കുറ്റകൃത്യം പുനരാവിഷ്കരിക്കാന് പ്രതിയോട് ആവശ്യപ്പെടുന്നത് നിയമവിരുദ്ധമല്ല
കുറ്റകൃത്യം പുനരാവിഷ്കരിക്കാന് പ്രതിയോട് ആവശ്യപ്പെടുന്നത് എല്ലായ്പ്പോഴും നിയമവിരുദ്ധമാകില്ലെന്നു സുപ്രീം കോടതി. കുറ്റകൃത്യം പുനരാവിഷ്കരിക്കുന്നതു തനിക്കെതിരെ മൊഴി നല്കേണ്ടതില് നിന്നു പ്രതികള്ക്കുള്ള സംരക്ഷണാവകാശത്തിന് എതിരായി മാറില്ലെന്നും കോടതി പറഞ്ഞു.
ശാസ്ത്രീയ വിശകലനത്തിന്റെ ഭാഗമായി കുറ്റകൃത്യം നടന്ന സ്ഥലത്ത് പ്രതി നടത്തുന്ന പുനരാവിഷ്കരണമോ പ്രകടനമോ പ്രതിയുടെ മൊഴിയായി മാറുന്നില്ല. എന്നാല്, കേസ് തെളിയിക്കാന് ഉപയോഗിക്കുന്നതു ഭരണഘടനാവിരുദ്ധവുമല്ല– കോടതി വ്യക്തമാക്കി. സേതുരാമയ്യര് സിബിഐ സിനിമയിലൂടെ മലയാളികള്ക്കു പരിചിതമാണ് ഈ അന്വേഷണരീതി.
തമിഴ്നാട്ടില് ജലാശയത്തിനുസമീപം സ്ത്രീയുടെ മൃതദേഹം കണ്ടെത്തിയതുമായി ബന്ധപ്പെട്ട കേസിലാണു കോടതിയുടെ ഉത്തരവ്. പീഡനത്തിനിരയാക്കി കൊലപ്പെടുത്തിയെന്നായിരുന്നു കേസ്. സംഭവ സ്ഥലത്തിനടുത്തെ സിസിടിവി ക്യാമറയില് ഒരാള് നടന്നുപോകുന്നതു പതിഞ്ഞിരുന്നു. പ്രതിയെ സ്ഥലത്തെത്തിച്ചു നടത്തിയ ശേഷം സിസിടിവി ദൃശ്യവുമായി ഫൊറന്സിക്, താരതമ്യ പരിശോധന നടത്തിയാണു പ്രോസിക്യൂഷന് കേസ് തെളിയിച്ചത്.
പുനരാവിഷ്കരണം കുറ്റസമ്മതത്തിനുള്ള നിര്ബന്ധമാകുമെന്ന പ്രതിയുടെ വാദം ഹൈക്കോടതി അംഗീകരിച്ചു. ഇതു തമിഴ്നാട് സര്ക്കാര് സുപ്രീം കോടതിയില് ചോദ്യം ചെയ്തു. ചുറ്റുമുള്ള സാഹചര്യം മനസ്സിലാക്കാന് കോടതിയെ സഹായിക്കുന്നതിലേക്കുള്ള പുനഃസൃഷ്ടി മാത്രമാണിതെന്നു സുപ്രീം കോടതി നിരീക്ഷിച്ചു.
https://www.facebook.com/Malayalivartha
