മുംബൈ വിമാന അപകടത്തില്‍ കൊല്ലപ്പെട്ട അജിത് പവാറിന്റെ മഹാരാഷ്ട്ര ഉപമുഖ്യമന്ത്രി സ്ഥാനം ഭാര്യ സുനേത്ര പവാര്‍ ഏറ്റെടുക്കുമെന്ന് റിപ്പോര്‍ട്ട്. നാളെ സത്യ പ്രതിജ്ഞയുണ്ടാകുമെന്നും എന്‍ഡിടിവി റിപ്പോര്‍ട്ട് ചെയ്തു. മഹാരാഷ്ട്രയിലെ പ്രാദേശിക മാധ്യമങ്ങളും ഇക്കാര്യം റിപ്പോര്‍ട്ട് ചെയ്തു. അജിത് പവാറിന്റെ നിര്യാണത്തോടെ ഒഴിവുവന്ന ഉപമുഖ്യമന്ത്രി സ്ഥാനങ്ങള്‍, ധനകാര്യം, മറ്റ് ഉത്തരവാദിത്തങ്ങള്‍ എന്നിവയും ഏറ്റെടുത്തേക്കും.

നാഷണലിസ്റ്റ് കോണ്‍ഗ്രസ് പാര്‍ട്ടി (അജിത് പവാര്‍) വര്‍ക്കിംഗ് പ്രസിഡന്റ് പ്രഫുല്‍ പട്ടേല്‍, സംസ്ഥാന പ്രസിഡന്റ് സുനില്‍ തത്കറെ, മന്ത്രി ഛഗന്‍ ഭുജ്ബല്‍ എന്നിവര്‍ മുഖ്യമന്ത്രി ദേവേന്ദ്ര ഫഡ്‌നാവിസുമായി ഇക്കാര്യം ചര്‍ച്ച ചെയ്തുവെന്നും റിപ്പോര്‍ട്ടുകള്‍ പറയുന്നു. സുനേത്ര പവാറിനെ ഉപമുഖ്യമന്ത്രിയായി നിയമിക്കുന്നതിനെക്കുറിച്ച് മാധ്യമങ്ങളോട് പ്രഫുല്‍ പട്ടേല്‍ സൂചിപ്പിച്ചതായി റിപ്പോര്‍ട്ടുകള്‍ പറയുന്നു.

അജിത് പവാര്‍ സ്വീകരിച്ച നിലപാട് സംബന്ധിച്ച് ഒരു തീരുമാനം എടുക്കേണ്ടതുണ്ട്. വരും ദിവസങ്ങളില്‍ എത്രയും വേഗം ഒരു തീരുമാനം എടുക്കണമെന്ന് മാത്രമാണ് ഞങ്ങള്‍ മുഖ്യമന്ത്രിയോട് പറഞ്ഞത്. അതിനായി, ഞങ്ങളുടെ എല്ലാ പാര്‍ട്ടി എംഎല്‍എമാരെയും വിളിച്ച്, അവരുമായി വിഷയം ചര്‍ച്ച ചെയ്ത്, പൊതുജനവികാരം മാനിച്ചും, അജിത് പവാറിന്റെ സംഭാവന മനസ്സില്‍ വെച്ചും ഉചിതമായ തീരുമാനം എടുക്കുമെന്നും പ്രഫുല്‍ പട്ടേല്‍ മാധ്യമങ്ങളോട് പറഞ്ഞു.

സുനേത്ര പവാറിന്റെ പേര് ഞങ്ങള്‍ ചര്‍ച്ച ചെയ്തിട്ടില്ല. എന്നാല്‍ ഇത് ഞങ്ങളുടെ ആഭ്യന്തര കാര്യമാണ്. നാഷണലിസ്റ്റ് കോണ്‍ഗ്രസ് പാര്‍ട്ടിയില്‍ നിന്ന് ആരെയാണ് ആ സ്ഥാനത്തേക്ക് നിയമിക്കേണ്ടത് എന്നത് പാര്‍ട്ടിയുടെ തീരുമാനമാണ്. പൊതുജന വികാരവും, ഞങ്ങളുടെ എംഎല്‍എമാരുടെ വികാരവും ഇതില്‍ ഉള്‍പ്പെടുന്നു. വര്‍ക്കിംഗ് പ്രസിഡന്റ് എന്ന നിലയില്‍ അല്ല, പ്രഫുല്‍ പട്ടേല്‍ എന്ന നിലയിലാണ് ഞാന്‍ സംസാരിക്കുന്നത്.

വ്യക്തിപരമായി, ശരിയായ തീരുമാനം എടുക്കുമെന്നും അദ്ദേഹം പറഞ്ഞു. കുടുംബ ചടങ്ങുകള്‍ പുരോഗമിക്കുന്നതിനാല്‍ പ്രഖ്യാപനത്തിനുള്ള സമയം ഇതുവരെ ആയിട്ടില്ലെന്നും പട്ടേല്‍ കൂട്ടിച്ചേര്‍ത്തു. ഇക്കാര്യത്തില്‍ മുഖ്യമന്ത്രിയുടെ ഓഫീസില്‍ നിന്ന് ഇതുവരെ ഔദ്യോഗിക പ്രതികരണമൊന്നും ഉണ്ടായിട്ടില്ലെന്നും അദ്ദേഹം പറഞ്ഞു. രണ്ട് എന്‍സിപി വിഭാഗങ്ങളും ലയിക്കാനുള്ള സാധ്യതയെക്കുറിച്ചും ചര്‍ച്ചകള്‍ നടക്കുകയാണ്.