉണ്ടായപ്പോൾ, കാര്യമായ ഘടനാപരമായ നാശനഷ്ടങ്ങൾ ഉണ്ടായിരുന്നു.