തമിഴ്‌നാട് മുഖ്യമന്ത്രി വിജയ് മുന്‍ മുഖ്യമന്ത്രി എം കെ സ്റ്റാലിന്റെ വസതിയിലെത്തി കൂടിക്കാഴ്ച നടത്തി. സ്റ്റാലിനും മകന്‍ ഉദയനിധി സ്റ്റാലിനും ചേര്‍ന്നാണ് വിജയ്‌യെ സ്വീകരിച്ചത്. കൂടിക്കാഴ്ചയുടെ ചിത്രങ്ങള്‍ സ്റ്റാലിന്‍ തന്റെ എക്‌സ് പേജില്‍ പങ്കുവച്ചിട്ടുണ്ട്.

വിജയ് എത്തിയപ്പോള്‍ ഉദയനിധി അദ്ദേഹത്തെ ഹസ്തദാനം ചെയ്തും ആലിംഗനം ചെയ്തും സ്വീകരിച്ചു. പിന്നാലെ സ്റ്റാലിനും അദ്ദേഹത്തെ ആലിംഗനം ചെയ്തു. കൂടിക്കാഴ്ചയ്ക്കിടെ ഇരു നേതാക്കളും പൊന്നാടയും പൂച്ചെണ്ടുകളും കൈമാറി. തമിഴ്‌നാട്ടിലെ വിവിധ പാര്‍ട്ടികളിലെ മുതിര്‍ന്ന നേതാക്കളുമായി വിജയ് ഇന്ന് കൂടിക്കാഴ്ച നടത്തുമെന്ന് നേരത്തേ അറിയിച്ചിരുന്നു. എല്ലാവരെയും അവരുടെ വസതിയിലെത്തി സന്ദര്‍ശിക്കുമെന്നാണ് ടിവികെ വൃത്തങ്ങള്‍ അറിയിച്ചിരുന്നത്.

സ്റ്റാലിനെ കൂടാതെ വിസികെ അദ്ധ്യക്ഷന്‍ തിരുമാവളവന്‍, എംഡിഎംകെ നേതാവ് വൈക്കോ ഉള്‍പ്പെടെയുള്ളവരെ വിജയ് സന്ദര്‍ശിച്ചേക്കും. എഐഎഡിഎംകെ നേതൃത്വത്തെ കാണുന്ന കാര്യത്തില്‍ മാത്രം അനിശ്ചിതത്വം നിലനില്‍ക്കുന്നുവെന്നാണ് റിപ്പോര്‍ട്ട്. അനുഗ്രഹം തേടുന്നതിനൊപ്പം ഭരണനിര്‍വഹണത്തിന് വേണ്ട അഭിപ്രായങ്ങള്‍ കൂടി ചോദിച്ചറിയാനാണ് വിജയ് മുതിര്‍ന്ന നേതാക്കളെ കാണുന്നത്.

ഇന്നലെയാണ് ടിവികെ അദ്ധ്യക്ഷനും നടനുമായ വിജയ് തമിഴ്‌നാട് മുഖ്യമന്ത്രിയായി സത്യപ്രതിജ്ഞ ചെയ്തത്. ചെന്നൈ ജവഹര്‍ലാല്‍ നെഹ്‌റു സ്‌റ്റേഡിയത്തില്‍ വച്ചായിരുന്നു സത്യപ്രതിജ്ഞ. രാഷ്ട്രീയ, സിനിമാ മേഖലയില്‍ നിന്നുള്ള പ്രമുഖര്‍ ചടങ്ങില്‍ പങ്കെടുത്തു. ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധിയുടെ സാന്നിദ്ധ്യം ഏറെ ശ്രദ്ധിക്കപ്പെട്ടിരുന്നു.